សៀមរាប ៖ ពិធីខាងលើនេះបានប្រព្រឹត្តទៅនៅអធិការដ្ឋាននគរបាលក្រុងសៀមរាបកាលពីព្រឹកថ្ងៃទី ៣០ ខែ កក្តដា ឆ្នាំ២០១៤ នេះ ក្រោមអធិបតី លោកឩត្តមសេនីយ៍ត្រី ជៀវ សុរិយា ស្នងការរងនិងជាតំណាងដ៏ខ្ពង់ខ្ពស់លោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាប លោកស្រី កុយ វិសាល អភិបាលរងក្រុងសៀមរាប ព្រមទាំងអស់លោក ជាថ្នាក់ដឹកនាំមួយចំនួនទៀតចំណុះស្នងការដ្ឋាននគរបាលខេត្តសៀមរាបបានចូលរួមយ៉ាងច្រើនផងដែរ ។
បន្ទាប់ពីលោក វរសេនីយ៍ទោ ទិត្យ ណារ៉ុង អធិការនគរបាលក្រុងសៀមរាបឡើងអានរបាយការណ៍ស្វាគមន៍និងបានរាយការណ៍អំពីស្ថានភាពការងារជំនាញដែលកម្លាំងនគរបាលក្រុងសៀមរាបបានអនុវត្តដោយទទួលបានលិទ្ធផលយ៉ាងល្អប្រសើរជូនដល់គណះអធិបតីនិងអង្គពិធីបានទទួលជ្រាបរួចមក ។ លោកវរសេនីយ៍ឯក ស៊ន់ ចំណាន នាយការិយាល័យបុគ្គលិក នៃស្នងការដ្ឋាននគរបាលខេត្តសៀមរាបបានឡើងអានប្រកាសរបស់ក្រសួងមហាផ្ទៃស្តីពីការផ្ទេរភារះកិច្ច តែងតាំងមុខតំណែង និង តំឡើងឋានន្តរសក្តិ ដល់មន្រី្តនគរបាល ជាតិនៃស្នងការដ្ឋាននគរបាលខេត្តសៀមរាបទាំង៩១នាក់តែម្តងក្នុងនោះមានទាំងប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរសក្ដិចាប់ពីថ្នាក់ អនុសេនីយ៍ឯក អនុសេនីយ៍ទោ អនុសេនីយ៍ត្រី ព្រិន្ទបាលឯក និង ព្រិន្ទបាលទោ ។
ក៏ដូចជាបន្ទាប់ពីលោកឩត្តមសេនីយ៍ត្រី ជៀវ សុរិយា ស្នងការរងនិងជាតំណាងដ៏ខ្ពង់ខ្ពស់លោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាបបានបំពាក់ឋានន្តរសក្តិដល់កងកម្លាំងរួចមក លោកស្រី កុយ វិសាល អភិបាលរងក្រុងសៀមរាប ព្រមទាំងលោកឩត្តមសេនីយ៍ត្រី ជៀវ សុរិយា ស្នងការរងនគរបាលខេត្តសៀមរាបបានមានប្រសាសន៍សំណេះសំណាលនិងធ្វើការផ្តាំផ្ញើដល់កងកម្លាំងនាឱកាសនោះដោយបានធ្វើការកោតសរសើរចំពោះកិច្ចខិតខំប្រឹងប្រែងរបស់កងកម្លាំងនគរបាលខេត្តសៀមរាបលើការបំពេញនូវតួនាទីភារះកិច្ចស្នូលរបស់ខ្លួនបានយ៉ាងល្អប្រសើរ ។ 
ដោយគណះអធិបតីទាំងពីរក៏បានដាស់តើនក្រើនរំលឹកក៏ដូចជាផ្តល់ជូននូវបទពិសោធន៍ល្អៗបន្ថែមទៀតដល់អស់លោក លោកស្រី ដែលទើបនិងបានប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរសក្ដិថ្មីនាពេលនេះត្រូវធ្វើយ៉ាងណាចេះរក្សាឲ្យបាននូវសាមគ្គីភាពផ្ទៃក្នុងឲ្យបានល្អ ត្រូវមានក្រមសិលធម៍ និង វិជ្ជាជីវ: រក្សាឲ្យបានជាខាតគោរពនិងអនុវត្តតាមបទបញ្ជាជាកងកម្លាំងនគរបាលជាតិដោយមិនគិតផលប្រយោជន៍ផ្ទាល់ខ្លួនជាធំ ។
ដោយលោកស្រី កុយ វិសាល ព្រមទាំង លោកឩត្តមសេនីយ៍ត្រី ជៀវ សុរិយា បានបន្តប្រសាសន៍ផ្ដាំផ្ញើដល់កងកម្លាំងទាំងអស់ធ្វើយ៉ាងណាពង្រឹងបន្ថែមនូវការងារភូមិឃុំមានសុវត្ថិភាពនៅតាមមូលដ្ឋានរបស់ខ្លួនឲ្យបានម៉ឺងម៉ាត់ ដើម្បីរក្សាឲ្យបាននូវសន្តិសុខ សុវត្ថិភាព ជូនបងប្អូនប្រជាពលរដ្ឋ ក៏ដូចជាភ្ញៀវជាតិ អនុ្តរជាតិដែលបានមកបំពេញទស្សនកិច្ច នៅក្នុងខេត្តសៀមរាបនេះឲ្យកាន់តែមានតម្លាភាព ៕ ដោយ លោកខេង ខេមរា
