ជំនួបយ៉ាងក្តៅគគុករវាងក្រុមសាខាក្រុងភ្នំពេញ ជាមួយក្រុមសាខាពោធិ៍ចិនតុង ក្នុងការប្រកួតបាល់ទាត់ដណ្តើមពានរង្វាន់ធនាគារអេស៊ីលីដាប្រចាំឆ្នាំ២០១៤ នាព្រឹកមិញនេះ នៅលើទីលានខេមរា គឺជាលទ្ឋផលសឹងតែមិនគួរឱ្យជឿ ដែលក្រុមសាខាក្រុងភ្នំពេញ នាំមុខគូប្រកួតមុនបានចំនួន៣គ្រាប់នោះ បែរជាចាញ់ទៅវិញ ។ នៅក្នុងតង់ទី១ ក្រុមសាខាពោធិ៍ចិនតុង វាយសំរុកផ្ទួនៗបានចំនួន៣គ្រាប់ ដោយក្រុមសាខាក្រុងភ្នំពេញ មិនអាចធ្វើការតបតវិញ លទ្ឋផលបណ្តោះអាសន្ន ៣ទល់នឹង០ ។ ប៉ុន្តែអ្វីដែលគួរឱ្យភ្ញាក់ផ្អើលនោះ ពេលចូលដល់តង់ទី២ ក្រុមសាខាក្រុងភ្នំពេញ បានផ្លាស់ប្តូរកំលាំង និងយុទ្ឋសាស្ត្រលេងយ៉ាងល្អ ហើយរកគ្រាប់បាល់សងវិញបានភ្លាមៗចំនួន៤គ្រាប់ ខណះដែលក្រុមសាខាពោធិ៍ចិនតុង មិនមានលទ្ឋភាពរកគ្រាប់បាល់បន្ថែមទៀតទាល់តែសោះ ។ នៅពេលបញ្ចប់ការប្រកួតពេញម៉ោង៩០នាទី ក្រុមសាខាក្រុងភ្នំពេញ ឈ្នះក្រុមសាខាពោធិ៍ចិនតុង ដោយលទ្ឋផល៤ទល់នឹង៣ ។
មួយគូទៀត ក្រុមសាខាចោមចៅ បានយកឈ្នះក្រុមសាខាដូនពេញ ដោយលទ្ឋផល២ទល់នឹង០ ប៉ុន្តែនេះជាការប្រកួតបង្គ្រប់កិច្ចតែប៉ុណ្ណោះ ដោយក្រុមទាំង២ បានជ្រុះចេញពីការប្រកួតក្នុងពូលដូចគ្នា ។ នៅក្នុងតង់ទី១ ក្រុមទាំង២នេះធ្វើការប្រកួតគ្នាយ៉ាងស្វាហាប់ និងស្វិតស្វាញ ដោយបានវាយសំរុកដាក់គ្នាទៅវិញទៅមកជាញឹកញាប់ តែមិនមានក្រុមណាមួយរកគ្រាប់បាល់បានដូចគ្នា ។ តែពេលចូលក្នុងតង់ទី២ ក្រុមសាខាដូនពេញ ហាក់ដូចជាថបថយកំលាំងបន្តិច ជាហេតុធ្វើឱ្យក្រុមសាខាចោមចៅ ឆ្លៀតឱកាសនេះ ទាត់បាល់បញ្ចូលទីបានដល់ទៅ២គ្រាប់ ដែលជាគ្រាប់ជ័យជំនះតែម្តង ខណះក្រុមសាខាដូនពេញ មិនអាចរកគ្រាប់បាល់បានសងវិញ ។