កំពង់ឆ្នាំង ៖ កម្លាំងចម្រុះដឹកនាំដោយព្រះរាជអាជ្ញារង អមសាលាដំបូង ខេត្តកំពង់ឆ្នាំង លោក ឯក ស៊ុនរស្មី បានចុះអនុវត្ត លើដីការក្សាទុកបិទឃ្លាំងដំឡូងមី ម្ចាស់ឈ្មោះ នៅ សារី និងប្រពន្ធ ឈ្មោះ ស្លេស អាស៊ីម៉ាស ដែលមានទីតាំងស្ថិតនៅ ក្នុងទីបញ្ជាការទ័ពអាកាស ព្រលានយន្តហោះ
ខេត្តកំពង់ឆ្នាំង នៅក្នុងយុទ្ធនាការខាងលើនេះ ដំបូងឡើយអ្នកកាសែតត្រូវបានកម្លាំង យោធា របស់លោក កែវ វណ្ណដេត ធ្វើការហាមឃាត់មិនអោយចូលទៅយកពត៌មានឡើយ ប៉ុន្តែខណៈពេលដែលកម្លាំងចម្រុះខាងលើ បានមកដល់ទើបអ្នកសារពត៌មាន បានចូលទៅថតរូបភាព
នៅទីតាំងនេះ បើទោះគេសង្កេតឃើញកម្លាំងសមត្ថកិច្ច ក្រោមបញ្ជារបស់អាជ្ញាធរខេត្ត និងដឹកនាំកម្លាំងអនុវត្តដីកា រក្សាការពារធ្វើការបិទឃ្លាំងនេះរួចហើយក៍ដោយ ប៉ុន្តែប្រជាពលរដ្ឋ ជាច្រើននាក់ មកពីខេត្តពោធិសាត់ ខេត្តព្រៃវែង ខេត្តកំពង់ចាម និងខេត្តប៉ៃលិន បានសំណូមពរអោយអាជ្ញាធរ ក៍ដូចជាតុលាការ មេត្តាជួយពន្លឿន ក្នុងការចាត់ការលើសំណុំរឿងឆបោក ថ្លៃដំឡូងមី ព្រោះថាដំឡូងមីដែលត្រូវរក្សាការពារខាងលើ និងអាចខូចឆាប់ៗព្រោះថាដំឡូងមីមិនអាចទុកបានយូរឡើយ ។ សូមរម្លឹកថា ការចុះអនុវត្តដីកា រក្សាការពារនេះ បានធ្វើឡើងក្រោយ
ប្រជាពលរដ្ឋជាច្រើននាក់ បានផ្ទុះការតវ៉ាជាថ្មីម្តងទៀត ដោយបានលើកគ្នាមកទារលុយពីមេឈ្មួញម្នាក់នោះ នៅទីតាំងព្រលានយន្តហោះ ខេត្តកំពង់ឆ្នាំង ដោយបាននាំគ្នាឈរកាន់បដា ស្រែកទាមទារអោយមន្ត្រីពាក់ព័ន្ធជួយអន្តរាគមន៍ផងដែរ ។ ប្រជាពលរដ្ឋជាច្រើននាក់ នៅតាមបណ្តាខេត្តនានា បានចាញ់បោកឈ្មួញម្នាក់ ដែលចុះទៅប្រមូលទិញ មើមដំឡូងមីពីពួកគាត់ ហើយមិនឲ្យលុយដោយមេឈ្មួញម្នាក់នោះ ជួលទីតាំងព្រលានយន្តហោះ នៅក្នុងខេត្តកំពង់ឆ្នាំង ដែលជាមូលដ្ឋានទ័ពអាកាស សម្រាប់ហាល និងស្តុកមើមដំឡូង ទុកលក់បន្ត និងបាន
យកឈ្មោះលោក កែវ វណ្ណដេត ដែលជាមេបញ្ជាការទ័ពអាកាស មកកាងមុខរបរនេះផងដែរ ។ឈ្មួញដែលដើរប្រមូលទិញមើមដំឡូងមី ពីប្រជាពលរដ្ឋ មិនអោយលុយនោះ ឈ្មោះ នៅ សារី និង ប្រពន្ធឈ្មោះ ស្លេស អាស៊ីម៉ាស់ មានទីលំនៅក្នុងឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ។ ប្រជាពលរដ្ឋ បានអោយដឹងថា លុយដែលឈ្មោះ នៅ សារី ជំពាក់ពួកគាត់ ក្នុងម្នាក់ៗ មានចំនួនរាប់ពាន់រាប់ម៉ឺនដុល្លារ ហើយមានរយៈពេលរាប់ខែ និងខ្លះទៀត រាប់ឆ្នាំមកហើយ ទោះបីពួកគាត់មកទារជាច្រើនលើក ក៏ឈ្មោះ នៅ សារី និងប្រពន្ធ មិនដែលសង
ឡើយ ហើយមានប្រជាពលរដ្ឋ នៅក្នុងភូមិស្រុករបស់គាត់ ជាច្រើននាក់ទៀត ក៏ត្រូវឈ្មោះ នៅ សារី បោកប្រាស់ទិញមើមដំឡូងមី មិនអោយលុយ ដូចពួកគាត់ដែរ ហើយពួកគេនឹងឡើង មកជាបន្តបន្ទាប់ ដើម្បីដាក់ពាក្យប្តឹង នៅតុលាការខេត្តកំពង់ឆ្នាំង។ ប្រភពដោយឡែកមួយទៀត បានអោយដឹងថា ឈ្មោះ នៅ សារី រកស៊ីមុខរបរនេះ បានយកឈ្មោះ កែវ វណ្ណដេត ដែលជាមេបញ្ជាការទ័ពអាកាស កាងនៅពីក្រោយខ្នង និងបានជួលអគារ និងទីតាំងព្រលានយន្តហោះ នៅក្នុងខេត្តកំពង់ឆ្នាំង សម្រាប់ហាលសម្ងួតមើមដំឡូង និងស្តុកមើមដំឡូងមី ដែលគេប្រមូលទិញ
បាន ពីតាមបណ្តាខេត្តនានា ផងដែរ ។ ទីតាំងនេះ ត្រូវឈ្មោះ នៅ សារី ជួលក្នុងតម្លៃ ២ ម៉ឺនដុល្លារ ក្នុងមួយឆ្នាំ ហើយក្នុងកិច្ចសន្យា មានរយៈពេល ៣ ឆ្នាំ។ក្នុងពេលដែលប្រជាពលរដ្ឋ ទៅតវ៉ានោះ លោក នៅ សារី មិនបានស្ថិតនៅកន្លែង ទីតាំងស្តុកមើមដំឡូងមី នោះឡើយ ហើយក៏មិនអាចទាក់ទង សុំការបំភ្លឺបានដែរ ។ រីឯលោក កែវ វណ្ណដេត ដែលជាមេបញ្ជាការ ទ័ពអាកាសវិញ លោកបានបញ្ជាក់យ៉ាងខ្លីថា «អត់ដឹងទេ» លោកជាប់រវល់។ សូមរម្លឹកផងដែរថា កាលពីពេលកន្លងទៅ ប្រជាពលរដ្ឋជាច្រើនាក់មកពីខេត្តប៉ៃលិន បានប្តឹង លោក នៅ សារី ទាមទារប្រាក់ថ្លៃដំឡូងមីដូចគ្នានេះហើយ រហូតមកដល់ពេលនេះ នៅមិនទាន់បញ្ចប់នៅឡើយទេ ៕
