ភ្នំពេញ៖ យុវជន២នាក់ជិះម៉ូតូមួយគ្រឿងរត់គេចពីការតាមដេញវាយរបស់យុវជនមួយក្រុមក៏ជ្រុលទៅបុករថយន្តមួយគ្រឿងចំពេញទំហឹងបណ្ដាលអោយហោះផ្លោងបោកនិងថ្នល់រងរបួសធ្ងន់ស្រាល ចំណែករថយន្តរងការខូចខាតបន្តិចបន្តួចមិនចង់មានរឿងវែងឆ្ងាយក៏បើកចេញទៅ
បាត់។ ហេតុការណ៍នេះបានកើតឡើងកាលពីវេលាម៉ោង១១និង៤៥នាទីយប់ថ្ងៃទី៧ខែសីហាឆ្នាំ២០១៤ តាមបណ្ដោយផ្លូវលេខ២៧១កែងផ្លូវលេខ៤៨៨ ស្ថិតក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។ ប្រភពព័ត៍មានពីកន្លែងកើតហេតុបានអោយដឹងថា នៅមុនពេលកើត ហេតុគេបានឃើញយុវជន២នាក់ជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៍ខ្មៅ ពាក់ស្លាក់លេខ ភ្នំពេញ 1BO-0425 ធ្វើដំណើរតាមបណ្ដោយផ្លូវលេខ៤៨៨ក្នុងល្បឿនយ៉ាងលឿន ទិសដៅពីកើតទៅលិច ដោយជិះរត់គេចពីការតាមដេញវាយរបស់យុវជនមួយក្រុមឆ្ពោះឡើង ទៅផ្លូវលេខ២៧១ក៏ជ្រុលទៅបុករថយន្តមួយគ្រឿងមិនចាំម៉ាកកំពុងធ្វើដំណើរតាមបណ្ដោយផ្លូវលេខ២៧១ទិសដៅពីត្បូងទៅជើងចំពេញទំហឹងបណ្ដាលអោយយុវជនទាំង២នាក់ហោះផ្លោងបោកនិងថ្នល់រងរបួសធ្ងន់ស្រាល។បន្ទាប់ពីកើតហេតុរថយន្តរងការខូចខាតបន្តិចបន្តួចហើយមិនចង់មានរឿងវែងឆ្ងាយក៏បើកចេញទៅបាត់ចំណែកជនរងគ្រោះរបួសធ្ងន់ត្រូវបានរថយន្តសាមុយដឹកបញ្ជូនទៅមន្ទីរពេទ្យភ្លាមៗ..រីឯម៉ូតូសមត្ថកិច្ចបានយកទៅរក្សាទុករង់ចាំជនរងគ្រោះមកទទួលយកវិញ៕
