កំពង់ចាម: ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម អមដំណើរដោយមន្ត្រីពាក់ព័ន្ធ បានអញ្ជើញចូលរួមធ្វើការលេីកទឹកចិត្ត និងទស្សនា ការប្រកួតពានរង្វាន់បាល់ទាត់យុវជន ក្រោមអាយុ១៥ឆ្នាំ ១៧ឆ្នាំ ប្រកួតលើកទី៦ រវាងខេត្តកំពង់ចាម និងខេត្តត្បូងឃ្មុំ ដែលពិធីនេះបានធ្វើឡើងនាព្រឹកថ្ងៃទី១០ ខែកុម្ភៈ ឆ្នាំ២០១៩ នៅកីឡាដ្ឋានខេត្តកំពង់ចាម។
លោក លី ម៉េងសាន ប្រធានមន្ទីរអប់រំយុវជននិងកីឡាខេត្តកំពង់ចាម បានឲ្យដឹងថា ការប្រកួតនេះ គឺគណៈកម្មការបានរៀបចំឡើង មានចំនួន២០ការប្រកួត ដោយមានក្រុមកីឡា សរុបចំនួន៦ក្រុម ក្នុងនោះក្រុមកីឡាករមាន៤ក្រុម និងកីឡាការីនីមានចំនួន២ក្រុម ដែលមានចំនួន៣៩៤នាក់ និងគ្រូបង្វឹក១២នាក់ ក្នុងគោលបំណងចូលរួមដណ្ដើមពានរង្វាន់ សហព័ន្ធកីឡាបាល់ទាត់កម្ពុជា នៅរាជធានីភ្នំពេញ និងជ្រើសរើសយកកីឡាករដែលមានទេពកោសល្យ ធ្វើការបណ្តុះបណ្តាលបន្ថែម ដើម្បីត្រៀមធ្វើការប្រកួតដណ្តើមពានរង្វាន់ស៊ីហ្គេមឆ្នាំ២០២៣ ដែលកម្ពុជាយើងធ្វើជាម្ចាស់ផ្ទះផងដែរ។
ឆ្លៀតក្នុងឱកាសនោះដែរ ឯកឧត្តម គួច ចំរើន អភិបាលខេត្តកំពង់ចាម បានឩបត្ថម្ភជូន ដល់ក្រុមកីឡាករ កីឡាការីនីទាំង៦ក្រុម ដោយក្នុង១ក្រុម ទទួលបានថវិកា១លានរៀល និងគណះកម្មការរៀបចំការប្រកួតទទួលបានថវិកា ១លានរៀលផងដែរ។
គួររំលឹកផងដែរថា កន្លងមកឯកឧត្ដម អភិបាលខេត្ត តែងតែធ្វើការជម្រុញឲ្យគ្រប់មន្ទីរអង្គភាពពាក់ព័ន្ធជុំវិញខេត្ត ធ្វេីការគាំទ្រឧបត្តម្ភផ្នែកកីឡានិមួយៗ ឲ្យកាន់តែមានការរីកចម្រេីនឡើង និងជាពិសេសដេីម្បីត្រៀមខ្លួនចូលរួមធ្វើការប្រកួតកីឡាស៉ីហ្គេមឆ្នាំ២០២៣ ដែលកម្ពុជាយេីងធ្វេីជាម្ចាស់ផ្ទះទៀតផង។ ដែលជាការចូលរួមចំណែកលេីកស្ទួយវិស័យកីឡា ឲ្យកាន់តែមានការរីកចម្រេីនជាលំដាប់ ស្របពេលដែលប្រទេសជាតិយេីងមានសុខសន្តិភាព ៕