កំពង់ឆ្នាំង៖បន្ទាប់ពីមានការរិះគន់ថាគ្រូពេទ្យព្យាបាលជម្ងឺក្នុងមន្ទីរពេទ្យខេត្តកំពង់ឆ្នាំងទារយកលុយសេវាព្យាបាលពីអ្នកជម្ងឺមុនការពិនិត្យព្យាបាល ក្នុងពេលអ្នកជម្ងឺមកសំរាកក្នុងមន្ទីរពេទ្យរួចមក និងមានបាតុភាពមួយចំនួនថាគ្រូពេទ្យសំដីអាក្រក់ នៅរសៀសថ្ងៃទី៣១ ខែកក្កដា ឆ្នាំ២០១៤លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានធ្វើការប្រជុំជាមួយគ្រូពេទ្យ បុគ្គលិក កម្មករទាំងអស់ក្នុងមន្ទីរពេទ្យខេត្តកំពង់ឆ្នាំង ដើម្បីផ្សព្វផ្សាយសារាចរណ៍ណែនាំរបស់ក្រសួងស្តីអំពីការពង្រឹងវិន័យមន្ត្រីសុខាភិបាល ដើម្បីទប់ស្កាត់ និងបំបាត់បាតុភាពខាងលើនេះ។
នៅក្នុងកិច្ចប្រជុំនេះ លោក សូរិន្ទី រ៉ាវុឌ្ឍី ប្រធានមន្ទីរពេទ្យខេត្តបានលើកឡើងថា៖តាមគោលការរបស់មន្ទីរពេទ្យខេត្តកន្លងមក អ្នកជម្ងឺដែលចូលមកសំរាកព្យាបាលជម្ងឺក្នុងមន្ទីរពេទ្យខេត្ត មិនតម្រូវអោយបង់ប្រាក់ជាមុននោះទេគឺពេលអ្នកជម្ងឺនោះសំរាកព្យាបាល២ឬ៣ថ្ងៃទើបត្រូវបង់ប្រាក់ ប៉ុន្តែថ្លៃសេវាអមវិទ្យាសាស្ត្រ ពិនិត្យអេកូ ឬពិនិត្យឈាមក្នុងពេលសំរាកព្យាបាលគឺតម្រូវអោយបង់ប្រាក់។ព្រោះថាកន្លងមកក្នុង១ខែមានអ្នកជម្ងឺមានលទ្ធភាពបង់ប្រាក់ មិនក្រោម១០នាក់ទេបានលួចរត់ចេញមិនព្រមបង់ប្រាក់ហិរញ្ញប្បទានថ្លៃសេវាព្យាបាលអោយមន្ទីរពេទ្យខេត្ត។ដោយឡែកអ្នកជម្ងឺខាងក្រៅ ដែលមកពិគ្រោះព្យា បាលជម្ងឺមិនសំរាកក្នុងពេទ្យ ត្រូវពិនិត្យអេកូឬពិនិត្យឈាមគឺត្រូវអោយបង់ប្រាក់មុនពិតមែនហើយ មិនខុសពីមន្ទីរពេទ្យផ្សេងៗក្នុងប្រទេសយើងឡើយ។
ចំណែកពាក្យសំដីអសីលធម៌របស់គ្រូពេទ្យ ឬកម្មករផ្នែកអនាម័យវិញនោះ ស្ត្រីជាកម្មករផ្នែកអនាម័យម្នាក់បានលើកឡើងថា៖គាត់ធ្លាប់ប៉ះសំដីខ្លះជាមួយក្រុមគ្រួសារកំដរអ្នកជម្ងឺគ្មានអនាម័យខ្លះពិតមែន ព្រោះថាពួកគាត់បានប្រើកន្ថោរលាមកឬទឹកនោមកំពប់បាចសាចពេញក្រោមគ្រែនិងបន្ទប់ដេក នៅពេលពួកគាត់ជាកម្មករត្រូវបោសជូតបន្ទប់ អ្នកជម្ងឺពិបាកៗនិយាយស្រួលមិនព្រមស្តាប់ទេ ដើរចេញដើរចូលលើឥដ្ឋការ៉ូដែលមិនទាន់ជូតមិនទាន់ស្ងួតទើបប៉ះសំដីគ្នា នេះគឺជារឿងពិតទំពួកមិនទៅក៏ព្នៅមិនមកដែរ។
