ខេត្តក្រចេះ: បើទោះបីជាលោកទី សុវិនថាល់ ព្រះរាជអាជ្ញាអមសាលាដំបូងខេត្តក្រចេះ បានចាត់វិធានការបង្ក្រាបបទល្មើសព្រៃឈើយ៉ាងក្ដៅគគុកនៅលើទឹកដីនៃខេត្តក្រចេះយ៉ាងណាក៍ដោយក្ដី ដោយឡែកនៅឃុំកន្តួត និង ឃុំថ្មី ស្រុកចិត្របូរី ឯណេះវិញ មានក្រុមឈ្មួញមួយចំនួននៅតែបន្តរសកម្មភាព ដឹកជញ្ជូនឈើធ្នង់ ចេញពីឃុំកន្តួត និងឃុំថ្មី ដោយឆ្លងកាត់តាមស្រុកស្នួល ដើម្បីយកទៅលក់ឲ្យឈ្មួញដែលចាំទទួលទិញនៅ ស្រុកមេមត់ ខេត្តត្បូងឃ្មុំ ។
បើតាមប្រភព ព័ត៍មានពីឃុំកន្តួតបានឲ្យដឹងថា មានរថយន្តជាច្រើនគ្រឿងដូចជា កាមរី ឆ្លាម បាឡែន និងហៃឡេបឌ័រ កំពុងតែធ្វើរចរាចរ ដឹកជញ្ជូនឈើធ្នង់ ជារៀងរាល់យប់ ឥតឈប់ឈរ បើទោះបីជាស្ថិតនៅក្នុងស្ថានការ តានតឹងយ៉ាងណាក៍ដោយចុះ ហើយរថយន្តដែលធ្វើរសកម្មភាពដឹកជញ្ជូនឈើ ធ្នង់ចេញពីឃុំកន្តួត និងឃុំថ្មី ឆ្ពោះទៅកាន់ស្រុកមេមត់ ខេត្ត ត្បូងឃ្មុំ ជារៀងរាល់យប់នេះ ត្រូវបានគេស្គាល់ថា ជារថយន្តរបស់ លោកធា និងរថយន្តរបស់លោក ចិន ។
នេះគឺជាសកម្មភាពនៃការដឹកជញ្ជូនឈើធ្នង់របស់ក្រុមឈ្មួញនៅក្នុងតំបន់នោះកន្លងមក ក៍មិនខុសគ្នានៅក្នុងពេល បច្ចុប្បន្ននេះដែរ។ ប្រភពបានបន្តរទៀតថា ការដឹកជញ្ជូនឈើធ្នង់ចេញពីចំណុចឃុំកន្តួត របស់លោកធា និងលោក ចិន ឆ្ពោះទៅកាន់ស្រុក មេមត់ ខេត្តត្បូងឃ្មុំ ជារៀងរាល់ថ្ងៃនេះ គឺប្រហែលជាឋិតនៅក្រោមការបើកដៃពីសំណាក់លោក សុខ គោ នាយសង្កាត់រដ្ឋបាលព្រៃឈើកន្តួតហើយមើល ទៅ បានជា សកម្មភាពនៃការដឹកជញ្ជូនឈើធ្នង់ ខុសច្បាប់របស់ពួក គេ ដំណើរការទៅបានយ៉ាងរលូនដូច្នេះ ។ ចំណែកឯលោកសុខ គោ វិញ ភ្នាក់ងារកាសែត កម្ពុជាថ្មី ប្រចាំខេត្តក្រចេះ បានទូរស័ព្ទទៅសុំការបំភ្លឺពីគាត់ ហើយគាត់ ក៍បានឆ្លើយតបមកវីញទាំងកំហឹងថា គាត់មិនបានដឹងអ្វីទាំងអស់ ចង់ផ្សាយ អី ក៍ផ្សាយទៅ ៕