កីឡាករ Jack Rodwell បានធ្វើដំណើរមកដល់កន្លែងវឹកហាត់របស់ក្លិបឆ្មាខ្មៅ Sunderland ហើយដើម្បីធ្វើការ ពិនិត្យសុខភាពផ្លាស់មកកាន់ក្លិបនេះក្រោយចាកចេញពីមេឃខៀវ Manchester City ។
ខ្សែបម្រើវ័យ២៣ឆ្នាំដែលធ្លាប់បង្ហាញខ្លួនបាន៣លើកឲ្យក្រុមជម្រើសជាតិអង់គ្លេសរូបនេះបានឈានដល់កិច្ច ព្រមព្រៀងលក្ខ័ណ្ឌផ្ទាល់ខ្លួនរួចរាល់ហើយជាមួយក្លិបឆ្មាខ្មៅហើយត្រូវបានគេរំពឹងថា នឹងចុះកិច្ចសន្យារយៈពេល៥ឆ្នាំនៅ ទឹកដី Stadium of Light ។
យោងតាមសារព័ត៌មាន Sky Sports News បានចុះផ្សាយថា កិច្ចព្រមព្រៀងជាផ្លូវការចំពោះការផ្ទេររបស់ Rodwell ទៅកាន់ Sunderland នឹងត្រូវបានគេសម្រេចឡើងនៅរយៈពេល២៤ម៉ោងក្រោយនេះ ។
គួរបញ្ជាក់ថា Rodwell បានផ្លាស់ចេញពីទូកក្តោង Everton ទៅកាន់ Man City នៅឆ្នាំ ២០១២ ក្នុងតម្លៃខ្លួន ១២លានផោនប៉ុន្តែអាជីពរបស់គេនៅទឹកដី Etihad Stadium ត្រូវបានរំខានដោយបញ្ហារបួស ៕
