កំពង់ចាម៖ ក្រោយពីបានសិក្សា ខាងផ្នែកទ្រឹស្តី ពាក់ព័ន្ធលើផ្នែកកសិកម្ម លើផ្នែកអភិវឌ្ឍន៍ជនបទ និងលើផ្នែកគំរោងនានា ក្រុមនិស្សិតជាតិកសិកម្មកំពង់ចាម នៅព្រឹកថ្ងៃទី៣១ ខែកក្កដា ឆ្នាំ២០១៤ បានចុះធ្វើកម្មសិក្សា ចំណុច សហគមន៍អភិរក្សស្រះជម្រកត្រីទំនប់បេង ស្ថិតក្នុងឃុំអំពិល ស្រុកកំពង់សៀម ខេត្តកំពង់ចាម ដើម្បីផ្តិតយករូបភាពពិត ពីលក្ខណៈបឹងធម្មជាតិ ដែលពោពេញដោយសក្តានុពល មានជីវៈចំរុះ ទឹកផុសហូរជាប្រចាំ ក្នុងបំណងចង់កែច្នៃ ធនធានធម្មជាតិ ឲ្យទៅជាប្រយោជន៍ដល់ប្រជាពលរដ្ឋក្នុងតំបន់នេះ ខិតខំរិះរក គំរោងនានា និងផ្តល់លក្ខណៈបច្ចេកទេស ដល់ប្រជាកសិករផងដែរ ។
លោក អ៊ុំ សួង ឌី ប្រជាកសិកររស់នៅ ភូមិអំពិលក្រោម ឃុំអំពិល ស្រុកកំពង់សៀមខេត្តកំពង់ចាម បានឲ្យដឹងថា បឹងធម្មជាតិទំនប់បែងនេះ មានទំហំ ១៧ហិចតា ក្រោយពីខាងអាជ្ញាធរ និងខាងគម្រោងអភិវឌ្ឍន៍ជនបទខេត្ត បានកសាងទំនប់ទប់ទឹក មានទ្វារបិតបើកទឹក ហើយខាងសាលាជាតិកសិកម្មកំពង់ចាម បានបង្កើតសហគមន៍អភិរក្សស្រះជម្រកត្រីទំនប់បេង ថែមទាំងបានប្រលែងត្រីមេពូជជាង២០០គីឡូក្រាមរួចមក ( ត្រីផ្ទក់ អណ្តែង ត្រីក្រាញ់ )រួចមក ឃើញថា ទឹកនេះអាចយកទៅស្រោចស្រពលើផ្ទៃដីចំនួន៧៥ហិចតា ស្ថិតក្នុង៧ភូមិ មានភូមិ អំពិលក្រោម ភូមិខ្ចា ភូមិរមាស ភូមិបន្ទាយថ្ម ភូមិភ្លា ភូមិស្ទឹង និងភូមិជើងគោក ស្ថិតក្នុងឃុំអំពិល ។
បឹងមានលក្ខណៈពិសេស គឺមានទឹកផុសចេញពីក្នុងដីនៅខាងលើ ពីដើម ហៅថាក្បាលហុង ចាប់ពីកសាងទំនប់មកឃើញថា ត្រីសំបូរជាងមុន អាចរកជាលក្ខណៈបានស្រួលជាងមុន ។ ចំពោះការធ្វើស្រែ ប្រជាកសិកររបស់យើងធ្វើបានតែមួយរដូវទេគឺនៅរដូវវស្សា យើងចង់ធ្វើស្រូវបង្កើនរដូវដែរ តែត្រូវសត្វល្អិតវាបំផ្លាញអស់ទាំងស្រុង កន្លងមកមានខាងប្រាសាក់របស់មន្ទីរកសិកម្មខេត្ត បានមកសុំដីប្រជាកសិករយើងធ្វើស្រែប្រាំងសាកល្បងចំនួន២ហិចតាដែរ តែត្រូវសត្វល្អិតវាបំផ្លាញខេ្ទចអស់ ហើយពិសេសតំបន់នេះ នៅរដូវប្រាំងប្រជាកសិករ ពួកគាត់ប្រលែង គោ ក្របី វាអាចស៊ីបំផ្លាញដែរ ។
បើយើងចង់ធ្វើស្រែបង្កើនរដូវទល់តែយើងធ្វើទាំងអស់គ្នា នោះទើបទប់ទល់នឹងការបំផ្លាញពីសត្វល្អិតចង្រៃនេះបាន ។ លោកអ៊ុំបានបន្ថែមទៀតថា នៅរដូវប្រាំងប្រជាកសិករមានដាំដំណាំរួមផ្សំខ្លះដែរ ដូចជា ឥឡឹក ត្រសក់ ជាដើម ។ ហើយលោកអ៊ុំក៏បានសំណូមពរដល់និស្សិតឲ្យជួយផ្តល់ បច្ចេកទេស ផ្នែក កសិកម្ម និង ការជ្រើសរើសពូជស្រូវ ដំណាំផ្សេងៗ ការចិញ្ចឹមមាន់ វារីវប្បកម្ម (ការចិញ្ចឹមត្រីក្នុងស្រែ) រួមទាំងការប្រើប្រាស់ជីទៅតាមកំរិតបច្ចេកទេសកសិកម្មដើម្បីធានានិងលើកស្ទួយជីវភាពគ្រួសារឲ្យប្រសើរឡើង ។
លោក ឡៅ គឹមហេង ប្រធានដេប៉ាដឺម៉ង់ សេដ្ឋកិច្ចកសិកម្ម និងអភិវឌ្ឍន៍ជនបទសាលាកសិកម្មជាតិកំពង់ចាម បានឲ្យដឹងថា ការដឹកនាំនិស្សិត ចុះមកធ្វើកម្មសិក្សានេះ ក្នុង គោលបំណង សិក្សាស្វែងយល់អំពី ស្ថានភាពទូទៅ នៅជនបទជាក់ស្តែង ដើម្បីផ្សារភ្ជាប់ ទ្រីស្តី និងការអនុវត្ត ណែនាំនិស្សិតសិក្សាអំពីសក្តានុពលធនធានធម្មជាតិទំនប់បែង មានជីវៈចំរុះ ទឹកហូរខួប ប្រាំងវស្សា កែច្នៃធ្វើយ៉ាងណាឲ្យប្រជាកសិករប្រើឲ្យអស់លទ្ធភាព ។
ណែនាំសិក្សាអំពីបញ្ហាប្រឈមដែលកើតមាន ណែនាំនិស្សិត សិក្សាគម្រោងស្រាវជ្រាវ អភិវឌ្ឃន៍មូលដ្ឋានដែលតម្រូវឲ្យ ការប្រើប្រាស់ធនធានធម្មជាតិ និងបញ្ហានានាកឲ្យទៅជាប្រយោជន៍ និងដោះស្រាយបញ្ហានៅក្នុងតំបន់ ។ លោកប្រធាន ដេប៉ាតឺម៉ង់ ក៏បានបញ្ជាក់ដែរថា ក្រុមនិស្សិត និងសាលាជាតិកសិកម្មអំពាវនាវដល់ប្រជាកសិករ ជំរុញឲ្យប្រជាកសិករធ្វើស្រូវបង្កើនរដូវឲ្យបានគ្រប់ៗគ្នា និងដំណាំរួមផ្សំផ្សេងៗឲ្យផុលផុស ដើម្បីឲ្យជីវភាពបានប្រសើរឡើង ហើយក្រុមនិស្សិតនិងសាលា នឹងចូលរួមផ្តល់នូវបច្ចេកទេស ៕