កំពង់ចាម: ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម បានអញ្ជើញចូលរួមក្នុងពិធីប្រកាសចូលកាន់តំណែងប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម ក្រោមអធិបតីភាពឯកឧត្ដម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឯកឧត្ដម ខ្លូត ផន ប្រធានក្រុមប្រឹក្សាខេត្ត ព្រមទាំងមានការចូលរួមពី មន្ទីរអង្គភាពពាក់ព័ន្ធជុំវិញខេត្ត និងអភិបាល អភិបាលរងក្រុង-ស្រុកទាំង១០ ដែលពិធីនេះត្រូវបានប្រារព្ធឡើងនាព្រឹកថ្ងៃ២៨ ខែមករា ឆ្នាំ២០១៩នៅសាលប្រជុំធំសាលាខេត្តកំពង់ចាម។
ដោយលោក គឹម សាវឿន អតីតប្រធានមន្ទីរកសិកម្ម ត្រូវទទួលភារកិច្ចថ្មី នៅក្រសួងកសិកម្ម រុក្ខាប្រមាញ់ និងនេសាទ ជំនួសដោយ លោក សុឹម ថាវីរះ អនុប្រធានមន្ទីរ ត្រូវឡេីងជាប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម។
ថ្លែងក្នុងពិធីប្រកាសចូលកាន់តំណែងនេះ ឯកឧត្តម គួច ចំរើន អភិបាលខេត្តកំពង់ចាម បានលើកឡើងថា ក្នុងកំឡុងឆ្នាំ២០១៦ កសិករយើងធ្លាប់ទទួលគ្រោះរាំងស្ងួតម្តងរួចមកហើយ ដោយមានការគាំទ្រពីក្រសួងកសិកម្ម រុក្ខាប្រមាញ់ និងនេសាទ និងដៃគូអភិវឌ្ឍន៍នានា បានជីកអណ្តូងជាច្រើន ដើម្បីកសិករយើងយកទឹកទៅប្រេីប្រាស់ ស្រោចស្រពផលដំណាំ តែរហូតមកដល់ពេលនេះ អណ្តូងទាំងនោះអាចទទួលរងការខូចខាតអស់ខ្លះហើយដែរ ដូច្នេះសូមឲ្យមន្ត្រីយេីងចុះទៅពិនិត្យ ប្រមូលទិន្នន័យ ដើម្បីធ្វើការស្តាឡើងវិញជូនប្រជាពលរដ្ឋប្រេីប្រាស់។
ជាមួយគ្នានោះ ឯកឧត្តមអភិបាលខេត្ត ក៏បានជំរុញដល់មន្ត្រីពាក់ព័ន្ធទាំងអស់ ត្រូវជួយផ្សព្វផ្សាយ អំពីគ្រោះរាំងស្ងួតដែលនឹងកេីតមានឡើងនារដូវប្រាំងឆ្នាំ២០១៩នេះ គឺសូមឲ្យប្រជាពលរដ្ឋ គួរកុំបន្តធ្វើការសាបព្រោះស្រូវប្រាំជាលើកទី២ ព្រោះមិនមានទឹកគ្រប់គ្រាន់សម្រាប់ស្រោចស្រពនោះទេ ហើយថែមទាំងអាចខ្វះខាតទឹក ដែលនឹងប៉ះពាល់ដល់សត្វចិញ្ចឹម និងសត្វព្រៃទៀតផង។ ជាពិសេសត្រូវជំរុញដល់សេវាក ត្រូវខិតខំតបណ្ដាញទឹក ទៅដល់តំបន់នានាដែលមិនទាន់មានទឹក ឲ្យបានឆាប់រហ័សផងដែរ។
ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានធ្វើការផ្តាំផ្ញេីរដល់លោកប្រធានមន្ទីរដែលទេីបតែទទួលតំណែងថ្មី ឲ្យខិតខំបំពេញភារកិច្ចដោយទទួលខុសត្រូវខ្ពស់ ត្រូវមានសាមគ្គីភាពផ្ទៃក្នុង និងមន្ទីរអង្គភាពពាក់ព័ន្ធជុំវិញខេត្ត ដោយគោរពនិងអនុវត្តឲ្យបានម៉ត់ចត់តាមច្បាប់ និងបទប្បញ្ញត្តិនានារបស់រដ្ឋផងដែរ ៕
