ភ្នំពេញ ៖ បុរសម្នាក់ជាអ្នករត់ម៉ូតូរ៉ឺម៉កកង់៣បានរងរបួសធ្ងន់ ខណៈកំពុងជិះធ្វើដំណើរហើយបត់រ៉ឺម៉កម៉ូតូត្រឡប់ក្រោយត្រូវរថយន្តមួយគ្រឿងបុកចំពេញទំហឹងធ្វើអោយរ៉ឺម៉កម៉ូតូកង់៣ក្រឡាប់ច្រង៉ាង ហើយរថយន្តបង្កបើករត់បាត់។ ហេតុការណ៍នេះបានកើតឡើងកាលពីវេលាម៉ោង១២និង៣០
នាទីរំលងអាធ្រាត្រឈានចូលថ្ងៃទី១ខែសីហាឆ្នាំ២០១៤ ត្រង់ចំណុចក្បែរប៉ុស្ដិ៍នគរបាលរដ្ឋបាលបឹងព្រលឹត តាមបណ្ដោយផ្លូវលេខ២១៤ ស្ថិតក្នុងសង្កាត់បឹងព្រលឹត ខណ្ឌ៧មករា។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញបុរសម្នាក់ជាអ្នករត់ម៉ូតូរ៉ឺម៉កកង់៣ បានជិះធ្វើដំណើរតាមបណ្ដោផ្លូវលេខ២១៤ ទិសដៅពីលិចទៅកើត ស្រាប់តែមកដល់ចំណុចកើតហេតុរ៉ឺម៉កម៉ូតូក៏បានបត់ឆ្វេងបំរុងត្រឡប់ក្រោយ ខណៈនោះក៏មានរថយន្តមួយគ្រឿងមិនចាំម៉ាកធ្វើដំណើរតាមបណ្ដោយផ្លូវលេខ២១៤ ទិសដៅពីកើតទៅលិចក្នុងល្បឿនយ៉ាងលឿនបុកចំរ៉ឺម៉កកង់៣ចំពេញទំហឹងបានធ្វើអោយបុរសជាអ្នករត់ម៉ូតូរ៉ឺម៉កកង់៣ប៉ើងខ្ទាតនិងក្រឡាប់រ៉ឺម៉ករងរបួសធ្ងន់ ចំណែករថយន្តបង្កបានបើករត់គេចបាត់ស្រមោល។ បន្ទាប់ពីកើតហេតុជនរងគ្រោះត្រូវបានរថយន្តសាមុយដឹកបញ្ជូនទៅសង្គ្រោះភ្លាមៗនៅមន្ទីរពេទ្យ ចំណែករ៉ឺម៉ូតូម៉ូតូសមត្ថកិច្ចបានរក្សាទុកនៅប៉ុស្ដិ៍នគរបាលបឹងព្រលឹតដើម្បីរង់ចាំបងប្អូនជនរងគ្រោះមកទទួលយកវិញ៕
