ភ្នំពេញ៖ ប្រជាពលរដ្ឋក្នុងសង្កាត់ចំនួន០៥នៃខណ្ឌដង្កោ គឺសង្កាត់រលួស សង្កាត់ទៀន សង្កាត់គងនយ សង្កាត់ស្ពានថ្ម និងសង្កាត់ព្រែកកំពឹស ទទួលបានផ្លូវបេតុងក្នុងមួយសង្កាត់១ខ្សែ ដែលបើកការដ្ឋានព្រមៗគ្នា ក្រោមវត្តមានចូលរួមពីលោកនុត ពុធដារ៉ា អភិបាលនៃគណៈអភិបាល
ខណ្ឌដង្កោ នាព្រឹកថ្ងៃទី២ ខែកក្កដា ឆ្នាំ២០១៤ ។ លោក នុត ពុធដារ៉ា បានធ្វើការថ្លែងនូវការអបអរសាទរចំពោះការទទួលបានផ្លូវបេតុងថ្មី ទាំង០៥ខ្សែ ក្នុងសង្កាត់ចំនួន០៥ក្នុងខណ្ឌដង្កោ ដោយក្នុងនោះមួយសង្កាត់ទទួលបានផ្លូវបេតុង ០១ខ្សែ ។ លោកអភិបាលបានលើកឡើងអំពីការអភិវឌ្ឍន៍របស់មូលដ្ឋានសង្កាត់ខណ្ឌរបស់យើង ហើយសង្កាត់ទាំង០៥នេះ ជាសង្កាត់ដែលបានកាត់ពីស្រុកកណ្តាលស្ទឹង បញ្ចូលមកក្នុងការគ្រប់គ្រងរបស់រដ្ឋបាលខណ្ឌដង្កោនាចុងឆ្នាំ២០១០ ហើយមកដល់ពេលនេះ បានទទួលការអភិវឌ្ឍន៍ យ៉ាងច្រើន ទាំងវិស័យហេដ្ឋារចនាសម្ព័ន្ធរូបវ័ន្ត និងវិស័យផ្សេងៗទៀត ម្យ៉ាងទៀត នៅថ្ងៃនេះសង្កាត់ទាំង០៥ បានទទួលផ្លូវបេតុងបន្ថែមទៀត ក្នុងគម្រោងមូលនិធិ
អភិវឌ្ឍន៍សង្កាត់ឆ្នាំ២០១៤ ដែលនេះបានឆ្លុះបញ្ចាំងអំពីការអភិវឌ្ឍន៍របស់ប្រទេសជាតិទាំងមូល ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោហ៊ុនសែន ជានាយករដ្ឋមន្ត្រី គឺបានដឹកនាំប្រទេសឲ្យមានសុខសន្តិភាព ស្ថេរភាពនយោបាយ និងការអភិវឌ្ឍលើវិស័យសេដ្ឋកិច្ច។ លោកអភិបាលខណ្ឌ ក៏បានធ្វើការផ្តាំផ្ញើរដល់បងប្អូនប្រជាពលរដ្ឋ ដែលជាអ្នករស់នៅតាមបណ្តោយផ្លូវដែលនឹងស្ថាបនានេះ សូមជួយសម្រួលដល់ការស្ថាបនាឲ្យបានអនុវត្តទៅដោយរលូន និងឆាប់រហ័ស ហើយសូមរាយការណ៍អំពីសភាពការណ៍នានាដល់
អាជ្ញាធរសង្កាត់ ខណ្ឌ ដើម្បីមានវិធានការ ។ ជាមួយគ្នានោះដែរ សូមឲ្យក្រុមហ៊ុនទទួលការធ្វើការស្ថាបនាឲ្យបានទាន់ពេលវេលា និងអនុវត្តទៅតាមលក្ខណៈបច្ចេកទេស និងកិច្ចសន្យាទទួលការសាងសង់។ សូមបញ្ជាក់ថា ផ្លូវបេតុងទាំង០៥ខ្សែ ស្ថាបនាដោយក្រុមហ៊ុនសំណង់ សំ ស៊ីវន រួមមានៈ - សង្កាត់រលួស មានប្រវែង ១១៨ម៉ែត្រ ទទឹង ០៤ម៉ែត្រ កម្រាស់ ០,១៥ម៉ែត្រ - សង្កាត់ទៀន មានប្រវែង ១២២ម៉ែត្រ ទទឹង ០៤
ម៉ែត្រ កម្រាស់ ០,១៥ម៉ែត្រ - សង្កាតគងនយ មានប្រវែង ១០៩ម៉ែត្រ ទទឹង ០៤ម៉ែត្រ កម្រាស់ ០,១៥ម៉ែត្រ - សង្កាត់ស្ពានថ្ម មានប្រវែង ១៣៨ម៉ែត្រ ទទឹង ០៤ម៉ែត្រ កម្រាស់ ០,១៥ម៉ែត្រ - សង្កាត់ព្រែកកំពឹស មានប្រវែង ១០៥ម៉ែត្រ ទទឹង ០៥ម៉ែត្រ កម្រាស់ ០,១៥ម៉ែត្រ 
