កំពង់ចាម៖ ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម បានអនុញ្ញាត្តិឲ្យ គណ:ប្រតិភូកងរាជអាវុធហត្ថលេីផ្ទៃប្រទេសដឹកនាំដោយ លោកឧត្ដមសេនីយ៍ឯក ប្រាក់ សិទ្ធិ និង គណ:ប្រតិភូកងរាជអាវុធហត្ថប្រទេសបារាំង លោក វរសេនីយ៍ឯក វុំាងសង់ វ៉ង់នែប ចូលជួបសំណេះសំណាល សម្តែងការគួរសម ដេីម្បីស្វែងយល់ពីការគ្រប់គ្រងការងារក្នុងខេត្តកំពង់ចាម ដែលពិធីនេះត្រូវបានធ្វើឡើងនាថ្ងៃទី១៩ ខែមិនា ឆ្នាំ២០១៩ នៅសាលាខេត្តកំពង់ចាម។
ក្នុងកិច្ចជំនួបនេះ ឯកឧត្តម គួច ចំរើន អភិបាលខេត្តកំពង់ចាម បានថ្លែងថា ប្រជាពលរដ្ឋសរុប នៅក្នុងខេត្តកំពង់ចាម ប្រមាណជា១លាន១សែននាក់ ចំពោះបញ្ហាសន្តិសុខក្នុង រយៈពេល ២ ឆ្នាំចុងក្រោយនេះ មិនមានបទល្មើសអ្វីធ្ងន់ធ្ងរ គួរឲ្យកត់សម្គាល់នោះទេ ប៉ុន្តែស្ថានភាព បទល្មើសតែងតែ មានការវិវត្ត ជឿនលឿនទៅតាមបច្ចេកវិទ្យា ដូចជាការ ឆបោកតាមប្រព័ន្ធវេរលុយវីង និងការប្រើប្រាស់បណ្ដាញ សង្គមដើម្បីគំរាមគ្នាជាដើម ដែលទាំងនេះ គឺជាប្រភេទ បទល្មើសថ្មីៗ ត្រូវទាមទារ ឲ្យសមត្ថកិច្ចបង្កើន សមត្ថភាព លើចំណេះដឹង បច្ចេកវិទ្យា ទើបអាចឈាន ទៅធ្វើការបង្ក្រាបបាន។
ដោយឡែកចំពោះ ស្ថានភាពសេដ្ឋកិច្ច ឯកឧត្តមអភិបាលខេត្ត បានឲ្យដឹងថា រយៈពេលប៉ុន្មានឆ្នាំ ចុងក្រោយនេះ កម្រិត ជីវភាពរបស់ប្រជាពលរដ្ឋ មានការធូរធាច្រើន ពោលគឺសម្រាប់ប្រជាពលរដ្ឋក្នុងខេត្តកំពង់ចាម បើប្រៀបធៀប ជាមួយនឹងខេត្តផ្សេងៗ គឺអាចនិយាយបានថា ចាញ់តែទីក្រុងភ្នំពេញមួយទេ ពិសេសប្រភពកំណើន សេដ្ឋកិច្ចនៅក្នុង ខេត្តកំពង់ចាម គឺតាមរយៈកម្មករ ដែលបំរើ ការងារនៅតាម រោងចក្រទាំង១៤ នៅក្នុងខេត្តកំពង់ចាមផង ក៏ដូចជាចេញទៅ ធ្វើការនៅតាមបណ្ដា រាជធានីខេត្ដផ្សេងៗទៀត និងការចាកចេញ ទៅធ្វើការនៅ ក្រៅប្រទេស ក៏មានចំនួនច្រើនដែរ។
ជាក់ស្ដែងគិត ត្រឹមស្រុកជើងព្រៃមួយ រយៈពេល២ឆ្នាំចុងក្រោយនេះ មកដល់ ខែមីនា ឆ្នាំ២០១៩ មានកម្មករប្រមាណជា២៣០.០០នាក់ ដែលកំពុងធ្វើការនៅទីនោះ ដែលពួកគាត់ ទទួលបានប្រាក់ខែ ពីរោងចក្រក្នុង មួយខែ ប្រមាណជា ៥ លានដុល្លារ ហើយនៅ បណ្ដាស្រុកផ្សេងៗ ទៀតក៏មានអត្រា ប្រហាក់ប្រហែល គ្នានេះដែរ។
មួយផ្នែកទៀត បានមកពីការធ្វើកសិកម្ម ដែលជាប្រភពចំណូលដ៏ធំមួយដែរ នៅក្នុង ខេត្តកំពង់ចាម ដែលមានសក្កដានុពល ខាងដាំដុះ ទាំងដំណាំស្រូវ និងដំណាំផ្សេងៗទៀត ប៉ុន្តែឆ្នាំនេះតម្លៃស្រូវ និងតម្លៃស្វាយចន្ទី មានការស្រុតចុះបន្តិច ប៉ុន្តែឡើងថ្លៃ ដំណាំកៅស៊ូ ហើយទាំងនេះ គឺជាប្រភព សេដ្ឋកិច្ចធំៗ សម្រាប់ខេត្តកំពង់ចាម របស់យើង។ ចំណែកផ្នែកសេវាកម្ម ក៏មានប្រភពចំណូល គួរសមដែរ ប៉ុន្តែមិនអាចប្រៀប ទៅនឹងប្រភពចំណូល លើវិស័យទាំង ៣ ដូចខាងលើនោះទេ ដោយសារវិស័យ ផ្នែកសេវាកម្មនេះ គឺនៅមានលក្ខណៈតូចៗ នៅឡើយ ដែលខេត្តមិនទាន់ បានពង្រីកវិស័យនេះ ឲ្យបានធំដុំនៅឡើយ ។
