ភ្នំពេញ ៖ យុវជន ៤នាក់ បានរងរបួសធ្ងន់ស្រាល ខណៈដែលម៉ូតូគុប ពណ៌ខៀវ ១គ្រឿង ពាក់ស្លាកលេខ កណ្តាល 1B-1750 ជិះដោយយុវជន ២នាក់ ធ្វើដំណើរយ៉ាងលឿនតាមផ្លូវ២៧១ ក្នុងទិសដៅពីត្បូងទៅជើង លុះមកដល់កែងផ្លូវ១៨២ ជាចំណុចផ្លូវបែកជា៣ ក៏មានម៉ូតូកូនទា ពណ៌ស ១គ្រឿង ពាក់ស្លាកលេខ ភ្នំពេញ 1BT-5260 ជិះដោយយុវជន ២នាក់ ដូចគ្នា ក្នុងទិសដៅពីកើតបត់ទៅត្បូង បុកចំពេញទំហឹងបណ្តាលឲ្យយុវជនទាំង ៤នាក់ សន្លប់ស្តូកស្តឹងនៅកន្លែងតែម្តង។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ១ និង ២០នាទី យប់រំលងអាធ្រាត្រឈានចូលថ្ងៃទី២១ កុម្ភៈ ២០១៤ ស្ថិតក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ។
ក្រោយកើតហេតុ ជនរងគ្រោះត្រូវមិត្តភក្តិដឹកយកទៅសង្គ្រោះនៅមន្ទីរពេទ្យឯកជន ចំណែកម៉ូតូសមត្ថកិច្ចធ្វើការវាស់វែង និងនាំយកទៅរក្សាទុកនៅអធិការដ្ឋាននគរបាលខណ្ឌសែនសុខ រង់ចាំដោះស្រាយ៕