កំពង់ចាម: បន្ទាប់ពីក្រសួងមហាផ្ទៃ បានចេញសេចក្តីណែនាំស្តីពីការផ្សព្វផ្សាយអំពីវិធានការបង្ការ ទប់ស្កាត់ការរាតត្បាតនៃជំងឺកូវីដ១៩ នៅរដ្ឋបាលថ្នាក់ក្រោមជាតិ នាព្រឹកថ្ងៃទី២០ ខែមិនា ឆ្នាំ២០២០នេះ ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានដឹកនាំកិច្ចប្រជុំជាបន្ទាន់ ដេីម្បីផ្សព្វផ្សាយនូវវិធានការចាំបាច់ និងដាក់ចេញនូវវិធានការនានា ក្នុងការប្រឆាំងទប់ស្កាត់ការរីករាលដាលនៃជំងឺកូវីដ១៩ ជូនដល់អ្នកពាក់ព័ន្ធ ដើម្បីអនុវត្តនៅក្នុងភូមិសាស្ត្រ ខេត្តកំពង់ចាម។
ថ្លែងក្នុងកិច្ចប្រជុំនោះ ឯកឧត្ដម អ៊ុន ចាន់ដា អភិបាលខេត្តកំពង់ចាម បានលើកឡើងថា ដើម្បីឆ្លើយតបទៅនឹងសេចក្ដីណែនាំ របស់ក្រសួងមហាផ្ទៃ យើងត្រូវបង្កើតនូវគណៈកម្មការប្រយុទ្ធនឹងជំងឺកូវីដ១៩ នៅថ្នាក់ខេត្ត ដែលមានប្រធាន អនុប្រធាន និងសមាជិកសរុប៥០នាក់ ដើម្បី ដឹកនាំមន្ត្រីក្នុងការទទួលព័ត៌មាននានា។ ដើម្បីចូលរួមអនុវត្តនូវវិធានការបង្ការទប់ស្កាត់ការឆ្លងរាលដាល នៃជម្ងឺកូវីដ១៩ ជាពិសេស កិច្ចការពារដល់សុខសុវត្ថិភាព របស់ប្រជាពលរដ្ឋផងនោះ សូមឲ្យមន្ទីរសុខាភិបាល ត្រូវចុះទៅពិនិត្យ និងចុះបាញ់ថ្នាំសម្លាប់មេរោគ ទៅលើទីតាំង ដែលជនជាតិម៉ាឡេស៊ីស្នាក់នៅនោះ ជាបន្ទាន់ ។ ត្រូវរៀបចំមន្ត្រីប្រចាំការ នៅតាមមណ្ឌលសុខភាព ដើម្បី ក្ដាប់បានព័ត៌មានផ្សេងៗ ពីប្រជាពលរដ្ឋ ដើម្បី រាយការណ៍ជូនខេត្ត ។ ដោយឡែក ឲ្យអាជ្ញាធរក្នុងមូលដ្ឋាន ត្រូវសហការជាមួយថ្នាក់ដឹកនាំសាសនា ក្នុងខេត្ត ដើម្បី អប់រំណែនាំដល់ប្រជាពលរដ្ឋ ដែលជាមុខសញ្ញាបានប៉ះពាល់ជនជាតិម៉ាឡេស៊ី ទាំង០៦នាក់នោះ ឲ្យស្នាក់នៅតាមផ្ទះរៀងៗខ្លួន ក្នុងរយៈពេល១៤ថ្ងៃ ដើម្បីថែទាំសុខភាពខ្លួនឯង ក៏ដូចជា សុវត្ថិភាពក្រុមគ្រួសារ និងសហគមន៍ទាំងមូលផងដែរ។
គួរបញ្ជាក់ផងដែរថា បន្ទាប់ពីក្រសួងសុខាភិបាល រកឃើញអ្នកផ្ទុកមេរោគកូវិដ១៩ ចំនួន០៦នាក់ ជាជនជាតិម៉ាឡេស៊ី ក្នុងចំណោមអ្នករួមក្រុម០៨នាក់ ដែលបានមកធ្វើការងារសាសនា នៅស្រុកកងមាស កាលពីយប់ថ្ងៃទី១៩ ខែមីនា ឆ្នាំ២០២០ បូករួមទាំងជនជាតិអង់គ្លេស៣នាក់ដែលបានរកឃើញនាពេលកន្លងមកថ្មីៗ ធ្វើអោយតួលេខសរុបក្នុងខេត្តកំពង់ចាម មានការកេីនឡេីងរហូតដល់០៩នាក់ ដែលត្រូវបញ្ជូនទៅព្យាបាលនៅមន្ទីរពេទ្យជាបន្ទាន់ផងដែរ ៕