បន្ទាយមានជ័យ៖ ការជំរុញកែទម្រង់ដីធ្លីទៅបានវាមិនត្រឹមតែពាក់ពន្ធ័និងសមត្ថកិច្ចជំនាញនោះទេ គឺវាមានការពាក់ពន្ធ័ច្រើនទៅនឹងក្រសួងស្ថាប័ន អាជ្ញាធរគ្រប់ថ្នាក់និងប្រជាពលរដ្ឋ ហើយការជោគជ័យឬបរាជ័យ អាស្រ័យលើការចូលរួមគាំទ្រពីគ្រប់មជ្ឍដ្ឋាន ក្នុងការយល់អំពីច្បាប់
និងគោលនយោបាយ ពាក់ពន្ធ័និងវិស័យដីធ្លីរបស់មន្ត្រីអនុវត្តដីធ្លីនិងប្រជាពលរដ្ឋ។នេះជាការលើកឡើងរបស់លោក លី សារី ប្រធានមន្ទីររៀបចំដែនដី នគរូបនីយកម្មសំណង់និង សុរិយោដីខេត្តបន្ទាយមានជ័យក្នុងវគ្គបំប៉នពីច្បាប់និងវិស័យដីធ្លីដល់មេភូមិ ប្រធានសហគមន៍និងប្រជាពលរដ្ឋមកពីស្រុកថ្មពួករយ:ពេល២ថ្ងៃ ពីថ្ងៃទី ១៤-១៦ ខែកក្ដដា ឆ្នាំ២០១៤។
លោក ឌៀប ឈួន អភិបាលស្រុកថ្មពួកលើកឡើងថា: ដោយក្នុងភូមិសាស្ត្រស្រុក មានដីច្រើនប្រភេទ ដីលំនៅដ្ឋាន ដីកសិកម្ម ដីតំបន់អភិរក្សប្រាទបុរាណ រម្មណីដ្ឋានធម្មជាតិបន្ទាយឆ្មារ និងតំបន់ការពារព្រៃសហគមន៍ ហើយតែងកើតមានទំនាស់ជាញិកញាប់។ វគ្គបំប៉នពីច្បាប់និងវិស័យដីធ្លីដល់មេភូមិប្រធានសហគមន៍និងប្រជាពលរដ្ឋនៅស្រុកថ្មពួករយះពេល ២ថ្ងៃនៅពេលនេះ មេភូមិប្រធានសហគមន៍និងប្រជាពលរដ្ឋ ពិតជាបានយល់ច្បាស់ពីនិតិវិធី ក្នុងការជំរុញកែទម្រង់ដីធ្លីអោទទួលបានជោគជ័យ។
លោក លី សារី ប្រធានមន្ទីររៀបចំដែនដី នគរូបនីយកម្មសំណង់ និង សុរិយោដីខេត្តបន្ទាយមាន ជ័យមានប្រសាសន៍ថា: បញ្ហាដីធ្លី ជាបញ្ហាមួយដែលមានការពាក់ពន្ធ័និងការអភិវឌ្ឍន៍ សេដ្ឋកិច្ចសង្គមនិងការកាត់បន្ថយភាពក្រីក្ររបស់ប្រជាពលរដ្ឋ។ហេតុនេះរាជរដ្ឋាភិបាលក្រោមការដឹកនាំរបស់សម្តេចតេជោ ហ៊ុន សែនបានប្តេជ្ញាចិត្តឥតរាថយជំរុញការកែទម្រង់ដីធ្លីផ្តោតលើការពង្រឹងការគ្រប់គ្រងការរៀបចំ ការប្រើប្រាស់ ការបែងចែកដីធ្លីដើម្បីរួមចំណែកធ្វើអោយសម្រេចគោលដៅជាតិក្នុងការកាត់បន្ថយភាពក្រីក្រការធានាសន្តិសុខស្បៀងការការពារបរិស្ថាននិងធនធានធម្មជាតិនិងការអភិវឌ្ឍន៍សង្គមសេដ្ឋកិច្ច នៃសេដ្ឋកិច្ចទីផ្សារ។
ដូច្នេះការអប់រំផ្សព្វផ្សាយដែលក្រសួងរៀបចំដែនដី គឺជាការចាំបាច់មួយដើម្បីអោយមន្ត្រីអនុវត្តច្បាប់ក៏ដូចជាប្រជាពលរដ្ឋបានយល់ដឹងអំពីច្បាប់និងគោលនយោបាយរបស់រដ្ឋអោយមានលទ្ធភាពចូលរួមអនុវត្តច្បាប់និងគោលនយោបាយប្រកបដោយប្រសិទ្ធិភាពរួមចំណែកក្នុងការជំរុញអនុវត្តការកែទម្រង់ដីធ្លីរបស់រដ្ឋាភិបាល។ លោក លី សារី បន្ថែមថា: ពេលគ្រប់មជ្ឍដ្ឋានបានយល់ដឹងពីច្បាប់និងគោលនយោបាយនោះបាតុភាពអសកម្មក្នុងសង្គមនិងថយចុះដូចជាបាតុភាពរំលោភលើកម្មសិទ្ធិឯកជននិងសិទ្ធិស្របច្បាប់ផ្សេងទៀតលើដីធ្លីរបស់ពលរដ្ឋ
បាតុភាពចូលកាន់កាប់និងទន្ទ្រានដីរបស់រដ្ឋ (ដីព្រៃ ដីចំណីផ្លូវ ដីឆ្នេរ ដីក្នុងការពារនានា…) ចាំបាច់ត្រូវពង្រឹងអនុវត្តច្បាប់គ្រប់ជ្រុងជ្រោយដោយអនុវត្តអោយបានព្រមគ្នា ទាំងវិធានការរដ្ឋបាល វិធានការអប់រំនិងវិធានការច្បាប់។ សូមបញ្ជាក់ថា: វគ្គបំប៉ន់នេះសិក្ខាកាមត្រូវសិក្សាលើមេរៀនចំនួន៦គឺ កម្មសិទ្ទិលើអចលនវត្ថុ ភោគះនិងលទ្ធកម្ម សិទ្ធិតាមរយះភោគះ សម្បទានដី ការគ្រប់គ្រងដីរដ្ឋ ការដោះស្រាយទំនាស់ដីធ្លីរបស់គណះកម្មារសុរិយោដី ៕ដោយ:ឃិន គន្ធា