ក្នុងជំនួបជាមួយហូឡង់នៅវគ្គ៤ក្រុមចុងក្រោយ ខ្សែប្រយុទ្ធ Sergio Aguero ត្រូវបានគេអះអាងថា នឹងអាចចូលលេងបានវិញក្នុងការប្រកួត World Cup វគ្គ semi-final ក្នុងជំនួបរវាងអាហ្សង់ទីនប៉ះហូឡង់បន្ទាប់ពីរូបគេជាពីរបួសសាច់ដុំ ។ ខ្សែប្រយុទ្ធក្លិបមេឃខៀវ Manchester City រូបនេះបានអវត្តមានសម្រាប់ការប្រកួត២លើកចុងក្រោយ ឲ្យអាហ្សង់ទីនដោយសាតែបញ្ហារបួសប៉ុន្តែរូបគេត្រូវបានរំពឹងថា នឹងអាចវិលមកជួយក្រុមបានវិញសម្រាប់ការប្រកួត នៅយប់ថ្ងៃពុធនេះបន្ទាប់ពីរូបគេបង្ហាញខ្លួននៅកន្លែងហ្វឹកហាត់ ។
វេជ្ជបណ្ឌិតប្រចាំក្រុមអាហ្សង់ទីនលោក Daniel Martinez ប្រាប់អ្នកសារព័ត៌មានថា “Sergio ត្រៀមខ្លួនរួចរាល់ ដើម្បីចូលលេងវិញ” ។ គួរបញ្ជាក់ថា នេះជាដំណឹងល្អមួយសម្រាប់អាហ្សង់ទីនចំពោះការវិលមកវិញរបស់ Aguero ប៉ុន្តែពួកគេ ក៏មានដំណឹងអាក្រក់មួយផងដែរ គឺកីឡាករ Angel di Maria នឹងត្រូវខកខានមិនបានចូលលេងបន្ទាប់ពីរូបគេ បានរងរបួសក្នុងការប្រកូតដែលអាហ្សង់ទីនយកឈ្នះប៊ែលហ្ស៊ិក១-០ក្នុងវគ្គ៨ក្រុមចុងក្រោយកាលពីយប់ថ្ងៃសៅរ៍ ៕
