សៀមរាប : នៅរសៀលថ្ងៃទី ២៩ ខែ កក្តដា ឆ្នាំ២០១៤នេះ លោក ឩត្តមសេនីយ៍ត្រី ជៀវ សុរិយា ស្នងការរង និង លោក ឩត្តមសេនីយ៍ត្រី ឡាច សាវិន ស្នងការរងនគរបាលខេត្តសៀមរាបក្នុងនាមលោកឩត្តមសេនីយ៍ទោ សត ណាឌី ស្នងការនគរបាលខេត្តសៀមរាប ព្រមទាំងកងកម្លាំងនគរបាលជាតិមួយចំនួនទៀតចំណុះស្នងការដ្ឋាននគរបាលខេត្តសៀមរាបបាន អញ្ជើញគោរពវិញ្ញាណក្ខ័ន្តនិងបំពាក់បច្ជាមរណះថ្នាក់វរសេនីយ៍ទោ ជូនសពលោក ឈើយ សារី ជានាយរងការិយាល័យការពារបេតិកភ័ណ្ឌនៃស្នងការដ្ឋាននគរបាលខេត្តសៀមរាប ។
ដែលលោកបានទទួលមរណះភាពកាលពីថ្ងៃទី២៨ ខែកក្តដា ឆ្នាំ២០១៤កន្លងទៅ ក្នុងជន្មាយុ ៥៣ ឆ្នាំ ដោយគ្រោះថ្នាក់ចរាចរណ៍ដោយពិធីនេះត្រូវបានរៀបចំធ្វើឡើងនៅវត្តដំណាក់ក្នុងក្រុងសៀមរាប ។ ដោយនៅក្នុងពិធីដ៏ក្រៀមក្រំនេះក្នុងនាមជាកងកម្លាំងនគរបាលជាតិទាំងអស់ក៏ដូចជាបន្ទាប់ពីដាក់នូវកម្រងផ្កា និង ការបូជាទៀន ធូក ដើម្បីឧទ្ទិសជូនដល់ដួងវិញ្ញាណក្ខ័ន្ត នៃសពលោកវរសេនីយ៍ទោ ឈើយ សារី នាយរងការិយាល័យការពារបេតិកភ័ណ្ឌនៃស្នងការដ្ឋាននគរបាលខេត្តសៀមរាប និង ធ្វើការស្មឹងស្មាត គោរពវិញ្ញាណក្ខ័ន្តនៃសព ក្នុងការរំលឹងនូវគុណបំណាច់របស់លោក ដែលបានតស៊ូពុះពារក្នុងការបំរើជាតិមាតុភូមិ នៃទឹកដីសុវណ្ណភូមិកម្ពុជាយើង ឲ្យបានទៅកាន់ទីសោយសុខក្នុងសុគតិភពថ្មី ព្រមទាំងសូមបែរក្រោយឲ្យពរជ័យដល់ថ្នាក់ដឹកនាំជាតិ បងប្អូនរួមអាវុធ និង ក្រុមគ្រួសារ សូមឲ្យជួបតែសេចក្តីសុខ នឹង ដឹកនាំប្រទេសឲ្យមានកិច្ចអភិវឌ្ឍន៍រីកចម្រើនរួចមក ។ 
ក្នុងការចូលរួមរំលែកទុក្ខជាមួយក្រុមគ្រួសារសពនាឱកាសនោះ លោក ឩត្តមសេនីយ៍ត្រី ជៀវ សុរិយា ស្នងការរង និង លោក ឩត្តមសេនីយ៍ត្រី ឡាច សាវិន ស្នងការរងនគរបាលខេត្តសៀមរាបក្នុងនាមលោកឩត្តមសេនីយ៍ទោ សត ណាឌី ស្នងការនគរបាលខេត្តសៀមរាប ព្រមទាំងកងកម្លាំងនគរបាលជាតិមួយចំនួនទៀតចំណុះស្នងការដ្ឋាននគរបាលខេត្តសៀមរាប បានសម្តែងនូវការសោកស្តាយយ៉ាងខ្លាំង ចំពោះការបាត់បង់នូវកុលបុត្រខ្មែរដ៏ឆ្នើម ក្នុងការបំរើជាតិមាតុភូមិ ទាំងវិស័យកងកម្លាំង និង ព្រះពុទ្ធសាសនា ។
ម្យ៉ាងទៀតចំពោះគំរូនៃវីរៈភាព និង រាល់ស្នាដៃនៃសមិទ្ធផលដ៏ធំធេងដែល លោកបានបន្សល់ទុកនៅ ក៏បានធ្វើឲ្យបងប្អូនរួមអាវុធ ថ្នាក់ដឹកនាំគ្រប់ជាន់ថ្នាក់ មន្ត្រីរាជការ ប្រជាពលរដ្ឋ ចងចាំជានិច្ច នូវគំរូវីរៈដ៏ឆ្នើមរបស់លោក ដែលធ្វើឲ្យកូនចៅជំនាន់ក្រោយ សិក្សារៀនសូត្រពីវីរៈភាពទាំងនេះផងដែរ ៕ នៅក្នុងពិធីនោះក៏បាននាំយកនូវថវិកាសមាគមន៍មិត្តនគរបាលជាតិចំនួន ៤ លានរៀល ប្រគល់ជូនដល់ក្រុមគ្រួសារសពលោកវរសេនីយ៍ទោ ឈើយ សារី ដើម្បីទុកសម្រាប់យកទៅប្រើប្រាស់តាមតំរូវការក្នុងពិធីបុណ្យនេះផងដែរ ៕ លោក ខេង ខេមរា
