ភ្នំពេញ៖ អនុប្រធានសាលាដំបូងរាជធានីភ្នំពេញ លោក កោ វណ្ឌី កាលពីថ្ងៃទី១៩ ខែកុម្ភះ ឆ្នាំ២០១៤ បានប្រកាសសាលក្រមសម្រេចផ្តន្ទាទោសអនាគតកូនប្រសារម្នាក់ឈ្មោះឆៃ ថន អាយុ៣១ឆ្នាំ ដាក់ពន្ឋនាគារ ១០ឆ្នាំ ពីបទសម្លាប់អនាគតឪពុកក្មេក ជាអតីតនាយទាហានកងទ័ពជើងទឹក និងសម្រេចលើកលែងការចោទប្រកាន់ ពីរនាក់ម្តាយកូនឈ្មោះរ៉េត រតនាអាយុ៤៥ឆ្នាំ និងឈ្មោះស៊ិន រ័ត្នលីដា អាយុ២០ឆ្នាំជាប់ចោទ ពីបទ សមគំនិតក្នុងអំពើសម្លាប់នេះ ។
គួររំលឹកថា កាលពីយប់ថ្ងៃទី២១ ខែតុលា ឆ្នាំ២០១២ ឈ្មោះស៊ិន ហយ ភេទប្រុស អាយុ៥៦ឆ្នាំ ជាអតីតនាយរងការិយាល័យវិស្វកម្មនៃទីបញ្ជាការកងទ័ពជើងទឹកនិងជាប្តីរបស់ឈ្មោះរ៉េត រតនា បានវិលត្រឡប់មកផ្ទះវិញក្រោយពីបានចុះចោលផ្ទះជាង១ឆ្នាំក្នុងរឿងចាប់រំលោភសេពសន្ឋវៈលើកូនស្រីពុំបានសម្រេច និងបានវាយបង្ករបួសស្នាមមកលើកូនស្រី រហូតប្តឹងផ្តល់គ្នាទៅតុលាការរួចឈ្មោះស៊ិន ហយ បានហែកសង្ក័សីរបងចូលទៅក្នុងផ្ទះ ក៏មានការឈ្លោះប្រកែកគ្នាកើតឡើងដែលបណ្តាលឱ្យឈ្មោះស៊ិន ហយដកកាំភ្លើងខ្លីម៉ាកកា៥៤មកបាញ់តម្រង់កូនស្រី និងឈ្មោះឆៃ ថន ជាអនាគតកូនប្រសារចំនួនមួយគ្រាប់ តែមិនផ្ទុះហើយឈ្មោះឆៃ ថន បានប្រវាយប្រតប់ដណ្តើមបានកាំភ្លើងខ្លី រួចដេញបាញ់ឈ្មោះស៊ិន ហយ វិញរហូតមកដល់ក្រោយផ្ទះត្រូវមួយគ្រាប់ចំកញ្ចឹង.កពីក្រោយធ្លាយទៅលើថ្ងាស ។ ចំណែកពីរនាក់ម្តាយកូនបាននាំគ្នាសម្ងំលាក់ខ្លួននៅក្នុងផ្ទះ។
ក្រោយហេតុការណ៍កើតឡើងឈ្មោះឆៃ ថន បានដកយកគ្រាប់ចេញ រួចរៀបចំយកកាំភ្លើងដាក់ពីលើខ្លួនជនរងគ្រោះ ធ្វើដូចជាអត្តឃាតខ្លួនឯង ។ ចំណែកម្តាយនិងកូនពុំបានរាយការណ៍រឿងនេះឱ្យសមត្ថកិច្ចដឹងនោះទេ ដោយព្យាយាមលាក់ការពិតហើយនៅយប់នោះ សមត្ថកិច្ចប៉ូលិសបានចុះទៅពិនិត្យកន្លែងកើតហេតុ និងសាកសព។ មកដល់ថ្ងៃទី២៣ ខែតុលា ឆ្នាំ២០១៤ សមត្ថកិច្ចមានការសង្ស័យលើមនុស្ស ទាំង៣នាក់នេះ ក៏នាំខ្លួនមកសាកសួរតាមច្បាប់ រួចក៏ចោទប្រកាន់មនុស្សទាំង៣នាក់នេះ ពីបទឃាតកម្ម និង សមគំនិតហើយសម្រេចឃុំខ្លួនឈ្មោះឆៃ ថន ដាក់ពន្ឋនាគារបណ្តោះ អាសន្ន តែមិនឃុំខ្លួន២នាក់ម្តាយកូននោះទេ តែដាក់ឱ្យស្ថិតក្រោមការត្រួតពិនិត្យតាម ផ្លួវតុលាការ៕ 
