ព្រឹកថ្ងៃទី១០ ខែសីហា ឆ្នាំ២០១៤ សភាយុវពាណិជ្ជករអន្តរជាតិកម្ពុជា សាខាចតុមុខ ប្រមាណជា ៣០០នាក់ សហការជាមួយអាជ្ញាធរខេត្តព្រះសីហនុរៀបចំដាំកូនឈើរចំនួន ០៧ប្រភេទ ស្មើនឹង ២.៧០០ដើម មានដើមរំដួល ដើមចំប៊ី ដើមត្របែកព្រៃ ដើមលឿងរាជ ដើមក្ងោក ដើមពោធិ និងដើមក្រញូង នៅតាមដងរុក្ខវិថីសំខាន់ៗទាំង៧ ក្នុងក្រុងព្រះសីហនុ ដោយមានការអញ្ញើញចូលរួមពីមន្ត្រីរាជការ កងកម្លាំងប្រដាប់អាវុធ និស្សិត្យ ប្រជាពលរដ្ឋ ក្រោមអធិបតីភាពឯកឧត្តម ឈិត សុខុន អភិបាលនៃគណះអភិបាលខេត្តព្រះសីហនុ ។
ឯកឧត្តម ឈិត សុខុន អភិបាលខេត្តព្រះសីហន មានប្រសាសន៌ស្វាគមន៌នៃការដាំ កូនឈើ ព្រោះដើមឈើគឺជាជីវិត ម្យ៉ាងទៀតការដាំដើមឈើរមានសារសំខាន់ណាស់ ធ្វើឲ្យទីក្រុងរបស់យើងជាទីក្រុងទេសចរណ៌មានបរិស្ថានល្អ មានពណ៌បៃតង ដើមឈើជួយដល់ការប្រែប្រួលអាកាសធាតុ ហើយការដាំដុះកូនឈើក្រោមពាក្យស្លោក ទេសចរណ៌ម្នាក់ ដាំដើមឈើមួយដើម ។ ព្រៃឈើគឺជាជីវិតជីវះចម្រុះ ការរស់នៅបង្ហាញឲ្យឃើញនូវកាយកចិត្តទុកដាក់ពីមនុស្សមួយជំនាន់ទៅមួយជំនាន់ ធ្វើឲ្យយុវជនជំនាន់ក្រោយចាប់អារម្មណ៌ចូលរួមដាំដើមឈើបន្តទៀត និងគ្រប់ទីកន្លែងក្នុងទូទាំងព្រះរាជាណាចក្រកម្ពុជា ។
អាជ្ញាធរខេត្តព្រះសីហនុ បានបន្តធ្វើការអប់រំផ្សព្វផ្សាយដល់ប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ និងអង្គការសង្គមស៊ីវិលនាំគ្នាដាំដើមឈើ និងថែរក្សាដើមឈើឲ្យបានគង់វង្ស ជារមណីយដ្ឋានធម្មជាតិមួយមានពណ៌បៃតងស្រស់ត្រកាលទាក់ទាញភ្ញៀវទេសចរជាតិ និងអន្តរជាតិ ។ កិច្ចសហការល្អ កើតចេញពីកម្លាំងរួមសាមគ្គីគ្នារវាងសភាយុវពាណិជ្ជករអន្តរជាតិកម្ពុជា សាខាចតុមុខ ជាមួយអាជ្ញាធរខេត្តនាពេលនេះបានបំផុសឲ្យប្រជាពលរដ្ឋក្នុងសង្គមគ្រួសារឲ្យចូលរួមដាំដើមឈើក្នុង០១គ្រួសារ ម្នាក់០១ដើម នៅតាមដងផ្លូវ និងមុខផ្ទះរបស់ខ្លួន ។
ការដាំដើមឈើជាចំណុចរួមគ្នារវាងអាជ្ញាធរខេត្ត និងសភាយុវពាណិជ្ជករអន្តរជាតិកម្ពុជា កើតឡើងពីកិច្ចសហប្រតិបត្តិការគ្នាបានល្អ ។ ឯកឧត្តម ឈិត សុខុន បានមានប្រសាសន៌បន្តទៀតថា នេះជាគម្រោងសហការគ្នា ជាលើកទី១ ហើយការងារនេះយើងបើកទូលាយដល់បណ្តាក្រុមហ៊ុន អង្គការក្រៅរដ្ឋាភិបាលចូលរួមដាំដើមឈើក្នុងខេត្តអោយមានសម្រស់ស្រស់ត្រកាលនៅអមសងខាងដងរុក្ខវថី ក្នុងនាមអាជ្ញាធរខេត្តបន្តថែរក្សា និងបំផុសប្រជាពលរដ្ឋដាំដើមឈើបន្ថែមទៀតទៅតាមសមត្ថភាព ។
បច្ចុប្បន្នអាជ្ញាធរកំពុងចាប់អារម្មណ៌អំពីបរិស្ថាន ទេសចរណ៌ ដោយជំរុញអោយក្រុមហ៊ុនប្រមូលសំរាម ប្រមូលឲ្យបានស្អាត ទាន់ពេលវេលា ដូចពាក្យស្លោកថា ទីក្រុងគ្នានស្បោងប្លាស្ទិក ។ ឯកឧត្តមអភិបាលខេត្ត សំណូមពរប្រជាពលរដ្ឋចូលរួមសំអាតបរិស្ថាននៅតាមលំនៅដ្ឋាន ស្មៅនៅមុខផ្ទះឲ្យបានស្អាតជាប្រចាំ និងដាំដើមឈើតាមមុខផ្ទះឲ្យបានគ្រប់គ្នា ។ ការដាំដើមឈើអមសងខាងផ្លូវ នាពេលនេះ គឺមានចម្ងាយពីទ្រូងផ្លូវចំងាយពី៧ ទៅ១០ម៉ែត្រ ដើម្បីទុកឲ្យផ្លូវធំទូលាយងាយស្រួល ក្នុងការយើងអភិវឌ្ឍន៌ពង្រីកផ្លូវបន្ថែមទៀត ។
លោកស្រី ជា សុខលាង ប្រធានគម្រោង និងជាអនុប្រធានសភាយុវពាណិជ្ជករអន្តរជាតិកម្ពុជា សាខាចតុមុខ មានប្រសាសន៌ថា គម្រោងដាំកូនឈើរលើកទីពីររបស់សភាយុវពាណិជ្ជករអន្តរជាតិ សាខាចតុមុខនៅខេត្តព្រះសីហនុ ដើម្បីបំផុសអោយប្រជាពលរដ្ឋ ក៌ដូចជាសហគមន៌ចូលរួមដាំដុះដើមឈើ ព្រោះខេត្តព្រះសីហនុជាខ្ពង់រាបសម្បូរទៅដោយថ្ម និងបង្ហាញថា នៅកន្លែងណាក៌យើងដាំកូនឈើបានដែរ ទោះបីទីតាំងនោះមានថ្មច្រើន ហើយតំបន់ផ្សេងទៀតល្អសម្រាប់ការដាំដើមឈើ យើងគួរតែចាប់ដាំពីពេលនេះតទៅ ។ កាលពីឆ្នាំ២០១១ យើងក៌បានធ្លាប់សហការជាមួយក្រុមហ៊ុន អ៊ អិម អេ R M A ដាំនៅតាមរុក្ខវិថីក្នុងក្រុងសៀមរាប ចាប់ពីព្រលានយន្តហោះ រហូតដល់ក្នុងក្រុងសៀមរាប ៕