កំពង់ចាម: ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម បានអញ្ជើញជាគណៈអធិបតីក្នុងពិធីបិទការប្រកួតដណ្តើម«ពានរង្វាន់កីឡាហែលទឹកតេជោសែន»លើកទី៤ ឆ្នាំ២០១៨ ដើម្បីចូលរួមអបអរសាទរខួបអនុស្សាវរីយ៍លើកទី៤០ថ្ងៃបង្កើតរណសិរ្សសាមគ្គី អភិវឌ្ឍន៍មាតុភូមិកម្ពុជា! (០២ ធ្នូ ១៩៧៨-០២ ធ្នូ ២០១៨) ដែលពិធីនេះត្រូវបានប្រារព្ធឡើងនារសៀលថ្ងៃទី២ ខែធ្នូ ឆ្នាំ២០១៨ នៅមណ្ឌលកីឡាហែលទឹក តេជោសែន ខេត្តកំពង់ចាម។
ថ្លែងក្នុងពិធីនោះ ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងថា ក្រោយពីការចូលរួមប្រកួតកីឡាហែលទឹករយៈពេល ២ថ្ងៃ របស់កីឡាករ -កីឡាការនីយើង ដោយសង្កេតឃើញថា ក្រុម កីឡាករ -កីឡាការនី សុទ្ធសឹងតែបានខិតខំប្រឹងប្រែង ហ្វឹកហាត់រួចមកហើយក្តី ជាមួយគ្នានោះឯកឧត្ដមទេសរដ្ឋមន្ត្រី បានសំណូមពរឲ្យក្រុមកីឡាករ -កីឡាការនី យើងទាំងអស់ ត្រូវខិតខំហ្វឹកហាត់បន្ថែមទៀត ដើម្បីត្រៀមដណ្តើមយកមេដៃជូនជាតិយើង ក្នុងពេលយើងធ្វើជាម្ចាស់ផ្ទះប្រកួតនៅឆ្នាំ២០២៣ ខាងមុខនេះ។ 
ឯកឧត្ដមទេសរដ្ឋមន្ត្រី បានថ្លែងបន្តទៀតថា បច្ចុប្បន្ន រដ្ឋាភិបាលកំពុងសាងសង់ អាងហែលទឹកថ្មីហើយ ដែលនឹង បម្រុង ផ្តល់ជូនសម្រាប់ កីឡាករ -កីឡាការនី យើងចំនួន៦០នាក់ ស្នាក់នៅ និង បំប៉ន សុខភាព ឲ្យបានត្រឹមត្រូវ ដើម្បីប្រកួតដណ្តើមមេដៃឲ្យបានច្រើនជូនជាតិរបស់យើង។
សូមបញ្ជាក់ថា រយៈពេល២ថ្ងៃ ពោលគឺថ្ងៃទី១ និងថ្ងៃទី២ ខែធ្នូ ឆ្នាំ២០១៨នេះ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានសហព័ន្ធកីឡាហែលទឹកកម្ពុជា រួមជាមួយ ឯកឧត្តម គួច ចំរើន អភិបាលខេត្តកំពង់ចាម បានរៀបចំឲ្យមានការប្រកួត
កីឡារហែលទឹក ដើម្បីដណ្តើមពានរង្វាន់សម្តេច តេជោ ហ៊ុន សែន លើកទី៤ ឆ្នាំ២០១៨ នៅ មណ្ឌលកីឡាហែលទឹក តេជោសែន ខេត្តកំពង់ចាម ដែលក្នុងនោះ កីឡាករ កីឡាការនី មកពី៨ក្លឹប ចូលរួមការប្រកួត គឺ ១ ក្លឹបក្រសួងសាធារណការនិងដឹកជញ្ជូន បានទទួលពានរង្វាន់លេខ១ ដោយទទួលមេដៃ សារុបចំនួន២៤ .ទី២ ក្លឹបក្រសួងមហាផ្ទៃ បានទទួលពានរង្វាន់លេខ២ ដោយទទួលមេដៃ សារុបចំនួន២១ និងទី៣ ក្លឹបសាលាខេមរីឌអន្តរជាតិ បានទទួលពានរង្វាន់លេខ៣ ដោយទទួលមេដៃ សារុបចំនួន៧ ។ ដោយឡែក ក្លឹបចំនួន៥ទៀត ក្លឹបក្រសួងព័ត៌មាន ទទួលបានមេដៃ ៦ .ក្លឹបនាគរាជកំពង់ចាម ទទួលបានមេដៃ៩ .ក្លឹបក្រសួងសេដ្ឋកិច្ចនិងហិរញ្ញវត្ថុ ទទួលបានមេដៃ៧ .ក្លឹបមច្ឆាទុម ទទួលបានមេដៃ៤ .និងក្លឹបប៉ារ៉ាអូឡាំពិចកម្ពុជា ទទួលបានមេដៃ៩ ផងដែរ ៕
