រាជធានីភ្នំពេញ ៖ បុរសស្ត្រីដែលត្រូវជាប្ដីប្រពន្ធបានសម្រេចចិត្តមកលោតទឹកលើស្ពានជ្រោយចង្វា ព្រោះតែរឿងមុខរបររកស៊ីជាមួយឪពុកក្មេក ខណៈនោះស្ដ្រីដែលជាប្រពន្ធដូចចិត្តមិនចង់លោតវិញ ហើយបានពិភាក្សាជាមួយប្ដី ប៉ុន្តែបុរសជាប្ដីមិនព្រមក៏បានប្រទាញប្រទងគ្នាជាមួយប្រពន្ធ ធ្វើអោយ មានការភ្ញាក់ផ្អើលដល់អ្នកធ្វើដំណើរ និងសមត្ថកិច្ចដែលឈរជើងប្រចាំគោលដៅឃាត់ទាន់ពេល នាំមក ប៉ុស្ដិ៍គោលដៅទី៣ ដើម្បីធ្វើការសាកសួរ។ ភាពភ្ញាក់ផ្អើលនេះបានកើតឡើងកាលពីវេលាម៉ោង១០និង៣៥នាទីយប់ថ្ងៃទី២០ខែកុម្ភៈឆ្នាំ២០១៤ ត្រង់ចំណុចលើស្ពានជ្រោយចង្វា ស្ថិតក្នុងសង្កាត់ស្រះចក ខណ្ឌដូនពេញ។
បុរសជាប្ដីដែលប៉ងលោតទឹកសម្លាប់ខ្លួនជាមួយប្រពន្ធខាងលើឈ្មោះ វៀងយ៉ានទីន អាយុ២០ឆ្នាំមុខ របរលក់នំបុ័ងសាច់ ចំណែកប្រពន្ធឈ្មោះ យ៉ិន សុផល អាយុ២៨ឆ្នាំ មុខរបរលក់នំបុ័ងសាច់ដូចគ្នា អ្នកទាំង២ស្នាក់នៅសង្កាត់ទួលសង្កែ ខណ្ឌឬស្សីកែវ។
តាមសម្តីបុរសជាប្តីនិងប្រពន្ធទាំង២នាក់បានឲ្យអ្នកព័ត៌មានដឹងថាប្រមាណជា១ខែមុន ឪពុកខាងប្តីបានបបួលឲ្យទៅរកស៊ីនិងស្នាក់នៅជាមួយគាត់នៅម្ដុំច្បារអំពៅ បុរសជាប្តីចង់ទៅតែស្ដ្រីជាប្រពន្ធមិនព្រម ព្រោះនាងចង់រកស៊ីតែ២នាក់ប្តីប្រពន្ធគឺល្អជាងដោយការពិភាក្សាមិនចុះសម្រុងគ្នា លុះដល់ល្ងាចថ្ងៃកើតហេតុខាងលើនេះបុរសស្ដ្រីជាប្តីប្រពន្ធខាងលើក៏បានណាត់គ្នាមកលោតទឹកលើស្ពានជ្រោយចង្វាប៉ងធ្វើអត្តឃាតតែម្តងប៉ុន្តែពេលមកដល់ស្ដ្រីជាប្រពន្ធបានដូរចិត្តនិងបាននិយាយលួងលោមប្តី តែបុរសប្តីមិនព្រមក៏មានការទាញគ្នាចុះឡើងផ្អើលដល់ប្រជាពលរដ្ឋ និងសមត្ថកិច្ចមកជួយឃាត់ និងនាំយកទៅសាកសួរតែម្តង។
ចំពោះករណីខាងលើនេះ សមត្ថកិច្ចដែលនៅប្រចាំគោលអង្គភាពការពារគោលដៅទី៣ ហាក់បីដូចជា មិនសហការជាមួយអ្នកយកព័ត៌មានបែរជានិយាយថា អ្នកកាសែតមករញ៉េរញ៉ៃច្រើនពួកគេមិនអាច ធ្វើការបានទេ មិនដឹងមូលហេតុអ្វីបានជាលោកប៉ូលិសទាំងអស់នោះប្រើពាក្យបែបនេះ មកលើ អ្នកយកព័ត៌មាន ដូចជាចង់លាក់បាំងរឿងអ្វីមួយចឹង៕ 
