ម្ចាស់ផ្ទះប្រេស៊ីលបានឡើងទៅវគ្គ៨ចុងក្រោយនៃព្រឹត្តិការណ៍ World Cup ទាំងត្រដាប់ត្រដួសបន្ទាប់ពីពួកគេប្រកួតឈ្នះឈីលីដោយការស៊ុតបាល់ប៉េណាល់ទី ។ ការប្រកួតនៃតង់ទី១បានដំណើរការរហូតដល់នាទីទី១៨ទើបកីឡាករ David Luiz (
ដេវីដ ល្វីស) ស៊ុតឲ្យប្រេស៊ីលនាំមុខមុន ១-០ ។ ប៉ុន្តែការប្រកួតនៅនាទីទី៣២នៃតង់ទី១ដដែលនេះ ឈីលីតាមបានស្មើវិញដោយថ្វីជើងរបស់ខ្សែប្រយុទ្ធ Alexis Sanchez (អាឡិចស៊ីស សាន់ឆេស) បន្ទាប់ពីខ្សែការពាររបស់ប្រេស៊ីលធ្វើឲ្យមានកំហុស ។
ចប់តង់ទី១ក្រុមទាំងពីរស្មើគ្នា១-១ ។ ការប្រកួតចូលដល់តង់ទី២ក្រុមទាំង២មិនអាចរកគ្រាប់បាល់បន្ថែមបានឡើយលុះចប់ការប្រកួត៩០នាទី ប្រេស៊ីល១ ឈីលី១ ។ ការប្រកួតបានឈានចូលដល់ម៉ោងបន្ថែម១៥នាទី២ដង ក្រុមទាំងពីរនៅតែមិនអាចធ្វើអ្វីគ្នាបានដដែលហើយការប្រកួតនេះត្រូវកាត់សេចក្តីដោយការស៊ុតបាល់ប៉េណាល់ទី ។ ការស៊ុតបាល់ប៉េណាល់ទី នេះប្រេស៊ីលធ្វើបានល្អជាងដោយបានយកឈ្នះក្នុងលទ្ធផល៣-២ ។ គួរបញ្ជាក់ថា ៣ គ្រាប់នៃការស៊ុតបាល់ប៉េណាល់ទីរបស់ប្រេស៊ីលគឺធ្វើបានដោយកីឡាករ David Luiz, Marcelo និង Neymar ចំណែកពីរគ្រាប់របស់ឈីលីគឺស៊ុតបានដោយកីឡាករ Charles Aranguiz និង Marcelo Diaz ៕