លោកយាយចាស់ជរា អាយុជាង ៦0 ឆ្នាំ ម្នាក់រស់នៅឥតមាន កូនចៅសាច់ញាតិជាទីពឹង ដោយមានជម្អឺរបេងប្រចាំកាយ រស់ដោយសារអ្នកជិតខាង ភូមិផងរបងជាមួយ ហុចបាយសម្ល ព្រឹក ល្ងាច ហើយដីស្រែចំការ របស់គាត់ កន្លះហិតា ត្រូវបានអាជ្ញាធរ ភូមិ ឃុបឃិតគ្នាលក់ របស់ គាត់ អស់ទៀត ។ លោកយាយជរា ខាងលើមានឈ្មោះ
រាម ពុជ អាយុ ៦៦ ឆ្នាំ រស់នៅភូមិរំចេក ឃុំអន្លង់វែង ស្រុកអន្លង់វែង ខេត្តឧត្តរមានជ័យ។ ប្រធានក្រុមដែលឃុបឃិតយកដីរបស់គាត់លក់ ឈ្មោះ ទឹម សុខន ហៅ យាយកត ភេទស្រី អាយុ ជាង ៥០ ឆ្នាំ រស់នៅភូមិ ឃុំជាមួយគ្នា ។ បើតាមសំដីរបស់លោកយាយខាងលើ បានឲ្យដឹងថា គាត់បានទៅព្យាបាលជម្ងឺ របេងនៅខេត្តសៀមរាបជាច្រើនថ្ងៃ ហើយខ្លួនក៏ចាស់ជរាណាស់ទៅហើយដែរ ពេលដែលត្រឡប់មកវិញ ប្រធានក្រុម បានឃុបឃិតយកដីចំការរបស់គាត់លក់អស់ ដោយស្មានថាគាត់មិនមានជីវិត រស់រានវិលត្រឡប់មកវិញ ។
បន្ទាប់ពីគាត់វិលត្រឡប់មកវិញ គាត់បានសុំ ដីពីអ្នកទិញ និងអ្នកលក់មកវិញ តែគេមិនព្រម គាត់ក៏បាន ឲ្យអាជ្ញាធរភូមិ ឃុំ ស្រុក ជួយរកយុត្តិធម៌ ដោយមានស្នាមមេដៃប្រជាពលរដ្ឋនៅក្នុងភូមិ រាប់រយនាក់ជាសក្សី បញ្ជាក់ថាដីស្រែចំការជាកម្មសិទ្ធិរបស់គាត់ពិតប្រាកដ តែអាជ្ញាធរ ភូមិ ឃុំ ស្រុក មិនបានរកយុត្តិធម៌ឲ្យពួកគាត់ទេ បែរជានាំគ្នានិយាយាថា រឿងយាយឯងរញេរញ៉ាយណាស់ រហូតមកដល់សព្វថ្ងៃ អស់រយៈពេលជាមួយឆ្នាំ ទៅហើយ ។ ដោយធ្វើឲ្យរូបគាត់សង្ស័យថា ក្រុមអាជ្ញាធរបានឃុតឃិតគ្នាលក់ដីរបស់គាត់ចែកលុយគ្នាចាយ ទើបពន្យាពេលពី១ថ្ងៃ ទៅ១ឆ្នាំយ៉ាងនេះ ៕
