ភ្នំពេញ៖ ស្ពានអាកាសស្ទឹងមានជ័យដែលជាស្ពានប្រវត្តិសាស្ត្រទី៣របស់រាជធានីភ្នំពេញត្រូវបើកសម្ពោធដាក់អោយប្រើប្រាស់ជាផ្លូវការនៅព្រឹកថ្ងៃទី៣១កក្កដានេះ ដែលពិធីនេះធ្វើឡើងក្រោមអធិបតីភាពសម្តេចអគ្គមហាសេនាបតីតេជោហុ៊ន សែននាយករដ្ឋមន្ត្រីនៃព្រះរាជាណាចក្រ
កម្ពុជា ហើយមុននៃពិធីសម្ពោធនេះពោលគឺនៅរសៀលថ្ងៃទី៣០ កក្កដាលោកប៉ា សុជាតិវង្ស អភិបាលនៃគណៈអភិបាលរាជធានី ភ្នំពេញ និងលោកជំទាវ បានអញ្ជើញជាអធិបតីក្នុងពិធីក្រុងពាលី សុំម្ចាស់ទឹកម្ចាស់ដីឲ្យ ជួយប្រោះព្រំឲ្យមានសេចក្តីសុខសេចក្តីចំរើនទៅតាមប្រពៃណីទំនៀមទំលាប់ មុននឹង ស្ពានអាកាសស្ទឹងមានជ័យត្រូវបានសម្ពោធដាក់ឲ្យប្រើប្រាស់ជាផ្លូវការ។ 
គួរបញ្ជាក់ផងដែរថា ស្ពានអាកាសស្ទឹងមានជ័យនឹងត្រូវសម្ពោធដាក់ឲ្យប្រើប្រាស់ជាផ្លូវការនៅព្រឹកថ្ងៃទី ៣១ កក្កដាក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចគិតិព្រឹទ្ធបណ្ឌិតប៊ុនរ៉ានី ហ៊ុនសែន។ 
ប្រជាពលរដ្ឋយើង ជាពិសេសប្រជាពលរដ្ឋនៅរាជធានីភ្នំពេញបានសំដែងការត្រេកអរ ក្រោយពីបានមើលឃើញសមិទ្ធិផលដ៏មានតំលៃនេះ និងសង្ឃឹមថា៖ចំណុចប្រសព្វស្ពាន ស្ទឹងមានជ័យដែលកន្លងមកតែងតែកកស្ទះចរាចរស្ទើតែរាល់ពេលនោះ ពិតជានឹងត្រូវបាន កាត់បន្ថយ។ ស្ពានអាកាសស្ទឹងមានជ័យត្រូវបានសាងសង់ឡើងបែកចេញជា៥ ក្នុងនោះមាន ស្ពានមេ១,ស្ពានតូចៗចំនួន៣ និងស្ពានក្រោមដី១ដែលចំណាយពេលសាងសង់អស់ជាង ២ឆ្នាំ និងចំណាយថវិកាជាង១៧លាន$អាមេរិក ជាថវិកាបានមកពីការវិនិយោគដីនៅតំបន់ អភិវឌ្ឍន៏ជ្រោយចង្វារដោយក្រុមហ៊ុនO.C.I.C។
ស្ពានអាកាសស្ទឹងមានជ័យ គឹជាស្ពានអា កាសទី៣នៅរាជធានីភ្នំពេញបន្ទាប់ពីស្ពានអាកាសក្បាលថ្នល់ដែលសាងសង់រួច និងដាក់ សម្ពោធឲ្យប្រើប្រាស់កាលពីថ្ងៃទី២៤ មិថុនាឆ្នាំ២០១០ និងស្ពានអាកាស៧មករា ដែលបានដាក់សម្ពោធឲ្យប្រើប្រាស់កាលពីថ្ងៃទី៦ មករាឆ្នាំ២០១១កន្លងមកនេះ។ នេះជាសមិទ្ធិផលថ្មី១ទៀតដែលកើតចេញពីការខិតខំប្រឹងប្រែងរបស់រាជរដ្ឋាភិបាល ក៏ដូចសាលារាជធានីភ្នំពេញដើម្បីឆ្លើយតបទៅនឹងតំរូវការជាក់ស្តែងរបស់ប្រជាពលរដ្ឋ យើង ,លើកកំពស់សណ្តាប់ធ្នាប់របៀបរៀបរយសាធារណៈ ជាពិសេសកាត់បន្ថយការកក ស្ទះចរាចរក្នុងរាជធានីភ្នំពេញដែលកំពុងកើតមានសព្វថ្ងៃ៕
