ខេត្តប៉ៃលិន ៖ សមត្ថកិច្ចកងរាជអាវុធហត្ថខេត្ត បានចុះបង្ក្រាប ព្រមទាំងឃាត់ខ្លួនមនុស្សប្រុសស្រី ចំនួន២នាក់ ពាក់ព័ន្ធករណីលេងល្បែងលក់កន្ទុយលេខ ក្រោមការដឹកនាំបញ្ជាផ្ទាល់ដោយ លោក ជុំ សែនសុទ្ធា ព្រះរាជអាជ្ញាអមសាលាដំបួងខេត្តប៉ៃលិន ។ ហេតុការណ៏ចុះឃាត់ខ្លួននេះ បានកើតឡើងកាលពីល្ងាច ថ្ងៃទី១៤ ខែកក្កដា ឆ្នាំ២០១៤ ស្ថិតក្នុងភូមិបរឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។ មេកន្ទុយលេខដែលសមត្ថកិច្ចឃាត់ខ្លួនឈ្មោះ គង់ (មិនស្គាល់ត្រគោល) ភេទប្រុស អាយុប្រហែល៤០ឆ្នាំ និងស្ត្រីម្នាក់ទៀត មិនស្គាល់ឈ្មោះ អាយុប្រហែល៣៥ឆ្នាំ ទាំង២នាក់រស់នៅភូមិ-សង្កាត់កើតហេតុខាងលើ ។
ប្រភពព័ត៌មានពីសាក្សីនៅកន្លែងកើតហេតុបានឱ្យដឹងថា កាលពីវេលាកើតហេតុខាងលើ គេឃើញមានសមត្ថកិច្ចកងរាជអាវុធហត្ថខេត្តប៉ៃលិន ជាច្រើននាក់ បានចុះទៅបង្ក្រាប និងឃាត់ខ្លួន មេកន្ទុយលេខចំនួន២នាក់ រួចនាំមកកាន់ទីបញ្ជាការដ្ឋានកងរាជអាវុធហត្ថខេត្ត ដើម្បីធ្វើការដោះស្រាយ តាមនិតិវិធី ។
ប្រភពពីប្រជាពលរដ្ឋរស់នៅក្នុងខេត្តប៉ៃលិន បានរិះគន់ថា បើសមត្ថកិច្ច ចាប់ជនសង្ស័យយកលុយ ហើយលែងបែបនេះ ជនល្មើសមិនព្រមរាងចាលនោះទេ នៅថ្ងៃខាងមុខនឹងប្រព្រឹត្តទង្វើបែប នេះបន្តទៀត ហើយម្យ៉ាងវិញទៀតល្បែងស៊ីសងគឺជាអំពើខុសច្បាប់ ហើយខុសនឹងច្បាប់ភូមិ-ឃុំមានសុវត្ថិភាព ទាំង៩ចំណុចរបស់រាជរដ្ឋាភិបាល ដែលសមត្ថកិច្ច ត្រួវតែបង្ក្រាបក្រុមញៀនល្បែងទាំងនេះឱ្យចាស់ដៃ ។
ពាក់ព័ន្ធករណីខាងលើលោក នង វណ្ណនី ប្រធានមន្ទីរស្រាវជ្រាវ និងយុត្តិធម៍ នៃទីបញ្ជាការដ្ឋានកងរាជអាវុធហត្ថខេត្តប៉ៃលិន បានប្រាប់អ្នកឆ្លើយឆ្លងព័ត៏មានកម្ពុជាថ្មី ថា៖ ការឃាត់ខ្លួន មេកន្ទុយលេខនេះ គឺយកមកអបរំ ព្រោះវាទើបជាលើកទី១ ,ចំណែកការសុំថតរូបមេកន្ទុយលេខ គឺលោកមិនអនុញ្ញតថតទេ នេះប្រហែលជាមានអាថ៌កំបាំងច្រើនជាងនេះ។
លោកបន្តថា៖ត្រួវសុំទៅព្រះរាជអាជ្ញាសិន ។ ចំពោះការសុំទៅព្រះរាជអាជ្ញាអមសាលាដំបូងខេត្ត អ្នកឆ្លើយឆ្លងព័ត៌មានបានទំនាក់ទំនងតាមទូរស័ព្ទទៅលោកជុំ សែនសទ្ធា ព្រះរាជអាជ្ញាអមសាលាដំបូងខេត្ត ប៉ុន្តែទូរស័ព្ទចូលមិនមានអ្នកលើក ។ សូមបញ្ជាក់ថា ល្បែងស៊ីសង បៀ អាប៉ោង កន្ទុយលេខឆ្នោត កំពុងតែដំណើរការយ៉ាង គគ្រឹកគគ្រេងនៅក្នុងខេត្តប៉ៃលិនទាំងមូល ដូច្នោះសមត្ថកិច្ចត្រួវតែមានវិធានការចាប់ពួកគេដាក់ទោសតាមនីតិវិធី ។
