កំពង់ចាម: ក្នុងដំណើរអញ្ជើញចុះពិនិត្យវឌ្ឍនភាពនៃការសាងសង់ប្រព័ន្ធលូបង្ហូរទឹកចេញពីក្រុងកំពង់ចាម កាលពីព្រឹកថ្ងៃទី១៤ ខែតុលា ឆ្នាំ២០២០នេះ ឯកឧត្តម អ៊ុន ចាន់ដា អភិបាលខេត្តកំពង់ចាម បានប្រគល់ម៉ូតូ និងថវិកាមួយចំនួន ជូនដល់ជនរងគ្រោះក្នុងហេតុការណ៍បាក់ស្រុតលូបង្ហូរទឹក និងសួនច្បារមាត់ទន្លេនេះ បន្ទាប់ពីក្រុមការងារជួសជុលកកាយរកឃើញ ហើយបានយកវាចេញពីជម្រៅដីប្រមាណជា៤ម៉ែត្រ ដើម្បីស្ថាបនាប្រព័ន្ធលូថ្មីឡើងវិញ។ 
ឆ្លៀតក្នុងឱកាសនោះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម បានជំរុញដល់មន្ត្រីពាក់ព័ន្ធ ក៏ដូចជាក្រុមការងារបច្ចេកទេស ឲ្យពន្លឿនការងារសាងសង់នេះ ធ្វេីយ៉ាងណាត្រូវឲ្យមានគុណភាពរឹងមាំ និងសម្រុកឲ្យបានមុនទឹកជំនន់ចូលមកដល់ ដែលនាំឲ្យបង្កការខូចខាតដល់សួនច្បារ និងហេដ្ឋារចនាសម្ព័ន្ធផ្សេងៗជាច្រើនទៀត ដោយពេលនេះទឹកទន្លេមេគង្គចាប់ផ្ដើមហក់ឡើងជាបន្តបន្ទាប់ រហូតមានកម្ពស់១០.៦២ម៉ែត្រ ព្រោះខេត្តកំពង់ចាមកម្រិតទឹកដែលត្រូវប្រកាសឲ្យមានការប្រុងប្រយ័ត្នគឺ ១៥.២០ម៉ែត្រ ។
មន្ត្រីបច្ចេកទេសបានឲ្យដឹងថា បច្ចុប្បន្នក្រុមការងារកំពុងដំណើរការសាងសង់សម្រេចបានប្រមាណជាង២០%ហើយ ដោយត្រូវធ្វើការចាក់បេតុង ឱបចង្កេះប្រព័ន្ធថ្មី និងចាក់បេតុង គ្របពីលើមួយជាន់ទៀត មានប្រវែង៨០ម៉ែត្រ ចាប់ពីមាត់អណ្តូងលូចាស់ ទៅដល់ក្នុងទន្លេ ហេីយត្រូវប្រេីប្រាស់ប្រព័ន្ធលូមុខ៣ ដែលមុខកាត់លូនីមួយៗ មានទំហំ០,៨ ម៉ែត្រ និងសង់អណ្តូងលូបណ្តែត ចំនួន២បន្ថែមទៀត ដើម្បីការពារការកកស្ទះផងដែរ។
គួររំលឹកផងដែរថា កាលពីវេលាម៉ោង១២:៣០នាទី រំលងអាធ្រាត្រ ឈានចូលថ្ងៃទី១៣ ខែកញ្ញា ឆ្នាំ២០២០កន្លងទៅថ្មីៗនេះមានករណីបាក់លូូបង្ហូរទឹកចូលទន្លេ ទំហំ ៧ម៉ែត្រ គុណ១០ម៉ែត្រ នៅចំណុចមាត់ទន្លេស្ថិតនៅក្នុងភូមិទី៣ សង្កាត់វាលវង់ ក្រុងកំពង់ចាម 
បណ្តាលឲ្យធ្លាប់ម៉ូតូ០១គ្រឿង ម៉ាកវេវ តែមិនបង្កឲ្យមានគ្រោះថ្នាក់ដល់អាយុជីវិតមនុស្សឡើយ។ បេីតាមការសន្និដ្ឋានរបស់មន្ត្រីជំនាញថា ការបាក់ស្រុតដីនេះអាចបណ្តាលមកពីប្រព័ន្ធលូបង្ហូរទឹកចេញពីក្រុងកំពង់ចាម ចូលក្នុងទន្លេដែលមានសភាពចាស់ទ្រុឌទ្រោម គឺជាប្រព័ន្ធលូសាងសង់ឡេីងតាំងពីជំនាន់អាណានិគមបារាំង ហើយមុនពេលកើតហេតុក៏មានភ្លៀងធ្លាក់យ៉ាងខ្លាំងផងដែរ ៕