អ្នកគ្រូពេទ្យម្នាក់ធ្វើការនៅក្នុងអាគារសម្ភពបានលើកឡើងដែរថា៖ពេលហត់នឿយខ្លាំងពេកម្តងៗ ក្នុងពេលខ្លះបង្កើតកូនក្នុង១យប់ជាង១០នាក់ ពេទ្យឆ្មបរបស់គាត់ក៏បានប៉ះសំដីជាមួយអ្នកជម្ងឺពិបាកៗខ្លះដែរ ដោយពេលខ្លះព្រោះតែគាត់ភ័យនិងកូនប្រពន្ធឈឺពោះសំរាលកូន ក្នុង១យប់ៗហៅគ្រូពេទ្យបួនដប់ដងក៏មានទោះបីគ្រូពេទ្យពិនិត្យហើយប្រាប់ថា កូននោះមិនទាន់កើតក៏ដោយ។
លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំងបានអប់រំណែនាំដល់គ្រូពេទ្យ បុគ្គលិកកម្មករទាំងអស់ក្នុងមន្ទីរពេទ្យខេត្ត ដែលបានមកចូលរួមប្រជុំចំនួន១៤៤នាក់ស្មើនិង៩៥%នៃចំនួនរួមថា៖តាមសារាចរលេខ០៤៣ ចុះថ្ងៃទី០៩ ខែកក្កដា ឆ្នាំ២០១៤ ស្តីអំពីការពង្រឹងវិន័យមន្ត្រីសុខាភិបាល របស់រដ្ឋមន្ត្រីក្រសួងសុខាភិបាល បានណែនាំដល់មន្ទីរពេទ្យ មណ្ឌលសុខភាព ប៉ុសសុខភាព គ្រប់ខេត្តក្រុងថា៖ ១.បន្តអនុវត្តន៍អោយបានដាច់ខាតនូវក្រមសីលធម៌វិជ្ជាជីវៈ ២.ប្រកាន់អត្តចរិកស្លូតបូតសុភាពរាបសារចំពោះអ្នកជម្ងឺ អោយបានជាប្រចាំពិសេសចំពោះ
ជនក្រីក្រ ៣.មិនត្រូវចាត់ទុកការងារហិរញ្ញប្បទានជាធំ ទេ បានសេចក្តីថា ត្រូវគិតការពិនិត្យថែទាំ និងព្យាបាលជម្ងឺជាមុន ទើបគិតថ្លៃសេវាជាក្រោយ ៤.ធ្វើយ៉ាង ណាបញ្ចប់បារតុភាពទុកអ្នកជម្ងឺចោល មិនពិនិត្យ មិនថែទាំ និងមិនព្យាបាល ដោយមូលហេតុខ្វះថវិកា សំរាប់បង់ថ្លៃសេវា ចាប់ពីពេលចេញសារាចរនេះទៅ។ក្នុងករណីមានបាតុភាពកើតឡើងនៅក្នុងអង្គភាព ឬបង្កដោយបុគ្គលិកសុខាភិបាលណាម្នាក់ ក្រសួងសុខាភិបាលនឹងអនុវត្តន៍វិន័យយ៉ាងតឹងរ៉ឹងបំផុតមិនអត់ ឱនអោយឡើយ។
លោក ប្រាក់ វ៉ុន ប្រធានមន្ទីរសុខាភិបាលខេត្តបានផ្តាំផ្ញើថា៖សូមលោកគ្រូ អ្នកគ្រូពេទ្យទាំងអស់គោរពនិងអនុវត្តន៍អោយបាននូវសារាចរណែនាំរបស់ក្រសួងសុខាភិបាល ខាងមុខនេះដើម្បីទប់ស្កាត់បាតុភាពខាងលើមន្ទីរពេទ្យខេត្ត នឹងបង្កើតបន្ទប់ផ្តល់ប្រឹក្សាមួយសំរាប់អ្នកជម្ងឺ អាចសួរនាំអំពីចម្ងល់ផ្សេងៗ ។នៅឆ្នាំ២០១៥នឹងបង្កើតសង់គ្រីយ៉ាមួយ(បន្ទប់ច្រកចេញចូលតែមួយ)ដែលមានគ្រូពេទ្យ មន្ត្រីអង្គការរ៉ាក់ជាអ្នកសម្របសម្រួល ជួយចេញថ្លៃសេវាជូនជនក្រីក្រ និងភ្នាក់ងារហិរញ្ញប្បទានរបស់មន្ទីរពេទ្យខេត្ត ធ្វើការរួមគ្នា ដោះស្រាយការងារទូទៅសំរេចអោយបាននូវលទ្ធផលល្អបញ្ចប់បាតុភាពផ្សេងៗ៕