លោកអ៊ុន សុភ័ក្រ អភិបាល នៃគណៈអភិបាលក្រុងសំរោង បានដឹកនាំក្រុមការងារចុះសួរសុខទុក្ខ និងនាំយកអំនោយទៅប្រគល់ជូនគ្រួសារសពបុរសម្នាក់ បាត់ស្លាប់ដោយសារពស់ចឹក។ គ្រួសាររងគ្រោះនេះរស់នៅភូមិគោករំដួល សង្កាត់សំរោង ក្រុងសំរោង ខេត្តត្ដរមានជ័យ។
បើតាមប្រសាសន៍របស់លោកអ៊ុន សុភ័ក្រ ឲ្យដឹងថាៈ បន្ទាប់ពីទទួលបានព័ត៌មាននេះភ្លាម ឯកឧត្ដមអភិបាលខេត្ត បានធ្វើការចង្អុលបង្ហាញនិងចាត់ឲ្យលោក និងក្រុមការងារ នាំយកនូវអំនោយជាថវិកា គ្រឿងឧបភោគបរិភោគ មកប្រគល់ជូននៅពេលនេះ។ លោកបន្តថា ក្នុងនាមអជ្ញាធរដែនដី លោកមានការសោកស្ដាយ និងសូមចូលរួមរំលែកនូវមរណទុក្ខដ៏ក្រៀមក្រំនេះ។ អំនោយដែលប្រគល់ជូននៅពេលនេះរួមមានៈ អង្ករ .២បេ ទឹកសុទ្ឋ១០យួរ.និងថវិកាចំនួនជាង ២សែនរៀល។ ក្នុងឧិកាសនោះដែរ លោកអភិបាលក្រុងក៏បានអំពាវនាវឲ្យប្រជាពលរដ្ឋទាំងអស់ ត្រូវប្រុងប្រយ័ត្ន ដើរតាមព្រៃត្រូវពាក់ស្បែកជើងក៏វែង ជាពិសេសពេលយប់ព្រលប់ ដើម្បីការពារកុំឲ្យមានគ្រោះថ្នាក់ដោយសារសត្វអាសិរពិសផ្សេងៗ ហើយបើមានបញ្ហាត្រូវឆាប់រាយការណ៍មកអជ្ញាធរ និងប្រញ៉ាប់បញ្ជូនជនរងគ្រោះទៅមន្ទីរពេទ្យ ដើម្បីធ្វើការព្យាបាលបានទាន់ពេលវេលា។
គួរបញ្ជាក់ថា៖ បើតាមការរៀបរាប់របស់សាច់ញាតិគ្រួសារសពឲ្យដឹងថាៈ បុរសដែលស្លាប់ ឈ្មោះសំ នឿត អាយុ៣០ឆ្នាំ មានប្រពន្ធឈ្មោះ ហ៊ុយ ទ្រឹប អាយុ៣១ឆ្នាំ មានកូន០៣ នាក់ក្នុងបន្ទុក។ គ្រួសារនេះមានជីវភាពក្រីក្រ ហើយបុរសប្ដីតែងតែដើរឆ្លុះសត្វ ចាប់កូនកង្កែប ផ្សេងៗដើម្បីចិញ្ចឹមគ្រួសារ។ នៅថ្ងៃកើតហេតុ ដោយមានរលឹមស្រិចៗ គាត់ និងកូនក្មេង២-៣នាក់ បាននាំគ្នាដើរឆ្លុះកង្កែប និងសត្វស្លាបផ្សេងៗ នៅក្បែរភូមិ។ ដោយរវល់តែបញ្ចាំងភ្លើងកែវមើលសត្វនៅតាមដើមឈើ ពេលនោះ គាត់មានអារម្មណ៍ថា មានសត្វអ្វីខាំ គាត់ក៏បញ្ជាំងភ្លើងកែវមើល ក៏ដឹងថាពស់ចឹក។ គាត់ព្យាយាមដើរត្រឡប់មកផ្ទះវិញ ក៏ដួលសន្លប់នៅក្បែរភូមិ។ ដោយមិនអាចយកបុរសរងគ្រោះមកផ្ទះបាន ក្មេងៗដែលទៅជាមួយបានរត់មកប្រាប់ គ្រួសារគាត់។ គ្រួសាររបស់គាត់មិនបានបញ្ជូនគាត់ទៅមន្ទីរពេទ្យភ្លាមៗទេ គឺឲ្យគ្រួខ្មែរបុរាណមើលសិន លុះជនរងគ្រោះមានអាការៈកាន់តែធ្ងន់ធ្ងរទើបនាំទៅមន្ទីរពេទ្យខេត្ត។ ដោយសារជនរងគ្រោះមានអាការៈកាន់តែធ្ងន់ធ្ងរពេលទៅដល់មន្ទីរពេទ្យក៏ដាច់ខ្យល់ស្លាប់តែម្ដង។បើតាមគ្រូពេទ្យឲ្យដឹងថាៈ ករណីពស់ចឹកដូច្នេះ បើសិនជាមកដល់ពេទ្យទាន់ពេលវេលា គឺអាចសង្គ្រោះបាន៕
