ភ្នំពេញ៖នគរបាលផ្នែកព្រហ្មខណ្ឌដង្កោកាលពីរសៀលថ្ងៃទី១៨ ខែកុម្ភៈឆ្នាំ២០១៤ បានដឹកបញ្ជូនជនសង្ស័យម្នាក់ទៅឃុំខ្លួនបណ្តោះអាសន្ននៅពន្ធនាគារព្រៃស ពាក់ព័ន្ធទៅនឹងករណីប៉ុនប៉ងរំលោភសេពសន្ថវៈលើអនីតិជនក្រោមអាយុ១៤ឆ្នាំ ។ ជនសង្ស័យមានឈ្មោះ សូ ឆានី ភេទប្រុស អាយុ១៨ឆ្នាំ ជាសិស្ស មានទីលំនៅភូមិត្រពាំងចក សង្កាត់ព្រៃវែង ខណ្ឌដង្កោ ។ ចំណែកជនរងគ្រោះឈ្មោះ ស៊ឹម ស្រីនិច ភេទស្រី អាយុ១៣ឆ្នាំ ជាសិស្ស បច្ចុប្បន្នរស់នៅជាមួយម្តាយក្នុងភូមិព្រៃសលិច សង្កាត់ព្រៃស ខណ្ឌដង្កោ រាជធានីភ្នំពេញ ។
មន្ត្រីនគរបាលព្រហ្មទណ្ឌខណ្ឌដង្កោប្រាប់ឲ្យដឹងថា ជនសង្ស័យ ឈ្មោះ សូ ឆានី ត្រូវបានដឹកបញ្ជូនទៅឃុំខ្លួនបណ្តោះអាសន្ននៅគុកព្រៃស នារសៀលថ្ងៃទី១៨កុម្ភៈ បន្ទាប់ពីទទួលបានដីកាបង្គាប់ឲ្យឃុំខ្លួនរបស់លោក សួស សំអាត ចៅក្រមស៊ើបសួរសាលាដំបូងរាជធានីភ្នំពេញ លេខ ៤៨២ ត.ព្រ ចុះថ្ងៃទី១៨ ខែកុម្ភៈ ឆ្នាំ២០១៤ តាមបញ្ញាតិមាត្រា លេខ ៤៣ ។
ប្រភពព័ត៌មានពីមន្ត្រីនគរបាលព្រហ្មទណ្ឌខណ្ឌដង្កោប្រាប់បន្តឲ្យដឹងថា កាលពីថ្ងៃទី១២ កុម្ភៈ ២១០៤ ជនសង្ស័យបានទូរស័ព្ទហៅជនរងគ្រោះប្រាប់រឿងចិញ្ចៀន ដែលជនសង្ស័យបានខ្ចីហើយធ្វើបាត់ ពេលដែលជនរងគ្រោះបានមកជួយហើយ ក៏ឌុបជនរងគ្រោះទៅតូបលក់ទឹកត្នោតជូរខាងត្បូងភូមិត្រពាំងចក សង្កាត់ព្រៃវែង ខណ្ឌដង្កោ ព្រមទាំងបានធ្វើសកម្មភាពចាប់អោប ថើប និងផ្តួលទៅលើដី រួចពោបពីលើជនរងគ្រោះ ដោយនិយាយសុំរួមភេទ ។
ប៉ុន្តែជនរងគ្រោះបានបដិសេធន៍ ហើយក៏ស្ទុះក្រោកឡើងឈរក្បែរម៉ូតូ និងបង្វរឲ្យជនសង្ស័យឌុបត្រឡប់ទៅផ្ទះវិញ។ លុះជនរងគ្រោះបានប្រាប់រឿងហេតុ ដែលជនសង្ស័យធ្វើសកម្មភាពប៉ុនប៉ងរំលោភសេពសន្ថវៈទៅម្តាយ ព្រមទាំងដាក់ពាក្យបណ្តឹង នៅប៉ុស្តិ៍នគរបាលរដ្ឋបាលព្រៃស ទើបនៅថ្ងៃទី១៥ ខែកុម្ភៈ កម្លាំងសមត្ថកិច្ចបានចុះទៅឃាត់ខ្លួន ជនសង្ស័យនៅចំណុចខាងមុខផ្ទះស្ថិតនៅភូមិត្រពាំងចក សង្កាត់ព្រៃវែង ខណ្ឌដង្កោ រួចនាំយកសាកសួរបន្តនៅអធិការដ្ឋាននគរបាលខណ្ឌដង្កោ ព្រមទាំងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីផ្តន្ទាទោសតាមច្បាប់។
ដោយឡែកជនសង្ស័យនៅចំពោះមុខសមត្ថកិច្ចបានឆ្លើយសារភាពថា កាលពីថ្ងៃទី១២ កុម្ភៈ វេលាម៉ោង២៣ នៅពេលដែលរូបគេបានចេញកន្លែងផឹកស៊ី រូបគេក៏បានទូរស័ព្ទទៅជន រងគ្រោះ ដើម្បីប្រាប់ពីរឿងចិញ្ចៀន ហើយជនរងគ្រោះបានចេញមកឈរចាំនៅមុខផ្ទះរបស់ នាង ពេលទៅដល់រូបគេបានប្រាប់ទៅជនរងគ្រោះថា ចិញ្ចៀន មិនទាន់បានលួសទេ នាងក៏សួរវិញថា ថ្ងៃណាបានឲ្យខ្ញុំវិញ? រូបគេប្រាប់ថា ចាំមើលមិត្តភក្រសងលុយសិន រូបគេនឹងលួសចិញ្ចៀនឲ្យវិញ។
ក្រោយមករូបគេក៏ បានបបួលនាង ជិះម៉ូតូដើរលេង ហើយនាងក៏យល់ព្រមឡើងម៉ូតូជិះទៅកន្លែងលក់ទឹកត្នោតជូរ ភូមិត្រពាំងចក សង្កាត់ព្រៃវែង ។ នៅពេលទៅដល់ទីនោះរូបគេបានធ្វើសកម្មភាព អោប ថើប ហើយផ្តួលទៅលើដី និងពោបពីលើនាង ប៉ុន្តែនាងបានរើបំរះរត់ចេញពីកន្លែងកើតហេតុ មកឈរក្បែរម៉ូតូ រួចនិយាយអង្វរឲ្យរូបគេជូនទៅផ្ទះវិញ ហើយរូបគេក៏បានជូននាងទៅផ្ទះវិញ រួចរូបគេក៏បានត្រឡប់ទៅរបស់គេវីញដេក រហូតដល់ថ្ងៃទី១៥ ខែកុម្ភៈ ក៏ត្រូវសមត្ថកិច្ចនាំខ្លួនមកធ្វើការសាកសួរនៅប៉ុស្តិ៍នគរបាលរដ្ឋបាលព្រៃសតែម្តង៕ 
