ភ្នំពេញ ៖ បុរសជនជាតិកូរ៉េ២នាក់បើករថយន្តទាំងស្ថានភាពស្រវឹងក្នុងល្បឿនលឿនបុករះរថយន្ត៤គ្រឿងដែលចតស្ងៀមមុខក្រុមហ៊ុនមូលបត្រ សូណាត្រា រុញផ្ទប់គាបជាប់ទៅមុខលែងរួច កាលពីវេលាម៉ោង១១និង១០នាទីយប់ថ្ងៃទី១៧ខែកុម្ភៈឆ្នាំ២០១៤ ស្ថិតតាមបណ្ដោយផ្លូវព្រះមុនីវង្ស ក្នុងសង្កាត់ទន្លេបាសាក់ ខណ្ឌចំការមន។ ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្តម៉ាកលុចស៊ីសRX300 ពណ៌ស ពាក់ស្លាកលេខ ភ្នំពេញ 2Q-9596 បើកបរដោយបុរសជនជាតិកូរ៉េ២នាក់ធ្វើដំណើរតាមបណ្ដោយផ្លូវព្រះមុនីវង្ស ពីទិសដៅពីត្បូងទៅជើងក្នុងស្ថានភាព
ស្រវឹង ហើយបើកបរក្នុងល្បឿនលឿនរេពេញផ្លូវ ខណៈមកដល់មុខក្រុមហ៊ុនមូលបត្រសូណាត្រា ក៏បានជ្រុលទៅបុករះរថយន្ត៤គ្រឿងរបស់ក្រុមហ៊ុន និងបុគ្គលិក ដែលចតទុកមុខក្រុមហ៊ុនបណ្ដាលអោយរុញផ្ទប់គាបជាប់រងការខូចខាតយ៉ាងដំណំ។ រថយន្តទាំង៤គ្រឿងដែលខូចខាតមាន រថយន្តឡង់គ្រីស័រ១គ្រឿង ពាក់ស្លាកលេខ ភ្នំពេញ 2C-6669 រថយន្តទួរីស ១២កៅអី ១
គ្រឿង ពាក់ស្លាកលេខ ភ្នំពេញ 2P-1311 និងរថយន្តហ៊ីយ៉ាន់ដាយ ១តោនកន្លះ ២គ្រឿងទៀត ពាក់ស្លាកលេខ ភ្នំពេញ 2K-2951 និង ភ្នំពេញ 2T-3713។ ក្រោយពេលកើតហេតុសមត្ថកិច្ចជំនាញបានធ្វើការវាស់វែងនិងយករថយន្តបង្កនិងអ្នកបើកបរទៅការិយាល័យចរាចរណ៍ផ្លូវគោករាជធានីភ្នំពេញ ដើម្បីធ្វើការដោះស្រាយតាមនីតិវិធីច្បាប់៕ 
