ភ្នំពេញ ៖ យុវជនម្នាក់ជិះម៉ូតូមួយគ្រឿងក្នុងល្បឿនលឿនស្រាប់តែមានម៉ូតូមួយគ្រឿងជិះដោយបុរស២នាក់បញ្ច្រាស់ផ្លូវក៏បុកគ្នាចំពេញទំហឹងបណ្ដាលអោយបុរសម្នាក់រងរបួសធ្ងន់និងស្រាល២នាក់។ ហេតុការណ៍នេះបានកើតឡើងកាលពីវេលាម៉ោង១២និង១០នាទីរំលងអាធ្រាត្រ
ឈានចូលថ្ងៃទី៨ខែសីហាឆ្នាំ២០១៤ ត្រង់ចំណុចមុខភោជនីយដ្ឋាន ទន្លេបាសាក់ តាមបណ្ដោយផ្លូវម៉ៅសេទុងកែងផ្លូវលេខ១៦៣ ស្ថិតក្នុងសង្កាត់ទួលស្វាយព្រៃ២ ខណ្ឌចំការមន រាជធានីភ្នំពេញ។
ប្រភពព័ត៍មានពីកន្លែងកើតហេតុបានអោយដឹងថានៅមុនពេលកើតហេតុគេបានឃើញយុវជនម្នាក់ជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៍ខ្មៅ ពាក់ស្លាក់លេខ ភ្នំពេញ 1CM-2448 ធ្វើដំណើរតាមបណ្ដោយផ្លូវម៉ៅសេទុងក្នុងល្បឿនយ៉ងលឿន ទិសដៅពីកើតទៅលិច ស្រាប់តែមកដល់ចំណុចកើតហេតុក៏មានម៉ូតូវីវ៉ា ពណ៍ខ្មៅមួយគ្រឿង មិនមានស្លាកលេខ ជិះដោយបុរស២នាក់បានជិះធ្វើដំណើរតាមបណ្ដោយផ្លូវម៉ៅសេទុង ទិសដៅពីលិចទៅកើតបញ្ច្រាស់ផ្លូវក៏បានបុកគ្នាចំពេញទំហឹងបណ្ដាលអោយបុរសម្នាក់ជិះម៉ូតូ វីវ៉ារងរបួសធ្ងន់សន្លប់ស្ដូកស្ដឹងនិងម្នាក់ទៀតរងរបួសស្រាលហើយបានរត់គេចពីកន្លែងកើតហេតុបាត់ ចំណែកយុវជនដែលជិះម៉ូតូហុងដាឌ្រីមរងរបួសស្រាលដាច់រលាត់មុខនិងដៃជើងចេញឈាម។
បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍ភ្លាមៗនិងបានហៅរថយន្តសាមុយដឹកបញ្ជូនជនរងគ្រោះទៅសង្គ្រោះនៅមន្ទីរពេទ្យភ្លាមៗផងដែរ ចំណែកម៉ូតូសមត្ថកិច្ចបានធ្វើការវាស់វែង និងយកមករក្សាទុកដើម្បីរង់ចាំធ្វើការដោះស្រាយគ្នាតាមផ្លូវច្បាប់ជាក្រោយ ៕
