កណ្ដាល ៖ ស្ត្រីវ័យចំណាស់ម្នាក់ត្រូវឃាតកមិនស្គាល់មុខរឹតកនឹងខ្សែនីឡុង ស្លាប់ យកសពចងដៃចងជើងកាច់ព័ទ្ធរុំទៅត្រង់កខាងមុខញាត់ចូលក្នុងបាវ ដាក់ក្នុងកញ្ឆេរ ធ្វើពីឫស្សីដឹកទៅទម្លាក់ចោលនៅចំណុចមុខលូ២ខាងកើត ចុះពីផ្លូវជាតិលេខ២១បេ ជាង៥០ម៉ែត្រ ស្ថិតក្នុងភូមិកោះគរ ឃុំរការខ្ពស់ ស្រុកស្អាង ខេត្តកណ្ដាល ។ សពស្ត្រីរងគ្រោះបានត្រូវប្រជាពលរដ្ឋធ្វើស្រូវប្រាំងក្បែរនោះ ប្រទះឃើញនៅវេលាម៉ោងជាង៧ព្រឹក ថ្ងៃទី ១៧ ខែកុម្ភៈ ឆ្នាំ២០១៤ ។ លោក សេង សុជាតិ អធិការប៉ូលិសស្រុកស្អាងបានឲ្យដឹងថា សពស្ត្រីរងគ្រោះរហូតមកដល់រសៀលថ្ងៃដដែលនេះ មិនត្រូវបានប្រភពណាមួយស្គាល់ពី
អត្តសញ្ញាណទេ ហើយគេសង្ស័យថា ជនល្មើសអាចសម្លាប់ជនរងគ្រោះនៅកន្លែងផ្សេង រួចដឹកសពយកទៅទម្លាក់ចោលនៅចំណុចខាងលើរយៈពេល មិនតិចជាង៥ម៉ោង មុនពេលប្រទះឃើញសព ។ ភិនភាគស្ត្រីរងគ្រោះមានកម្ពស់ ១.៥៥ម៉ែត្រ អាយុចន្លោះពី ៥៥ឆ្នាំ ទៅជាង៦០ឆ្នាំ ស្លៀកខោសាច់ក្រណាត់យឺតពណ៌ខ្មៅជើងវែង ពាក់អាវដៃខ្លីពណ៌ក្រហម មានក្រឡា
ការ៉ូកង់ៗ និងជាមនុស្សហូបស្លាម្លូផងដែរ ។ សាច់ឈាមជនរងគ្រោះទំនងជាអ្នកគ្មានទ្រព្យធន់ច្រើនទេ ប៉ុន្តែរូបភាពសម្លាប់មានលក្ខណៈសាហាវ ធ្វើឲ្យប្រជាពលរដ្ឋចោមរោមមើលសាកសពមានការព្រឺព្រួចខ្លាចរអាយ៉ាង ខ្លាំងដែលសកម្មភាពព្រៃផ្សៃនេះ ពុំធ្លាប់កើតមាននៅក្នុងមូលដ្ឋានរបស់ពួកគាត់ ។
ឈ្មោះ ស៊ុន ប៊ី ភេទប្រុស អាយុជាង៤០ឆ្នាំ អ្នកធ្វើស្រូវប្រាំង និងជាអ្នកប្រទះឃើញសពមុនគេបាននិយាយឲ្យដឹងថា នៅវេលាព្រឹកថ្ងៃទី ១៧ ខែកុម្ភៈ ឆ្នាំ២០១៤ ខ្លួនគាត់បានទៅបោចស្មៅស្រូវប្រាំងនៅក្បែរនោះ ។
ស្រាប់តែដើរដល់មុខចំណុចលូ២ ក៏ប្រទះឃើញកញ្ឆេរធ្វើពីឫស្សីរាងបួនជ្រុងទ្រវែង មានបណ្ដោយប្រមាណមួយម៉ែត្រនៅក្រឡាប់ផ្អៀងក្បែរភ្លឺស្រែ គាត់មានការសង្ស័យដោយសារមានឃើញខ្សែនីឡុង និងខ្សែកៅស៊ូរឹតនៅរាយប៉ាយក្បែរកញ្ឆេរនោះ ហើយគាត់មើលទៅក្នុងទឹកបឹងឃើញបាវមួយចងមាត់ជិត ដែលគេទម្លាក់ចោលមានចម្ងាយពីកញ្ឆេរនោះប្រមាណជាង២០ម៉ែត្រ ពីកញ្ឆេរឫស្សី ។
ដោយមានការសង្ស័យខ្លួនបានចុះទៅមើលបាវ ស្រាប់តែឃើញម្រាមដៃមនុស្សលៀនចេញពីក្នុងបាវ ក៏មានការភ្ញាក់ផ្អើលទៅប្ដឹងសមត្ថកិច្ចប៉ុស្តិ៍រការខ្ពស់ឲ្យចុះ ទៅពិនិត្យស្រាយមាត់បាវក៏ប្រទះឃើញសពស្ត្រីរងគ្រោះ ដែលមានស្នាមគេរឹតកសម្លាប់ និងចងដៃចងជើងកាច់រុំជាប់មកដងខ្លួនព័ទ្ធទៅកដើម្បីងាយស្រួល ជនល្មើសញាត់សពចូលក្នុងបាវ ។
ករណីនេះ ប៉ូលិសសង្ស័យថា ជនល្មើសសម្លាប់ជនរងគ្រោះពីកន្លែងផ្សេង ហើយទំនងជាដឹកសពតាមម៉ូតូមកទម្លាក់ចោលនៅទីនោះ ។
លោកវរសេនីយ៍ត្រី សេង សុជាតិ បានឲ្យដឹងថា បច្ចុប្បន្នសពស្ត្រីរងគ្រោះត្រូវបានប្រគល់ជូនទៅអាជ្ញាធររកដី បញ្ចុះសព បណ្ដោះអាសន្ននិងបន្តធ្វើការអំពាវនាវរកសាច់ញាតិបងប្អូនជនរង គ្រោះដែលបាត់សមាជិកគ្រួសារ ដែលមានភិនភាគដូចខាងលើសូមធ្វើការទំនាក់ទំនងជាមួយសមត្ថកិច្ច និងអាជ្ញាធរស្រុកស្អាង ដើម្បីទទួលយកសពក៏ដូចជាការស្វែងរកចាប់ខ្លួនឃាតកដៃដល់ផងដែរ៕