រយៈពេលជាង១សប្តាហ៍ នៃការចុះយុទ្ធនាការរឹតបណ្តឹងច្បាប់ចរាចរណ៍ផ្លូវគោក នៅចំណុចភូមិបឹងស្នាយ សង្កាត់សំបូរមាស ក្រុង-ខេត្តកំពង់ចាម សមត្ថកិច្ចបានរកឃើញមនុស្សចំនួន1285នាក់ បានជាប់ពាក់ពន្ធ័និងករណីល្មើសច្បាប់ចរាចរណ៍ ដោយក្នុងនោះមានករណីមិន
ពាក់មួកសុវត្ថិភាព បើកបរក្រោមឥទ្ធិពលនៃគ្រឿងស្រវឹង ម៉ូតូមិនដាក់កញ្ចក់ឆ្លុះ អ្នកបើករថយន្តមិនពាក់ខ្សែក្រវ៉ាត់ និងរថយន្តមិនបំពាក់នូវបច្ចេកទេសត្រឹមត្រូវជាដើម។
គិតចាប់ពីថ្ងៃទី១រហូតដល់ថ្ងៃទី១០ខែកក្តដានេះ កម្លាំងសមត្ថកិច្ចប្រមាណ៥០នាក់ បានឈរពង្រាយនៅតាមគោលដៅរបស់ខ្លួន ដែលស្ថិតនៅក្នុងតំបន់ខាងលើ ដើម្បីធ្វើការអប់រំនិងផាកពិន័យចំពោះយានយន្តទាំងឡាយណា ដែលខុសលក្ខណៈបច្ចេកទេស និងមិនគោរពច្បាប់ចរាចរណ៍។ ថ្លែងនៅក្នុងកិច្ចប្រជុំជាមួយនិងមន្ត្រីរដ្ឋាភិបាល អង្គការសង្គមស៊ីវិល បណ្តាអ្នកសារព័ត៌មានជាតិ និងអន្តរជាតិ ដែលបានធ្វើឡើងនៅទីស្នាក់ការសាលាខេត្តកំពង់ចាម កាលពីព្រឹកថ្ងៃសុក្រ លោកជុំ ថានី ស្នងការរងខេត្តកំពង់ចាមបានធ្វើសេចក្តីរាយការណ៍ថា គិតចាប់ពីថ្ងៃទី១ដល់ថ្ងៃទី១០ ខែកក្តដា ឆ្នាំ២០១៤នេះ សមត្ថកិច្ចបានចុះអនុវត្តនូវការរឹតបណ្តឹងច្បាប់ចរាចរណ៍ ខណៈដែលការមិនពាក់មួកសុវត្ថិភាព និងមិនដាក់កញ្ចក់នៅមានអត្រាខ្ពស់ ដែលជាហេតុបង្កឲ្យមានករណីរងរបួសនិងស្លាប់នៅមានកម្រិតខ្ពស់ផងដែរ។
លោកបញ្ជាក់ថា ក្នុងរយៈពេល១០ថ្ងៃនៃការចុះរឹតបណ្តឹងច្បាប់ចរាចរណ៍នេះ សមត្ថកិច្ចបានចុះអប់រំមនុស្សបានចំនួន១២៨៥នាក់ ក្នុងនោះអ្នកមិនពាក់មួកមាន៣១២នាក់ ម៉ូតូដែលមិនដាក់កញ្ចក់មាន៤២៩គ្រឿង អ្នកមិនពាក់ខ្សែក្រវ៉ាត់ចំនួន៤១២នាក់…។ លោកបន្តថា៖«នៅក្នុងបទល្មើសនេះ យើងបានធ្វើការពិន័យជាទឹកប្រាក់បានចំនួន៥៦០១០០០រៀល»។ ជាមួយគ្នានេះបើតាមលោកជឹម លាវ អភិបាលរងខេត្តកំពង់ចាមបានមានប្រសាសន៍ថា ការរិតបណ្តឹងច្បាប់ចរាចរណ៍គឺអាចធ្វើទៅបាននៅក្នុងក្រុង និងតាមតំបន់ទីប្រជុំជននៅក្នុងខេត្តកំពង់ចាមនេះ ដោយសារតែអ្នករស់នៅក្នុងក្រុងមានការយល់ដឹងច្រើនជាងអ្នករស់នៅកន្លែងដាច់ស្រយាលឆ្ងាយៗ ពិសេសគឺប្រជាកសិករតែម្តង។ លោកបញ្ជាក់ថា៖«ប្រជាកសិករតែងគិតថា មួកសុវត្ថិភាពដែលមានតម្លៃពី១០ទៅ២០ដុល្លាគឺថ្លៃណាស់ ដែលធ្វើឲ្យពួកគាត់មិនហ៊ានចំណាយលុយទិញយកមកប្រើប្រាស់ទេ ដូច្នេះការពាក់មួកនៅមានកម្រិតតិចនៅឡើយសម្រាប់ខេត្តកំពង់ចាមនេះ»។
ស្របពេលជាមួយគ្នាផងដែរ លោកជឹម លាវក៏បានទទួលស្គាល់ថា ការអប់រំផ្សព្វផ្សាយអំពីសុវត្ថិភាពចរាចរណ៍ នៅមិនទាន់មានកម្រិតខ្ពស់នៅឡើយទេ សម្រាប់ប្រជាកសិករនៅក្នុងខេត្តកំពង់ចាម ដោយសារតែពួកគេមិនមានពេលវេលាគ្រប់គ្រាន់មកចូលរួមក្នុងកម្មវិធីនេះ ដែលភាគច្រើនពួកគេតែងយល់ឃើញថា ការធ្វើស្រែចំការប្រកបរបរចិញ្ចឹមជីវិត គឺជារឿងសំខាន់ដែលមិនអាចខកខានបាន ដូច្នេះនេះគឺជាឧបសគ្គដែលអាជ្ញាធរកំពុងស្វែងរកគន្លឹះវិធីផ្សេងៗទៀត ដើម្បីជម្រុញដល់ក្រុមគោលដៅទាំងនេះ។
ពាក់ពន្ធ័និងករណីមួកសុវត្ថិភាពមានតម្លៃថ្លៃ ជាហេតុធ្វើឲ្យប្រជាកសិករនៅខេត្តកំពង់ចាម មិនហ៊ានទិញយកមកប្រើប្រាស់ ត្រូវបានលោកសៅ សុវណ្ណរតនៈ មន្ត្រីអង្គការសុខភាពពិភពលោក(WHO)ពន្យល់ថា ប្រជាពលរដ្ឋនៅតាមជនបទ មិនបានគិតទៅលើអត្ថប្រយោជន៍នៃការពាក់មួកសុវត្ថិភាពទេ ខណៈពេលកើតមានគ្រោះថ្នាក់ចរាចរពេលកំពុងធ្វើដំណើរ នោះការចំណាយថវិការច្បាស់ជាច្រើនជាងមុនមិនខាន។ លោកបន្តថា ៖«មួកសុវត្ថិភាពអាចការពារការរងរបួសក្បាល ដូច្នេះហើយទើបកន្លងមកនេះអង្គការ WHO បានសហការជាមួយនិងគណៈកម្មាធិការជាតិដើម្បីចែកជូនមួកសុវត្ថិភាពដោយមិនគិតថ្លៃស្ទើរគ្រប់កន្លែងនៅទូទាំងប្រទេស ដើម្បីកាត់បន្ថយការស្លាប់និងរងរបួសដោយការ ប៉ះទង្គិចក្បាល»៕ អត្ថបទដោយៈ កញ្ញា រ៉ូ ដូណា