អ្នកនាំពាក្យប៉ូលិសម្នាក់អះអាងថា មនុស្ស៥នាក់បានត្រូវស្លាប់ ហើយ១២នាក់ទៀតត្រូវរបួស កាលពីថ្ងៃទី១៧ កុម្ភៈ ក្នុងការផ្ទុះស៊ីទែនដាក់ឧស្ម័នប្រូផាន (Propane) មួយនៅភាគខាងជើងអុីស្រាអែល ។ អ្នកនាំពាក្យរូបនោះ លោក Mickey Rosenfeld ថ្លែងថា យើងនៅពុំទាន់ដឹងនៅឡើយទេថា តើការផ្ទុះនោះបណ្តាលមកពីការធ្លាយឧស្ម័នចេញពីស៊ីទែន ឬមកពីដាច់អគ្គិសនី ។ ការផ្ទុះនោះកើតមានក្នុងអគារស្នាក់នៅមួយនៃ ទីក្រុង Acre ។ ប៉ូលិសកំពុងតែធ្វើការស៊ើបអង្កេតយ៉ាងល្អិតល្អន់ ។
ក្នុងចំណោមមនុស្ស៥នាក់ ដែលស្លាប់ក្នុងការផ្ទុះនោះមានប្តីប្រពន្ធ២នាក់ ដែលប្តីអាយុ៤០ឆ្នាំ និងប្រពន្ធអាយុ៣៥ឆ្នាំ ព្រមទាំងកូនប្រុសម្នាក់របស់ពួកគេអាយុ៨ឆ្នាំ ។ ជនរងគ្រោះ២នាក់ទៀតជាបុរសម្នាក់ និងនារីម្នាក់ដែលមានអាយុប្រមាណជា៥០ឆ្នាំដូចគ្នា ៕ 
