កំពង់ចាម: លំនៅឋានបងប្អូនប្រជាពលរដ្ឋ ដែលសាងសង់ឡើងអំពីឈើ ប្រក់ក្បឿង ចំនួន២ខ្នង ក្នុងនោះ១ខ្នងត្រូវបានអគ្គីភ័យឆាបឆេះអស់ទាំងស្រុង និង១ខ្នង
ទៀត ត្រូវរងការខូចខាតអស់មួយផ្នែក ខណៈម្ចាស់ផ្ទះ និងអ្នកជិតខាងមិនអាចជួយពន្លត់ទាន់ពេល បណ្តាលឲ្យបាត់បង់ទ្រព្យសម្បត្តិអស់ជាច្រើន តែមិនបណ្ដាលឲ្យមនុស្សស្លាប់ ឬរងរបួសអ្វីឡើយ។ ដែលករណីគ្រោះអគ្គីភ័យនេះបានកើតមានឡើង កាលពីវេលាម៉ោង៩ និង៣០នាទីព្រឹក ថ្ងៃទី៦ ខែឧសភា ឆ្នាំ២០២០ ស្ថិតនៅក្នុងភូមិព្រែកកុយ ឃុំព្រែកកុយ ស្រុកកងមាស ខេត្តកំពង់ចាម។
លោក ថុង ភូរីវុធ អធិការរងនគរបាលស្រុកកងមាស បានឲ្យដឹងថា ចំពោះករណីគ្រោះអគ្គីភ័យនេះ បណ្ដាលឲ្យឆេះផ្ទះប្រជាពលរដ្ឋ ឈ្មោះ ថន សុធារី ភេទស្រី អាយុ៤៥ឆ្នាំ ដែលមានទំហំ៨ x៩ម៉ែត្រ ធ្វើអំពីឈើ ប្រក់ក្បឿង ឆេះអស់ទាំងស្រុង និងបណ្ដាលឲ្យខូចខាតគ្រឿងអលង្ការមានដូចជា ខ្សែរក ខ្សែរដៃធ្វើអំពីមាសចំនួន០៣តម្លឹងកន្លះ និងខ្សែរក កងដៃផ្លាកទីន ចំនួន០៣តម្លឹង ប្រាក់១៦០០ដុល្លារ ទូឈើដាក់ខោអាវចំនួន០៣ តុចំនួន០៣ និងគ្រែប្រអប់ចំនួន០៣ ផងដែរ។
ដោយឡែកផ្ទះប្រជាពលរដ្ឋ ឈ្មោះ តូច ប៊ុនថន ភេទប្រុស អាយុ៧៤ឆ្នាំ មានទំហំ១០ x១០ម៉ែត្រ ធ្វើអំពីឈើ ប្រក់ក្បឿង បណ្ដាលឲ្យខូចខាតជញ្ជាំង និងដំបូល មួយចំហៀង។ ដែលសមត្ថកិច្ចបានដាក់ការសន្និដ្ឋានជំហានដំបូង ចំពោះករណីគ្រោះអគ្គីភ័យនេះ គឺបណ្ដាលមកពីការទុស្សេខ្សែភ្លើងផងដែរ ។
ដោយករណីគ្រោះអគ្គីភ័យនេះដែរ ក្រោយពីទទួលបានព័ត៌មានភ្លាម លោកវរសេនីយ៍ឯក ជា ជួន អធិការនគរបាលស្រុកកងមាស បានចាត់តាំងអោយលោកវរសេនីយ៍ទោ ថុង ភូរីវុធ អធិការរងទទួលដឹកនាំការងារផ្នែកព្រហ្មទណ្ឌ ដឹកនាំកម្លាំងជំនាញអធិការដ្ឋាន ចេញរថយន្ដពន្លត់អគ្គីភ័យ ០១គ្រឿង និងទាក់ទងរថយន្តអគ្គីភ័យរបស់អធិការដ្ឋាននគរបាលស្រុកបាធាយ ០១គ្រឿងទៀត ចុះទៅអន្ដរាគមន៍ជួយពន្លត់ ដោយប្រេីប្រាស់ទឹកអស់២ឡាន ហើយភ្លេីងក៏បានរលត់អស់១០០% នៅវេលាម៉ោង១១និង០០នាទី ដោយមិនបានឆាប់ឆេះរាលដាលដល់លំនៅឋានប្រជាពលរដ្ឋដ៏ទៃទៀតឡើយ ៕
