ប្រភពព័ត៌មានប៊ីប៊ីស៊ីបានផ្សព្វផ្សាយនៅថ្ងៃទី២៩ ខែមិថុនា ឆ្នាំ២០១៤ថា រដ្ឋាភិបាលអ៊ីរ៉ាក់ទើបតែទទួលបានយន្តហោះចម្បាំង៥គ្រឿងដែលទិញពីប្រទេសរុស្ស៊ីដើម្បីធ្វើសកម្មភាពប្រយុទ្ធប្រឆាំងក្រុមភេរវកម្មសាន់នីដែលកំពុងគ្រប់គ្រងភាគខាងជើងអ៊ីរ៉ាក់ ។ ក្រុមឧទ្ទាមសាន់នី ដោយរួមបញ្ចូលទាំងក្រុមដែលហៅខ្លួនឯងថា រដ្ឋអិស្លាមអីរ៉ាក់ ឬ ISIL នោះកំពុងគ្រប់គ្រងតំបន់ជាច្រើនស្ថិតនៅភាគខាងជើងអ៊ីរ៉ាក់ ក្រោយពីក្រុមនេះបានធ្វើសកម្មភាពដណ្តើមពីរដ្ឋាភិបាលតាំងពី៣សប្តាហ៍កន្លងមក ។
កាលពីថ្ងៃទី២៨ ខែមិថុនា កម្លាំងរដ្ឋាភិបាលអ៊ីរ៉ាក់បានប្រកាសថា ទាហានរដ្ឋាភិបាលបានវាយដណ្តើមគ្រប់គ្រងទីក្រុង Tikrit ដែលក្រុមភេរវករបានកាប់កាប់នាពេលថ្មីៗនោះ។ ទូរទស្សន៍រដ្ឋបានផ្សព្វផ្សាយថា ពួកឧទ្ទាម៦០នាក់ត្រូវបានសម្លាប់ ក្នុងខណៈដែលកម្លាំងរដ្ឋាភិបាលចាប់ប្រតិបត្តិការឆ្ពោះទៅកាន់ភាគខាងដើងដើម្បីដណ្តើមគ្រប់គ្រងឡើងវិញទីក្រុង ម៉ូស៊ូល ពីសំណាក់ពួកភេរវករ។
ក្រសួងការពារជាតិអ៊ីរ៉ាក់បានបញ្ជាក់ថា យន្តហោះចម្បាំងប្រភេទ SU-25 (ប្រភពខ្លះថា យន្តហោះចម្បាំង ប្រភេទ SU-30 )ត្រូវបញ្ជូនពីរុស្ស៊ីមកកាន់អ៊ីរ៉ាក់ ។ យន្តហោះទាំងនេះមានតម្លៃរហូតដល់៥០០លានដុល្លារដែលរដ្ឋាភិបាលអ៊ីរ៉ាក់ទិញពីរុស្ស៊ី។ អ៊ីរ៉ាក់ត្រូវការយន្តហោះចម្បាំងប្រភេទនេះដើម្បីវាយប្រហារពួកភេរវកម្មស្ថិតនៅតំបន់ភាគខាងជើង ៕