ត្បូងឃ្មុំ៖ ប្រជាពលរដ្ឋចំនួន១២៦គ្រួសារ សូមឲ្យអាជ្ញាធរខេត្តត្បូងឃ្មុំ ជួយដោះស្រាយបញ្ហាដីធ្លីរបស់ពួកគាត់ ដែលបានអាស្រ័យផលយូរមកហើយ ឥលូវត្រូវក្រុមហ៊ុន ម៉ែន សារុន រំលោភឈូសឆាយ ។ លោក ថុន សុផល តំណាងប្រជាពលរដ្ឋបានឲ្យដឹងថា នៅព្រឹកថ្ងៃទី៥ ខែសីហា ឆ្នាំ២០១៤ នេះ មានប្រជាពលរដ្ឋ ចំនួន១២៦គ្រួសារ បាននាំគ្នាមកតវ៉ាដល់នៅមុខសាលាខេត្តត្បូងឃ្មុំ ក្នុងបំណងសូមឲ្យលោក អភិបាលខេត្តត្បូងឃ្មុំ មេត្តាជួយដោះស្រាយបញ្ហាដីធ្លី ចំនួន៣៤០ហិកតា ចំណុច ព្រៃពលប្រម៉ា ច្រក់របង ទួលស្រឡៅ ព្រែកស្ទឹងស្រី និង ទួលគ្រោះ ស្ថិតនៅខាងជើងភូមិថ្មតាដោក ឃុំជាំក្រវៀន ស្រុកមេមត់ ខេត្តត្បូងឃ្មុំ ។
ដីនេះប្រជាពលរដ្ឋចំនួន៦១៧គ្រួសារ នៅក្នុងឃុំជាំក្រវៀន ឃុំចាន់មូល ឃុំរូង ស្ថិតក្នុងស្រុកមេមត់ និងភូមិពញាក្រែក ឃុំវាលម្លូរ ស្ថិតក្នុងស្រុកពញាក្រែក ពួកគាត់ទទួលអាស្រ័យផលយូរឆ្នាំមកហើយ មានដាំដំណាំ ដំឡូងមី ពោត ស្វាយចន្ទី កៅស៊ូ ចេក និង សាងសង់លំនៅដ្ឋានទៀតផង ។ លោក ថុន សុផល បានបញ្ជាក់ឲ្យដឹងទៀតថា ស្រាប់តែពេលឥលូវនេះ មានក្រុម ហ៊ុន ម៉ែន សារុន ចេញមុខមកអះអាងថាជាដីរបស់ខ្លួន ហើយបានយកគ្រឿងចក្រចូលមកកាយ ក្រវ៉ាត់ ហ៊ុំព័ទ្ធ ដើម្បីយកដីប្រជាពលរដ្ឋទៅវិញ ។
លើកទី១-នៅថ្ងៃទី៦ ខែកុម្ភៈ ឆ្នាំ២០១៤ លើកទី២-នៅថ្ងៃទី៥ ខែកក្កដា ឆ្នាំ២០១៤និងលើកទី៣-នៅថ្ងៃទី២៧-២៨-២៩និងទី៣០ ខែកក្កដា ឆ្នាំ២០១៤ ហើយនឹងបន្តការឈូសឆាយ លើដំណាំរបស់គាត់ ទើបប្រជាពលរដ្ឋទាំងអស់នោះ នាំគ្នាមកសូមឲ្យលោក អភិបាលខេត្តជួយដោះស្រាយ ដោយអនុគ្រោះជូនពួកគាត់ផង ។