សៀរាប: នាយកដ្ឋានមរាមរមនាយកដ្ឋានដែនដីនៃអាជ្ញាធរជាតិអប្សរា ព្រមទាំងមន្ត្រីសាលាស្រុកបន្ទាយស្រី បានសហការគ្នាចុះជូនប័ណ្ណសរសើរ ដល់ប្រជាពលរដ្ឋចំនួន៧គ្រួសារ ដែលរស់នៅក្នុងតំបន់រមណីដ្ឋានអង្គរ នាឃុំចំនួន៤ដើម្បីលើកទឹកចិត្តចំពោះប្រជាពលរដ្ឋ ដែលបានសាង់សង់ផ្ទះខ្មែរ ត្រឹមត្រូវតាមការណែនាំ របស់អាជ្ញាធរជាតិអប្សរា។
ប្រជាពលរដ្ឋទាំង៧គ្រួសារ ដែលអាជ្ញាធរអប្សរា បានចុះជូនប័ណ្ណសរសើរ កាលពីព្រឹកថ្ងៃព្រហស្បតិ៍ ទី៤ខែកុម្ភៈឆ្នាំ២០២១នេះ គឺ៦គ្រួសាររស់នៅឃុំប្រដាក ស្រុកបន្ទាយស្រី និង១គ្រួសារទៀតរស់នៅឃុំរុនតាឯក ស្រុកបន្ទាយស្រីដែរ។
ឯកឧត្តម យិត ចាន់ដារដ្ឋ អគ្គនាយករងនៃអាជ្ញាធរជាតិអប្សរា ដែលបានអញ្ជើញជាអធិបតីនៃការជូនប័ណ្ណសរសើរនោះ មានប្រសាសន៍ថា៖តាមគោលការណ៍របស់រាជរដ្ឋាភិបាល គឺកំពុងប្រឹងប្រែងលើកតម្លៃផ្ទះខ្មែរ ក្នុងគោលបំណងថែរក្សាវប្បធម៌និងអត្តសញ្ញាណ របស់ខ្មែរឱ្យបានគង់វង្សយូរអង្វែង។
ឯកឧត្តម យិត ចាន់ដារដ្ឋ មានប្រសាសន៍ទៀតថា៖រមណីយដ្ឋានអង្គរគឺជាតំបន់វប្បធម៌ នៃអត្តសញ្ញាណ របស់ជាតិខ្មែរ ដូច្នេះការដែលពលរដ្ឋ រស់នៅក្នុងតំបន់រមណីយដ្ឋានអង្គរ សាង់សង់ផ្ទះសម្បែង យកតាមគំរូផ្ទះខ្មែរត្រឹមត្រូវ គឺជាការបង្ហាញឡើងនូវតម្លៃវប្បធម៌ ឱ្យមានកាន់តែយូរអង្វែងដែរ។
ម្ចាស់ផ្ទះខ្លះ នៅក្នុងឃុំប្រដាក និងឃុំរុន តាឯក ស្រុកបន្ទាយស្រី ដែលបានទទួលប័ណ្ណសរសើរពីអាជ្ញាធរជាតិអប្សរា ក្នុងការសាង់សង់ផ្ទះខ្មែរ បានត្រឹមត្រូវនោះ មានប្រសាសន៍ថា៖គាត់សែនត្រេកអរ ដោយមិននឹកស្មានថាផ្ទះ របស់គាត់អាចត្រូវបានអាជ្ញាធរចាត់ទុកជាអត្តសញ្ញាណនៃវប្បធម៌ របស់ជាតិខ្មែរដូចនេះឡើយ។
លោកហ៊ុន សម្បត្តិ អភិបាលរងស្រុកបន្ទាយស្រីបានរំពឹងថា៖ផ្ទះខ្មែរ ដែលអាជ្ញាធរអប្សរា បានចុះជូនប័ណ្ណសរសើរនេះ មិនត្រឹមតែជាអត្តសញ្ញាណនៃវប្បធម៌ របស់ខ្មែរប៉ុណ្ណោះទេ គឺតទៅមុខផ្ទះទាំងនោះអាចនឹងក្លាយទៅជាHome Stay ដែលអាចទាក់ទាញភ្ញៀវទេសចរណ៍បរទេស ឱ្យចាប់អារម្មណ៍ ព្រមទាំងឱ្យភ្ញៀវទាំងនោះ ចូលទៅស្នាក់នៅ ហើយបង្កើតជាការងារនិងកម្រៃដល់ប្រជាពលរដ្ឋថែមទៀតផង។
នាយកដ្ឋានដែនដីនៃអាជ្ញាធរជាតិអប្សរា មានគំរោងចុះជូនប័ណ្ណសរសើរ ដល់ប្រជាពលរដ្ឋដែលរស់នៅក្នុងរមណីយដ្ឋានអង្គរ ហើយសាងសង់ផ្ទះខ្មែរបានត្រឹមត្រូវនេះ នៅស្រុកអង្គរធំនិងស្រុកប្រាសាទបាគង ខេត្តសៀមរាប នៅពេលឆាប់ខាងមុខនេះទៀត។
លោក ស៊ឹម ប៊ុនធឿន អនុប្រធាននាយកដ្ឋានដែនដី នៃអាជ្ញាធរជាតិអប្សរា មានប្រសាសន៍ថា៖លោកសូមលើកទឹកចិត្តដល់ប្រជាពលរដ្ឋដែលរស់នៅក្នុងរមណីយដ្ឋានអង្គរ ពេលសាងសង់ផ្ទះគឺត្រូវនឹកឃើញដល់ផ្ទះខ្មែរ ពីព្រោះផ្ទះខ្មែរ មិនត្រឹមតែជាអត្តសញ្ញាណនៃវប្បធម៌ ប៉ុណ្ណោះទេ គឺវាមានទំនាក់ទំនងជិតស្និទ ជាមួយនិងអាកាសធាតុ មានទំនាក់ទំនងនិងជីវភាព មុខរបរប្រចាំថ្ងៃ ព្រមទាំងភ្ជាប់ទៅនិងជំនឿផង៕
