ឧត្តរមានជ័យៈ ជនសង្ស័យម្នាក់ឈ្មោះ ពិន រ៉ានី ភេទប្រុស អាយុ២៤ឆ្នាំ រស់នៅភូមិទំនប់អភិវឌ្ឃន៍ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ ត្រូវបានចាប់ខ្លួនកាលពីល្ងាចថ្ងៃទី ១១ ខែកក្កដា ឆ្នាំ២០១៤ ក្នុងករណីប្រើអំពើហឹង្សាដោយចេតនា គប់គ្រាប់បែកបណ្តាលអោយ
ជនរងគ្រោះម្នាក់បាត់បង់ជីវិតស្ថិតក្នុងភូមិឃុំខាងលើ កាលពីថ្ងៃទី១៤ ខែកក្កដា ឆ្នាំ២០១២ ហើយបានរត់គេចខ្លួនបាត់ស្រមោល ។ ដោយមានការចង្អុលបង្ហាញពីឯកឧត្តម ម៉ែន លី ស្នងការនគរបាលខេត្តឧត្តរមានជ័យ ទើបលោក ប៊ី ប៉េងងន់ អធិការនគរបាលស្រុកត្រពាំងប្រាសាទ ដឹកនាំកម្លាំងចុះប្រតិបត្តការណ៍ចាប់ខ្លួនជនបង្ករឈ្មោះ ពិន រ៉ានី និងធ្វើកំណត់ហេតុបញ្ជូនទៅស្នងការនគរបាលខេត្តដើម្បីចាត់វិធានការណ៍តាមនិតិវិធីច្បាប់ ។
បើតាមកម្លាំងនគរបាលដែលបានចុះបង្ក្រាបដល់កន្លែងហេតុការណ៍បានអោយដឹងថា កម្លាំងអធិការដ្ឋាននគរបាលស្រុកត្រពាំឈងប្រាសាទ បានសហការណ៍ជាមួយកម្លាំងប្រជាការពារភូមិទំនប់អភិវឌ្ឍន៍ចុះតាមចាប់ខ្លួនតាំងពីព្រឹកមកម្លេះ ដោយជនបង្ករខាងលើបានតដៃជាមួយក្រុមកម្លាំងសមត្ថកិច្ច និងបានរើបំរះរួចរត់គេចខ្លួនចូលសម្ងំក្នុងព្រៃបាត់ស្រមោល ។
ដោយមានការយកចិត្តទុកដាក់ពីកម្លាំងសមត្ថកិច្ចនគរបាលនិងកម្លាំងប្រជាការពារភូមិធ្វើការឡោមព័ទ្ធរុករករហូតដល់រសៀលថ្ងៃដដែលទើបចាប់ជនបង្ករខាងលើបាននិងនាំខ្លួនទៅកាន់អធិការដ្ឋាននគរបាលស្រុកត្រពាំងប្រាសាទ ។ គួបញ្ជាក់ផងដែរ ដោយតាមសម្តីប្រជាពលរដ្ឋដែលស្គាល់ប្រវត្តិជនបង្ករឈ្មោះ ពិន រ៉ានី នេះគឺគេធ្លាប់បានបង្ករអំពើហឹង្សារដោយចេតនាទៅលើប្រជាពលរដ្ឋជាច្រើនលើករួចមកហើយ ។ រហូតដល់ឃើញជនបង្ករនេះត្រឡប់មកផ្ទះវិញ ក៍បានរាយការណ៍ជូនសមត្ថិកិច្ចតែម្តង ហើយពេលនេះបានឃើញជននេះត្រូវចាប់ខ្លួន ពួកគាត់សប្បាយចិត្តខ្លាំងណាស់ ៕