ខេត្តប៉ៃលិន ៖ យ៉ាងហោចណាស់មនុស្ស២នាក់បានរងរបួសស្រាល-ធ្ងន់ បន្ទាប់ពីបើកបរម៉ូតូក្នុងស្ថានភាពស្រវឹង លឿនដូចហោះ ទៅបុកម៉ូតូមួយគ្រឿងទៀតក្នុងទឹសដៅស្របគ្នា ដែលបម្រុងនិងស៊ីញ៉ូរបទធ្វេង ។ ហេតុការណ៍គ្រោះថ្នាក់ចរាចរណ៏នេះ បានកើតឡើងកាលពីវេលាម៉ោង៦និង៤០នាទីព្រឹក ថ្ងៃទី១១ ខែសីហា ២០១៤ ស្ថិតនៅលើបណ្តោយផ្លូវជាតិលេខ៥៧ ក្នុងភូមិខ្លុង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។ ជនរងគ្រោះ ឈ្មោះ ស៊ុន សុភឿន ភេទស្រី អាយុ២៦ឆ្នាំ រស់នៅភូមិខ្លុង សង្កាត់អូរតាវ៉ៅ ក្រុងប៉ៃលិន រងរបួសស្រាល ដោយបើកបរម៉ូតូម៉ាកឌ្រីមពណ៌ខ្មៅ ស៊េរីឆ្នាំ២០១៣ ពាក់ស្លាកលេខ ប៉ៃលិន 1A-8489 ។ 
ចំណែកជនបង្កហេតុ ឈ្មោះ ជា សារ៉េត ភេទប្រុស អាយុ៣០ឆ្នាំ ជាអ្នកបើកបរម៉ូតូ រងរបួសស្រាល និងអ្នករួមដំណើរ ឈ្មោះ ជា យ៉ារ័ត្ន ភេទប្រុស អាយុ៣១ឆ្នាំ រស់នៅភូមិព្រៃមង្គល សង្កាត់អូរតាវ៉ៅ ក្រុងប៉ៃលិន ដូចគ្នា រងរបួសបែកក្បាលផ្នែកខាងក្រោយសន្លប់និងកន្លែង ។ បើកបរម៉ូតូម៉ាកវ៉េវអេសពណ៌ទឹកប្រាក់ ស៊េរីឆ្នាំ២០១៣ ពាក់ស្លាកលេខ បន្ទាយមានជ័យ 1F-2038 រងការខូចខាតបែកកង់មុខ ។
ប្រភពព័ត៌មានពីសាក្សីបានឱ្យដឹងថា មុនពេលកើតហេតុគេឃើញស្ត្រីរងគ្រោះបានបើកម៉ូតូមកពីដឹកកូនទៅរៀន ក្នុងទិសដៅពីលិចទៅលិចទៅកើត លុះដល់កន្លែងកើតហេតុ ស្ត្រីខាងលើបានស៊ីញ៉ូបត់ឆ្វេង ខណៈនោះស្រាប់តែមានម៉ូតូមួយគ្រឿងទៀត បើកបរដោយបុរសពីរនាក់ស្ថិតក្នុងសភាពស្រវឹងជោគជាំ ដោយល្បឿនយ៉ាងលឿនបានជ្រុលទៅបុកគូទម៉ូតូស្ត្រីរងគ្រោះពីក្រោយ បណ្តាលឱ្យធ្លាក់បុរសម្នាក់ដែលជិះខាងក្រោយ បោកក្បាលទៅនឹងថ្នល់ សន្លប់ស្តូកស្តឹង។
ក្រោយពេលកើតហេតុ គេឃើញរថយន្តសង្គ្រោះដឹកជនរងគ្រោះដែលរងរបួសធ្ងន់ ទៅនៅមន្ទីរពេទ្យឯកជនក្នុងក្រុងប៉ៃលិន ចំណែកឯស្ត្រីរងគ្រោះរបួសស្រាល ទៅសម្រាកព្យាបាលនៅផ្ទះរបស់ខ្លួន ។ សមត្ថកិច្ចចរាចរណ៍ជើងគោកនៃអធិការក្រុងប៉ៃលិន បានឱ្យដឹងថា ក្រោយពីធ្វើការវាស់វែងរួចជនបង្ក រួមទាំងម៉ូតូ ត្រូវបានសមត្ថកិច្ច យកទៅរក្សាទុកនៅអធិការក្រុងប៉ៃលិន រង់ចាំឱ្យភាគីទាំងសងខាងចូលមកធ្វើការដោះស្រាយតាមផ្លូវច្បាប់ ៕
