ភ្នំពេញ ៖ ឯកអគ្គរដ្ឋទូតវៀតណាម ប្រចាំនៅកម្ពុជា បានដើរតួនាទីយ៉ាងសំខាន់ ក្នុងការ សម្រប សម្រួល និងបានជំរុញ ឲ្យអ្នកវិនិយោគទុនវៀតណាម មកបណ្ដាក់ទុករកស៊ីនៅប្រទេសកម្ពុជា កាន់តែច្រើនឡើងពីមួយថ្ងៃទៅមួយថ្ងៃ ទៅលើវិស័យ ពាណិជ្ជកម្ម កសិកម្ម ឧស្សាហកម្ម ទេសចរណ៍ និងវប្បធម៌ នេះដោយសារចំណងមិត្ដភាព សាមគ្គីភាព និងកិច្ច សហប្រតិបត្ដិការ លើវិស័យនយោបាយរវាងប្រទេសទាំងពីរដ៍ល្អជាមួយគ្នា នេះបើតាមការ បញ្ជាក់ឲ្យដឹងពី លោកស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ច ក្នុងឪកាសទទួលជូបសម្ដែងការគូរសម ជាមួយលោកង៉ូអាញ់ហ្ស៊ុង (Ngo Anh Dzong ) ឯកអគ្គរដ្ឋទូតសាធារណរដ្ឋសង្គមនិយមវៀតណាម បញ្ចាប់អាណត្ដិបេសកកម្មការទូតនៅកម្ពុជា កាលព្រឹកថ្ងៃទី ១៦ ខែកក្កដា ឆ្នាំ២០១៤ នៅទីស្ដីការក្រសួង ។
លោកស្រីម៉ែន សំអន បានសម្តែងនូវការសាទរចំពោះភាពរីកចម្រើន របស់ប្រទេស វៀតណាម ក្នុងការអភិវឌ្ឍ ហេដ្ឋាចនាសម្ព័ន្ធ និងការទូត ជាមួយបណ្ដាប្រទេស ជិតខាង បានល្អ ។ ប្រទេសវៀតណាម ក៍ដូចជាប្រជាជនវៀតណាមតែងតែ សហប្រតិបត្តិការជាមួយកម្ពុជា បានល្អលើគ្រប់វិស័យ ។ នេះជាជោគជ័យដ៏ធំធេងក្នុងការអភិវឌ្ឍ សេដ្ឋកិច្ច ពាណិជ្ជកម្ម កសិកម្ម ឧស្សាហកម្ម ទេសចរណ៍ និងវប្បធម៌ ជាមួយគ្នាបានល្អ។ការទំនាក់ទំនងជាមួយគ្នាដ៍ល្អនេះហើយដែលធ្វើឲ្យអ្នកវិនិយោគទុនវៀតណាម មានទំនុកចិត្ដបានមក បណ្ដាក់ទុនរកស៊ីនៅកម្ពុជាពីមួយថ្ងៃទៅមួយថ្ងៃកាន់តែច្រើនឡើង ឥតឈប់ឈរ ។
លោកស្រីក៏បានអគុណចំពោះប្រតិភូនៃសាធារណរដ្ឋសង្គមនិយមវៀតណាម ដែល បានមកបំពេញភារកិច្ចការទូតនៅកម្ពុជាដ៍ល្អជាមួយគ្នាអស់រយៈពេល៣ឆ្នាំមកនេះ ដើម្បីពង្រឹងពង្រីកចំណងសាមគ្គីភាពនិង កិច្ចសហប្រតិបត្តិការរវាងប្រជាជន នៃប្រទេសទាំងពីរក្នុងការទំនាក់ទំនងគ្រប់វិស័យក៏ដូចការវិនិយោគ ក្នុងប្រទេសកម្ពុជាដែលផ្ដោតសំខាន់លើការងារកសិកម្មដំណាំកៅស៊ូ និងដំណាំស្រូវ និងបណ្តុះបណ្តាលធនធានមនុស្ស ការផ្លាស់ប្ដូរបទពិសោធន៍អធិការកិច្ច រវាងប្រទេសទាំងពីរបានល្អជាមួយគ្នា មិនតែប៉ុណ្ណោះប្រទេសវៀតណាម ក៍បានផ្ដល់ជំនួយឥតសំណង ជាច្រើនដល់កម្ពុជាផងដែរ ។
លោកស្រី ក៍បានសន្យា នឹងបន្តកិច្ចសហប្រតិបត្តិការល្អជាមួយឯកអគ្គរដ្ឋទូតថ្មី ដែលមកជំនួស។ លោក ង៉ូ អាញ់ ហ្ស៊ុង (Ngo Anh Dzong ) ក៏បានថ្លែងនូវការកោតសរសើរចំពោះភាពរីកចម្រើនរបស់កម្ពុជាដែលបាន និងកំពុងអភិវឌ្ឍន៍យ៉ាងឆាប់រហ័សធ្វើ ឲ្យប្រជាជន មានជីវភាពធូរធារ ពិសេសមានសុខ សន្តិភាព សណ្ដាប់ធ្នាប់ល្អ ។ នេះជាលើកចុងក្រោយហើយដែលលោកមានកិត្តិយសមកបំពេញភារកិច្ចនៅកម្ពុជា ហើយក៏សូមជម្រាបលាផងដែរ។ លើសពីនេះកម្ពុជាមានប្រមុខដឹកនាំឈ្លាសវៃ គឺសម្តេចអគ្គមហាសេនាបតី តេជោ ហ៊ុន សែនជានាយករដ្ឋមន្ត្រីតែម្តង ទើបកម្ពុជាមានការរីកចម្រើនបែបនេះ។
លោកបន្តថា៖វៀតណាម និងកម្ពុជា តែងតែមានទំនាក់ទំនងដ៍ល្អជាមួយគ្នាលើគ្រប់វិស័យហើយ លោកនឹងជំរុញឲ្យអ្នកវិនិយោគទុនវៀតណាម មកបណ្តាក់ទុនរកស៊ីនៅកម្ពុ ឲ្យកាន់តែច្រើនឡើងថែមទៀតលើគ្រប់វិស័យ ក្នុងនោះមាន វិស័យកសិកម្ម ឧស្សាហកម្ម ពាណជ្ជកម្ម វប្បធម៌ និងទេសចរណ៍ ត្រូវអនុវត្តមុនគេនិងជួយបន្តបណ្តុះបណ្តាលធនធានមនុស្សនៅកម្ពុជា។ ជាមួយគ្នានេះលោកស្រីម៉ែន សំអន ក៏បានបង្ហាញពីការគិតគូរ របស់រាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែនជានាយករដ្ឋមន្ត្រីចំពោះអ្នកវិនិយោគិន វៀតណាមក៏ដូចគ្រប់អ្នកវិយោគទាំងអស់ ក្នុងប្រទេសកម្ពុជា ដោយធានាផ្នែប្រព័ន្ធច្បាប់ និងសន្តិសុខ សុវត្ថិភាព ជូនដល់ពួកគេផងដែរ ៕ ដោយ៖ សំរិត