កំពង់ចាម: ក្នុងនាមជាអភិបាល នៃគណ:អភិបាលស្រុកទេីបទទួលភារកិច្ចថ្មី ត្រូវដឹកនាំកងកម្លាំងប្រដាប់អាវុធចំណុះទាំងអស់ទូទាំងស្រុក ថែរក្សាសន្តិភាព សន្តិសុខ សណ្តាប់ធ្នាប់សាធារណ: ដោយអនុវត្តតាមគោលនយោបាយ ភូមិ ឃុំ មានសុវត្ថិភាព ដែលជាសេចក្តីប៉ងប្រាថ្នារបស់ប្រមុខរាជរដ្ឋាភិបាលកម្ពុជា និងការរស់នៅរបស់ប្រជាពលរដ្ឋប្រកបដោយភាពសុខសាន្ត ក្រោមដំបូលសន្តិភាព។ ហេីយក៏ត្រូវ ដឹកនាំមន្ត្រីគ្រប់ផ្នែកគ្រប់ជាន់ថ្នាក់ ខិតខំ
រួមគ្នាបម្រេីសេវាសាធារណ: ជូនប្រជាពលរដ្ឋឲ្យបានជាទីគាប់ប្រសេីរឡេីង នេះជាការថ្លែងរបស់ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម ក្នុងពិធីប្រកាសចូលកាន់តំណែងអភិបាលនៃគណៈអភិបាលស្រុកបាធាយ នារសៀលថ្ងៃទី១ ខែមីនា ឆ្នាំ២០១៩ ដោយមានការអញ្ជើញចូលរួមពីឯកឧត្តម ខ្លូត ផន ប្រធានក្រុមព្រឹក្សាខេត្ត លោក លោកស្រី អភិបាលរងខេត្ត មន្ទីរ អង្គភាពពាក់ព័ន្ធជុំវិញខេត្ត និងមន្ត្រីការិយាល័យជុំវិញស្រុក មេឃុំ មេភូមិ ជាច្រើនរូបផងដែរ។
ថ្លែងក្នុងពិធីនោះដែរ ឯកឧត្ដម គួច ចំរើន អភិបាលខេត្តកំពង់ចាម បានលេីកឡើងថា ចំពោះភូមិសាស្ត្រក្នុងស្រុកបាធាយនេះ បញ្ហាគ្រោះធម្មជាតិតែងតែកេីតឡើងជាញឹកញាប់ ក្នុងនោះមានដូចជា គ្រោះទឹកជំនន់ ខ្យល់ព្យុះកន្ត្រាក់ និងគ្រោះរាំងស្ងួតជាដើម ដូច្នេះអភិបាលស្រុកថ្មី ត្រូវទទួលរ៉ាប់រងលើបញ្ហាទាំងអស់នេះដោយមិនអាចខ្វះចន្លោះបាន។ ពាក់ព័ន្ធនឹងគ្រោះរាំងស្ងួត ដែលនឹងកេីតមានឡើងនារដូវប្រាំងក្នុងឆ្នាំនេះ អាជ្ញាធរយើងត្រូវចូលរួមក្នុងការខិតខំពង្រីកសេវា តបណ្ដាញទឹកជូនប្រជាពលរដ្ឋយេីងបានប្រេីប្រាស់ផងដែរ។ 
ឯកឧត្ដមអភិបាលខេត្ត បានបន្តថា ជាមួយនឹងការខិតខំបំពេញតួនាទី បម្រេីសេវាសាធារណ: ជូនបងប្អូនប្រជាពលរដ្ឋឲ្យកាន់តែល្អប្រសេីរឡេីងហើយនោះ ក្នុងនាមជាអាជ្ញាធរ ត្រូវខិតខំថែរក្សាអ្វីដែលនៅសេសសល់ គឺត្រូវចូលរួមការពារទ្រព្យសម្បត្តិធម្មជាតិ ដូចជា បឹងបួរ ទំបន់ទឹក មេទឹក ជាដេីម ទុកសម្រាប់បងប្អូនប្រជាពលរដ្ឋ ប្រេីប្រាស់ក្នុងការអាស្រ័យផលធ្វេីស្រែចំការផងដែរ។ 
ជាមួយគ្នានោះ ឯកឧត្ដមអភិបាលខេត្ត ក៏បានអំពាវនាវដល់បងប្អូនប្រជាពលរដ្ឋ កុំបន្តសាងសង់ សំណង់អគារ លំនៅឋាន តាមចិញ្ចើមថ្នល់ ឬក្រោមខ្សែបណ្តាញអគ្គិសនី ជាដើមព្រោះអាចមានគ្រោះថ្នាក់ផ្សេងៗកេីតឡើងជាយថាហេតុ ណាមួយ។គួរបញ្ជាក់ផងដែរថា ពិធីប្រកាសចូលកាន់តំណែងនេះគឺ លោក ផេន សុផល ត្រូវផ្ទេរតំណែងពីអភិបាលស្រុកកោះសូទិន មកកាន់តំណែងជាអភិបាលស្រុកបាធាយវិញ ជំនួស លោក កៅ ប៊ុនណាត ដែលត្រូវចូលនិវត្តន៍៕
