ខេត្តកំពង់ឆ្នាំង ប្រជាពលរដ្ឋនៅតាមភូមិជាប់មាត់ទន្លេរ ក្នុងស្រុកបរិបូណ៏ កាលពីយប់ថ្ងៃទី២៣ ខែមិថុនា បានសប្បាយចិត្ត និងមមាញឹក ក្នុងការចាប់ចង្រឹត យកមកលក់អោយឈ្មួញ ព្រោះតែនៅយប់នោះចង្រឹត បានចុះយ៉ាងច្រើនគំហុកពុំធ្លាប់មានពីមុនមកនៅតំបន់នោះ ហើយក៏
បានធ្វើអោយឈ្មួញចាំឈរទិញ នៅ មាត់កំពុងក៏រីករាយនិងការដណ្តើមគ្នាទិញយកទៅលក់នៅខេត្តឆ្ងាយៗបន្តដែរ ។ នៅព្រឹកថ្ងៃទី២៤ ខែមិថុនា នៅមាត់កំពុង មុខផ្សារពន្លៃ គេឃើញប្រជាពលរដ្ឋជាច្រើនមកពីតាមបណ្តា ភូមិ ឃុំដែលជាប់មាត់ទន្លេរ ក្នុងស្រុកបរិបូណ៏ មានដូចជា ឃុំពន្លៃ ឃុំផ្សារ ឃុំត្រពាំងចាន់ឃុំមេលំ ឃុំកំ ពង់ ព្រះគគី និងឃុំឆ្នុងទ្រូ ជាដើម បាននាំគ្នាសម្រុកយកចង្រិត ដែលចាប់បានយកមកលក់អោយ ឈ្មួញ ដែលឈរចាំទិញ ។
ប្រជាពលរដ្ឋខ្លះមានចង្រិតតិចច្រើនទៅតាមដែលគាត់ចាប់បាន ខ្លះមានតិចបំផុត ៥គីឡូក្រាមរហូតដល់ជាង៥០គីឡូក្រាមតាមដែលគាត់មានលទ្ឋភាពទិញអំពូលភ្លើងសម្រាប់ទាក់ទាញសត្វអោយចុះ និងតាមតំបន់ខ្លះមានចង្រិតចុះតិចឬច្រើន ។ ស្ត្រីម្នាក់ជាឈ្មួញចាំទិញចង្រិតនៅមុខផ្សាពន្លៃ បាននិយាយថាៈ ព្រឹកនេះគាត់ទិញចង្រិតបានជាមួយ តោន ហើយនៅមិនអស់ប្រជាពលរដ្ឋនាំគ្នាមកលក់នៅឡើយ ។ចំណែកតម្លៃវិញ គឺខុសគ្នាតាមប្រភេទ ចង្រិតធំឬតូច គឺចាប់ពី១ពាន់៥រយរៀលទៅ ១ម៉ឺន២ពាន់រៀល សម្រាប់ចង្រិតលេខ១។
គាត់ប្រាប់ថា គាត់ ទិញចង្រិតនេះយកទៅលក់នៅខេត្តកំពង់ចាម ។ ចំណែកបងស្រីម្នាក់ដែលទិញយកទៅលក់នៅខេត្តបន្ទាយមានជ័យ បាននិយាយថា គាត់ទិញបានតិច ជាងគេព្រោះគាត់ទទួលដំណឹងក្រោយគេហើយមកទិញក្រោយគេ បានតែជាង៧០០គីឡូក្រាមប៉ុណ្ណោះ តែគាត់ទិញបានចង្រិតល្អៗច្រើន ។
ចង្រិតទាំងនោះគាត់បានដាក់ធុងស្នោវ៉ៃទឹកកកក្លាសេមិនអោយ ស្អុយ រលួយឡើយ អាចទុកបានយូថ្ងៃអោយតែមានទឹកកកជាប់គឺទៅលក់ដល់ទីណានៅតែស្រស់ជានិច្ច ។ ស្ត្រីឈ្មោះជា វ៉ើន អាយុ៤៥ ឆ្នាំ នៅភូមិទួលរការ ឃុំមេលំ ស្រុកបរិបូណ៏ បាននិយាយទាំងរសើចថាយប់ ម៉ិញទាំងប្តីទាំងកូននាំគ្នាប្រមូលចង្រិតពីក្នុងថង់ (ថង់ដាក់ទឹកមានបំពាក់អំពូលខៀវសម្រាប់ទាក់សត្វ) គ្មានបានដេកពួនទេ សប្បាយម្យ៉ាងដែរ គាត់បានចង្រិត២ខេង ជាង៧០គីឡូក្រាម មួយគីឡូក្រាមលក់ បានថ្ងៃ២៥០០រៀល ។
មន្ត្រីនគរបាលស្រុកបរិបូណ៏ ដែលនៅរៀបចំសណ្តាប់ធ្នាប់បាននិយាយថា ឈ្មួញដែលមកចាំទិញ ចង្រិត នៅព្រឹកនេះមាន៣នាក់ ដែលនៅមុខផ្សារពន្លៃនេះមាន២នាក់ ម្នាក់ទិញយកទៅលក់នៅខេត្តកំពង់ ចាម និងម្នាក់ទៀតទិញយកទៅលក់នៅខេត្តបន្ទាយមានជ័យ ។ចំណែកម្នាក់ទៀតដែលទិញយកទីលក់នៅ ភ្នំពេញ គឺបានចុះទៅទិញដល់មាត់កំពុងទឹកឆ្នុងទ្រូតែម្តង គាត់ទិញបានច្រើនជាងគេ ។ឈ្មួញម្នាក់ ៗ សុទ្ឋតែមានធុងសម្រាប់ក្លាសេ និងមានរថយន្តផ្ទាល់ខ្លួនទៀតផង៕
