ភ្នំពេញ៖ កម្លាំងនគរបាលប៉ុស្តិ៍រដ្ឋបាលជើងឯកបានចុះឃាត់ខ្លួនជនជាតិវៀតណាមម្នាក់ កាលពីវេលាម៉ោង០៩ និង៣០នាទី ថ្ងៃទី២០ ខែកុម្ភៈ ឆ្នាំ២០១៤ បន្ទាប់ពីដើរអុកឡុករោងអាពាហ៍ពិពាហ៍របស់ប្រជាពលរដ្ឋ ស្ថិតនៅក្នុងភូមិរលួស សង្កាត់ជើងឯក ខណ្ឌដង្កោ រាជធានី ភ្នំពេញ ។ សមត្ថកិច្ចនគរបាលប៉ុស្តិ៍រដ្ឋបាលជើងឯកបានឲ្យដឹងថា ជនសង្ស័យនោះជាជនជាតិវៀតណាមនោះមានឈ្មោះ ហាំ យ៉ាងទៀង ភេទប្រុស អាយុ៣៦ឆ្នាំ មុខរបរនិងទីលំនៅមិនពិត ប្រាកដ ដោយនៅមុនពេលកើតហេតុប្រជាពលរដ្ឋដែលជាភ្ញៀវចូលរួមពិធីមង្គលការកូនស្រីប្រុសរបស់អ្នកភូមិនោះ បានឃើញបុរសជាជនបង្កអុកឡុក ដើរចេញមកពីទិសខាងត្បូង ក៏ ប៉ុន្តែមិនដឹងថា ហេតុអ្វីទេបានជាជនបង្កហេតុគាត់មកអុកឡុក
រោងការបែបនេះដែរ ហើយនៅ ពេលពិធីកាត់សក់កូនកំលោះកូនក្រមុំ ស្រាប់តែជនសង្ស័យរូបនោះកាន់កាំបិតចំនួន២ គឺកាំបិតប៉័ងតោ និងកាំបិតផ្គាក់ ស្ទុះឡើងទៅលើផ្ទះ រួចស្រែកឡូឡាបង្កភ្ញាក់ផ្អើលតែម្តង ទើបស្ត្រីជាម្ចាស់ដើមការរត់មកប្តឹងសមត្ថកិច្ចយើងឲ្យជួយអន្តរាគមន៏ចាប់នាំខ្លួនមកស្នាក់ការប៉ុស្តិ៍។ ដោយឡែកស្ត្រីជាម្ចាស់ដើមការក៏បានប្រាប់សមត្ថកិច្ចថា ជនសង្ស័យនេះបានមកបង្កអុកឡុកម្តងហើយដែរ
កាលពីវេលាម៉ោង៤ព្រឹក ថ្ងៃទី២០កុម្ភៈនេះ ហើយពេលនោះគាត់ថា វាមិនកើតអ្វីធំដំទេ ទើបគាត់អត់ប្តឹង សមត្ថកិច្ច លុះដល់នៅវេលាម៉ោងជាង៩ព្រឹកថ្ងៃដដែលនេះ ជនសង្ស័យមិនដឹងបានកាំបិតមកពីណានោះទេ ក៏បានស្ទុះឡើងទៅលើផ្ទះបង្កការភ្ញាក់ផ្អើលនៅក្នុងពិធីកំពុងកាត់សក់ការចៅរបស់គាត់។ ចំណកែនៅកន្លែងកើតហេតុឯណោះវិញប្រជាពលរដ្ឋបានប្រាប់ឲ្យដឹងដែរថា ពួកគាត់បានឃើញជនសង្ស័យនោះដើរចេញពីលិចផ្ទះគេម្នាក់មកក្រៅរួចឡើងទៅលើផ្ទះកំពុងធ្វើពិធីកាត់សក់កូនកំលោះកូនក្រមុំធ្វើឲ្យភ្ញៀវដែលចូលរួមរត់ចុះក្រោមអស់ ហើយគាត់អត់ដឹងថារឿងអ្វីទេ ម្យ៉ាងគេជាជនជាតិវៀតណាមទៀត។
លោក ឃួន យ៉ាណូ នាយនគរបាលប៉ុស្តិ៍រដ្ឋជើងឯកប្រាប់ឲ្យដឹងតាមទូរស័ព្ទថា មិន ដឹងថាដោះស្រាយយ៉ាងម៉េចទេ ភាគីម្ចាស់ដើមការទារសំណង១ពាន់ដុល្លាឯណោះ ព្រោះថា ជនសង្ស័យមិនដឹងផ្ទះសម្បែងនៅឯណា មិនដឹងគេមានសាច់ញាតិនៅស្រុកយើងឬអត់? មាន តែបញ្ជូនទៅអធិការដ្ឋាននគរបាលខណ្ឌឲ្យដោះស្រាយបន្ត។
ជាមួយគ្នានេះមន្ត្រីផ្នែកព្រហ្មទណ្ឌម្នាក់បានឲ្យដឹងថា ជនសង្ស័យដូចជាគ្មានបទល្មើសអ្វីដើម្បីដាក់បន្ទុកសោះ ព្រោះគេអត់បានបង្ករបួសស្នាមលើអ្នកដ៏ទៃគេគ្រាន់តែអុកឡុករោងកា បង្កបញ្ហាតែប៉ុណ្ណោះ ហើយម្ចាស់ដើមការគេចង់ឲ្យសមត្ថកិច្ចយើងចាប់ខ្លួនគេឲ្យឆ្ងាយពីរោង ការកុំឲ្យគេអុកឡុកទៀតតែប៉ុណ្ណោះ។ ទោះបីជាយ៉ាងណាក៏ដោយករណីនេះម្ចាស់ដើមការទារសំណង១ពាន់ដុល្លានោះបាន ដែរឬអត់ បញ្ហាទារសំណងបែបនេះត្រូវបានគេគិតថាដូចជាហួសហេតុពេកព្រោះថាជនបង្ករូបនេះមានលទ្ធភាពឯណា ម្យ៉ាងជាជនជាតិវៀតណាមនិងគ្មានផ្ទះសម្បែងផងដែរនោះ៕ 
