កំពង់ចាម: កុំភ័យខ្លាចញញើតនឹងពាក្យបណ្ដឹងរបស់បងប្អូនប្រជាពលរដ្ឋ បេីប្រជាពលរដ្ឋរត់មកប្តឹងនៅប៉ុស្តិ៍រដ្ឋបាល មានន័យថាពលរដ្ឋទុកចិត្តយេីងហើយ ដូច្នេះយេីងត្រូវទទួលពាក្យបណ្ដឹងរបស់គាត់ ហើយត្រូវរកដំណោះស្រាយ សមស្របជូនគាត់ ធ្វើយ៉ាងណាបើបញ្ហាធំ ត្រូវសម្របសម្រួល ឲ្យក្លាយទៅជាបញ្ហាតូច រឹតតែល្អប្រសើរ នេះជាការថ្លែងរបស់ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម ក្នុងពិធីបិទអង្គសន្និបាតបូកសរុបសភាពការណ៍ កិច្ចប្រតិបត្តិការរក្សាសន្តិសុខ សណ្ដាប់ធ្នាប់សង្គម ប្រចាំឆ្នាំ២០១៨ និងទិសដៅការងារឆ្នាំ២០១៩ របស់ស្នងការដ្ឋាននគរបាលខេត្តកំពង់ចាម និងផ្សព្វផ្សាយទិសដៅការងារ ឆ្នាំ២០១៩ របស់អគ្គស្នងការដ្ឋាននគរបាលជាតិ នារសៀលថ្ងៃទី៦ ខែមីនា ឆ្នាំ២០១៩ នៅស្នងការរដ្ឋាននគរបាលខេត្តកំពង់ចាម ដោយមានការអញ្ជើញចូលរួមពី លោកឧត្តមសេនីយ៍ឯក សេក ភូមី អគ្គស្នងការរងនគរបាលជាតិ តំណាងឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងលោក លោកស្រី ប្រធានមន្ទីរ អង្គភាព ពាក់ព័ន្ធ ជាច្រើនរូបផងដែរ។
ថ្លែងក្នុងពិធីនោះដែរ ឯកឧត្ដម គួច ចំរើន អភិបាលខេត្តកំពង់ចាម បានជំរុញដល់មន្ត្រីនគរបាលនៅតាមមូលដ្ឋាន ត្រូវជួយធ្វើការផ្សព្វផ្សាយ ឲ្យបងប្អូនប្រជាពលរដ្ឋ មានការប្រុងប្រយ័ត្នខ្ពស់គ្រប់ពេលវេលា ព្រោះនេះជារដូវរាំងស្ងួត ងាយរងគ្រោះដោយអគ្គីភ័យឆាបឆេះណាស់ ដូច្នេះត្រូវត្រៀមបំពង់ ឬសម្ភារៈ ពន្លត់អគ្គីភ័យជាបឋម ទុកសម្រាប់ការពារ ក្រែងមានគ្រោះអគ្គីភ័យកេីតឡើង ទំរាំឡានទឹកមកដល់ យេីងអាចទប់ស្កាត់បានមួយកំរិតដែរ។ ដោយឡែកបញ្ហាជំងឺឆ្កែឆ្កួត ឯកឧត្ដមអភិបាលខេត្ត បានលើកឡើងថា វាអាចពាក់ព័ន្ធនឹងអាកាសធាតុក្ដៅផងដែរ ដូច្នោះមន្ត្រីនគរបាលនៅតាមមូលដ្ឋាន ត្រូវជួយធ្វើការផ្សព្វផ្សាយ ឲ្យបងប្អូនប្រជាពលរដ្ឋណាមួយ ដែលត្រូវឆ្កែឬឆ្មារខាំ អាចទៅទទួលការចាក់វ៉ាក់សាំង ការពារជំងឺឆ្កែឆ្កួត នៅមជ្ឈមណ្ឌលចាក់ថ្នាំបង្ការជំងឺឆ្កែឆ្កួតខេត្តកំពង់ចាម ចាប់បើកនៅថ្ងៃទី៧ ខែមីនា ឆ្នាំ២០១៩នេះ តទៅ ស្ថិតក្នុងមន្ទីរពេទ្យខេត្តកំពង់ចាម។
ជាមួយគ្នានោះដែរ ឯកឧត្ដមអភិបាលខេត្ត ក៏បានកោតសរសេីរចំពោះស្នងការនគរបាលខេត្តកំពង់ចាម ដែលបានដឹកនាំកងកម្លាំង ក្នុងការបម្រើសេវាសាធារណៈជូនប្រជាពលរដ្ឋ និងការងារការពារសន្តិសុខ សណ្តាប់ធ្នាប់សាធារណៈសង្គមបានយ៉ាងល្អប្រសេីរ ជូនប្រជាពលរដ្ឋ នាពេលកន្លងមក។ ហេីយកុំភ័យខ្លាចញញើតនឹងពាក្យបណ្ដឹងរបស់បងប្អូនប្រជាពលរដ្ឋ បេីប្រជាពលរដ្ឋរត់មកប្តឹងនៅប៉ុស្តិ៍រដ្ឋបាល មានន័យថាពលរដ្ឋទុកចិត្តយេីងហើយ ដូច្នេះយេីងត្រូវទទួលពាក្យបណ្ដឹងរបស់គាត់ ហើយត្រូវរកដំណោះស្រាយ សមស្របជូនគាត់ ធ្វើយ៉ាងណាបើបញ្ហាធំ ត្រូវសម្របសម្រួល ឲ្យក្លាយទៅជាបញ្ហាតូច រឹតតែល្អប្រសើរ ពោលគឺត្រូវទទួលពាក្យបណ្ដឹង របស់ប្រជាពលរដ្ឋ ចៀសវាង ត្រូវពលរដ្ឋប្តឹងបកមកយើងវិញ ព្រោះតែមិនទទួលពាក្យបណ្ដឹងផងដែរ ៕