បន្ទាយមានជ័យះ កម្លាំងនគរបាលព្រហ្មទណ្ឌនៃស្នងការដ្ឋាននគរបាលខេត្តបន្ទាយមានជ័យកាលពីព្រឹកថ្ងៃទី០៣ ខែកក្កដាឆ្នាំ២០១៤បានធ្វើការចាប់បញ្ជូនខ្លួនបុគ្គលសង្ឃឃោរឃៅម្នាក់មកតុលាការខេត្តដើម្បីចាត់ការបន្តតាមនីតិវិធីច្បាប់ បន្ទាប់ពីប្រើហឹង្សារស្រោចទឹកក្តៅលើកូនសិស្ស
ប្រព្រឹត្តនៅក្នុងវត្តស្រះឈ្នួរមានជ័យស្ថិតក្នុងភូមិស្រះឈ្នួរស្រុកព្រះនេត្តព្រះ។ លោក កែវ ប៊ុនយឿត អធិការស្រុកព្រះនេត្រព្រះបានអោយដឹងថា ជនសង្ស័យមានឈ្មោះ ខាត់ សុខទី ភេទប្រុសអាយុ២១ឆ្នាំ ជាព្រះសង្ឃដែលគង់នៅវត្តព្រះឈ្នួរមានជ័យស្រុកព្រះនេត្រព្រះឃាត់ខ្លួនកាលពីព្រឹកថ្ងៃទី ០២ខែកក្កដាឆ្នាំ២០១៤ពីបទប្រើអំពើហឹង្សារដោយចេតនាលើកុមារឈ្មោះ តន រតនា ភេទប្រុសអាយុ ០៩ឆ្នាំជាកូនសិស្ស។ លោកបានបន្តអោយទៀតថា យោងតាមប្រភពពត័មានពីប្រជាពលរដ្ឋជាពុទ្ធបរិស័ទចំណុះជើងវត្តថាមានព្រះសង្ឃមួយអង្គបានធ្វើទារុណ្ឌកម្មលើកុមារជាកូនសិស្សស្នាក់នៅជាមួយក្នុងកុដិយ៉ាងព្រៃផ្សៃបំផុត ពេលនោះកម្លាំងលោកក៏បាននាំខ្លួនកុមារមកសួរនាំ។កុមារឈ្មោះ តន រតនាក៏បានរៀបរាប់នៅចំពោះមុខសមត្ថកិច្ចថា ខ្លួនមានទីលំនៅក្នុងខេត្តក្រចេះត្រូវបានព្រះសង្ឃខាងលើសុំយកមករស់នៅ
ជាមួយនិងបានសន្យាជាមួយឳពុកម្តាយថាអោយរៀនសូត្រតែមិនអោយរៀនសូត្រទេថែមទាំងធ្វើទារុណ្ឌកម្មដូចជាយកភ្លើងធូបមកអុជ បន្តក់ក្រមួនទៀនកំពុងឆេះលើខ្លួន យកខ្សែភ្លើងមកវាយឆក់និងខ្សែរភ្លើង យកប្រេងកូឡាដាក់ក្នុងមាត់ ភ្នែក យកស្ព្រាយបាញ់ចូលភ្នែក ហើយនៅថ្ងៃទី២៧ខែមិថុនាកន្លងមកនេះសង្ឃរូបនេះបានយកទឹកក្តៅមកស្រោចពីលើធ្វើអោយក្តៅក្រហល់ក្រហាយរលាកស្លោកពាស់ពេញរៀងកាយ។ បន្ទាប់ពីបានធ្វើការឃាត់ខ្លួន និងផ្សឹក អន្តិត ខាត់ សុខទី ក៏បានសារភាពថាខ្លួនពិតជាបានប្រព្រឹត្តដូច្នេះមែនព្រោះតែកុមារនេះមិនស្តាប់បង្គាប់។ បន្ទាប់ពីបានឃាត់ខ្លួននិងកសាងសំណុំរឿងអន្តឹតចិត្តព្រៃផ្សៃខាងត្រូវបានបញ្ជួនរួចហើយមកតុលាការនៅព្រឹកនេះ៕