សម្រាប់ការប្រកួតនៅថ្ងៃអង្គារ ក្លិបអ្នកមានបុណ្យ Barcelona បានយកឈ្នះលើក្រុមម្ចាស់ផ្ទះ Man City ក្នុងលទ្ធផល ២ ទលនឹង ០ ។ ការប្រកួតនៅក្នុងតង់ទី ១ ក្រុមទាំងពីរមិនអាចរកគ្រាប់បាល់បានទេប៉ុន្តែចូលលេងតង់ទី២បានត្រឹមតែ ៨ នាទីប៉ុណ្ណោះ Barcelona ទទួលបានកាដូបាល់ប៉េណាល់ទីមួយគ្រាប់បន្ទាប់ពីខ្សែការពារ Demichelis របស់ Man City ធ្វើឲ្យមានកំហុសហើយត្រូវអជ្ញាកណ្តាលដកកាតក្រហមបណ្តេញចេញ ។ Messi ជាអ្នកសម្រេចគ្រាប់បាល់នេះធ្វើឲ្យ Barcelona នាំមុខ ១-០ ។ រៀបនឹងបញ្ចប់ការប្រកួតទៅហើយ Dani Alves បានរកគ្រាប់បាល់ទី ២ ឲ្យ Barcelona ទទួលជ័យជម្នះ ។
ចំណែកការប្រកួតដំណាលគ្នានោះ ម្ចាស់ផ្ទះ Leverkusen ត្រូវបានក្រុមភ្ញៀវ Paris SG លត់យ៉ាងចាស់ដៃក្នុងលទ្ធផល ៤-០ ។ ៤ គ្រាប់របស់ Paris SG គឺរកបានដោយកីឡាករ Matuidi នៅនាទីទី ៣ ចំណែក Ibrahimovic រកបាន២គ្រាប់ម្នាក់ឯងគឺនៅនាទី ៣៩ ដោយបាល់ប៉េណាល់ទីនិង១គ្រាប់ទៀតនៅនាទីទី ៤២ ហើយគ្រាប់ទី ៤ គឺស៊ុតបញ្ចូលទីដោយ Cabaye ។
ដោយឡែកសម្រាប់ការប្រកួតនៅថ្ងៃពុធវិញ ម្ចាស់ផ្ទះ Arsenal បានរងបរាជ័យក្រោមស្នាដៃរបស់ Bayern Munich ២-០ ។ Arsenal បានទទួលកាដូបាល់ប៉េណាល់ទីមុននៅនាទី ៩ ប៉ុន្តែ Ozil ធ្វើឲ្យបាត់បង់ឱកាសដ៏ល្អនេះ ។ លេងបាន ៤០ នាទី Bayern Munich បានទទួលបាល់ប៉េណាល់ទីមួយវិញបន្ទាប់ពីអជ្ញាកណ្តាលពិន័យអ្នកចាំទី Szczesny នឹងផ្តល់កាតក្រហមបណ្តេញចេញពីការប្រកួត ។ សំណាងមិនល្អសម្រាប់ Bayern Munich ដោយ Alaba ស៊ុតមិនចូលដូចគ្នា ។
ប៉ុន្តែគ្រប់យ៉ាងបានប្រែប្រួលនៅតង់ទី ២ ដោយ Bayern Munich រកបាន២គ្រាប់គឺដោយកីឡាករ Kroos នៅនាទីទី ៥៤ និង Muller នៅនាទីទី ៨៨ ។ ការប្រកួតមួយគូទៀតគឺក្រុមភ្ញៀវ At Madrid បានយកឈ្នះម្ចាស់ផ្ទះ AC Milan ១-០ ដោយការតែតបញ្ចូលទីយ៉ាងល្អរបស់ Diego Costa នៅនាទីទី ៨៣ ។
គួរបញ្ជាក់ថា ការប្រកួត Uefa Champions League វគ្គ ១៦ ក្រុមចុងក្រោយជើងទី ១ នៅសល់ការប្រកួតចំនួន ៤ គូទៀតដែលនៅថ្ងៃអង្គារទី ២៥ គឺជំនួបជួបគ្នារវាងម្ចាស់ផ្ទះ Olympiakos ជាមួយ Man Utd និង Zenit ទទួលភ្ញៀវ Dortmund ។ ចំណែកនៅថ្ងៃពុធទី ២៦ Real Madrid ត្រូវទៅលេងផ្ទះ Schalke ចំណែក Galatasay ស្វាគមន៍ភ្ញៀវ Chelsea ៕ 
