កំពង់ចាម៖ នៅរៀលថ្ងៃទី៣១ ខែកក្កដា ឆ្នាំ២០១៤ ការិយាល័យនគរបាលប្រឆាំងគ្រឿងញៀន បានចុះប្រតិបត្តិការបង្ក្រាប ករណីជួញដូរគ្រឿងញៀន ១ករណី ក្នុងក្រុងកំពង់ចាម ដោយឃាត់ខ្លួនជនសង្ស័យបានចំនួន៣នាក់ និងរឹបអូសដកហូតវត្ថុតាងថ្នាំញៀន ក្រាមពណ៌សមួយចំនួន ។ 
លោក វរៈសេនីយ៍ទោ សោម រស់ នាយការិយាល័យប្រឆាំងគ្រឿងញៀន បានឲ្យដឹងថា កម្លាំងស៊ើបអង្កេតបានផ្តល់ព័ត៌មានយ៉ាងច្បាស់ថា មានករណីជួញដូរ ចែកចាយគ្រឿងញៀនក្នុងក្រុងកំពង់ចាមភ្លាម លោកបានរាយការណ៍ ទៅលោកស្នងការ លោកព្រះអមសាលាដំបូងខេត្ត ដើម្បីសុំគោលការណ៍បង្ក្រាប មានបទបញ្ជា លោកបានដឹកនាំកម្លាំងចុះប្រតិបត្តិការបង្ក្រាប ចំណុចក្រោយធនាគារហត្ថាកសិករ ស្ថិតក្នុងភូមិទី៦ សង្កាត់វាលវង់ ក្រុង-ខេត្តកំពង់ចាម ។ ជាលទ្ធផល កម្លាំងបានឃាត់ខ្លួនជនសង្ស័យបានចំនួន៣នាក់ រួមមាន ១-ឈ្មោះ សាន់ ពិសិដ្ឋ ភេទប្រុស អាយុ២១ឆ្នាំ រស់នៅភូមិទី៦ សង្កាត់វាលវង់ ក្រុង-ខេត្តកំពង់ចាម ។
២-ឈ្មោះ ឃាង លីហ៊ុយ ភេទប្រុស អាយុ១៩ឆ្នាំ រស់នៅភូមិដាលើ ឃុំបឹងរាំង ស្រុកកំរៀង ខេត្តបាត់ដំបង ។ និងជនសង្ស័យទី៣-ឈ្មោះ វ៉ាន់ ឌីរស្មី ហៅ ជាន ភេទប្រុស អាយុ២១ឆ្នាំ រស់នៅភូមិទេពនិមិត្ត ឃុំគរ ស្រុកត្បូងឃ្មុំ ខេត្តត្បូងឃ្មុំ ។ ក្នុងប្រតិបត្តិការនេះដែរ កម្លាំងបានរឹបអូសដកហូតវត្ថុតាង ប្រភេទក្រាមពណ៌ស បានចំនួន២៧កញ្ចប់តូច ទូរស័ព្ទដៃចំនួន៥គ្រឿង ម៉ូតូសគុបពី១គ្រឿង និង ឧបករណ៍សេពគ្រឿងញៀន សំភារៈវេចខ្ចប់មួយចំនួនធំផងដែរ ។ ករណីនេះ ជំនាញបានកសាងសំណុំរឿងបញ្ជូនទៅតុលាការ ដើម្បីចាត់ការទៅតាមនីតិវិធី ៕
