ខេត្តព្រះសីហនុ លោកវរសេនីយ៌ទោ សៅ ស៊ាន នាយករិយាល័យនគរបាលស្ថិតិ និងអត្តសញ្ញាណបណ្ណ័នៃស្នងការដ្ឋាននគរបាលខេត្តព្រះសីហនុ បានឲ្យដឹងថា ចាប់ពីរាជរដ្ឋាភិបាលកម្ពុជាបានចាប់ផ្តើមឲ្យប្រជាពលរដ្ឋធ្វើអត្តសញ្ញាណប័ណ្ណគំរូថ្មីចាប់ពីថ្ងៃទី១៨ ខែមេសា ឆ្នាំ២០១២ រហូតមកដល់បច្ចុប្បន្នខេត្តព្រះសីហនុមានប្រជាពលរដ្ឋគ្រប់អាយុមកធ្វើអត្តសញ្ញាណប័ណ្ណ និងប្តូរអត្តសញ្ញាណប័ណ្ណគំរូថ្មី ចាប់ពីអាយុចាប់ពី១៥ឆ្នាំឡើងមានចំនួន ១១៨.០០០នាក់ ហើយគិតមកត្រឹមថ្ងៃទី១១ ខែសីហា ឆ្នាំ២០១៤ ប្រជាពលរដ្ឋចំនួន ៣៨ ១២០នាក់ ក្នុងនោះស្រី២០.៣២៧នាក់ បានបំពេញបែបបទធ្វើអត្តសញ្ញាណប័ណ្ណ និងទទួលបានអត្តសញ្ញាណបណ្ណ័គំរូថ្មីរួចរាល់ហើយ តាមប្រព័ន្ឋបច្ចេកវិទ្យាទំនើបនៅស្នងការដ្ឋាននគរបាលខេត្តព្រះសីហនុ ។
រាជរដ្ឋាភិបាលកម្ពុជា និងក្រសួងមហាផ្ទៃ បានអនុវត្តន៌ការធ្វើអត្តសញ្ញាណបណ្ណ័គំរូថ្មី តម្រូវអោយប្រជាពលរដ្ឋបង់លុយក្នុងម្នាក់ចំនួន ១០.០០០រៀល ចាប់ពីថ្ងៃទី០១ ខែកក្កដា ឆ្នាំ២០១៤មក ដែលជាថ្លៃអាកររបស់ថវិការជាតិ រហូតមកដល់ថ្ងៃទី១១ ខែសីហា ឆ្នាំ២០១៤នេះ មានប្រជាពលរដ្ឋចំនួន ៥.១០០នាក់ បានបង់លុយធ្វើអត្តសញ្ញាណប័ណ្ណ ឬប្តូរអត្តសញ្ញាណប័ណ្ណគំរូថ្មីនៅការិយាល័យនគរបាលស្ថិតិ និងអត្តសញ្ញាណប័ណ្ណ ។ នៅខេត្តព្រះសីហនុក្នុងឆ្នាំ២០១៤នេះ ប្រជាពលរដ្ឋអ្នកមានអាយុពី១៥ឆ្នាំឡើង ចំនួន ៣.៥៤៦នាក់ មានសិទ្ធិធ្វើអត្តសញ្ញាណប័ណ្ណគំរូថ្មី និងអត្តសញ្ញាណប័ណ្ណអស់សុពលភាព ក្នុងចំណោមប្រជាពលរដ្ឋដែលត្រូវមកធ្វើអត្តសញ្ញាណប័ណ្ណចំនួន ១៤០.៣៨០នាក់ ក្នុងនោះស្រី៦៦.៦២៣នាក់ ។ 
លោកនាយការិយាល័យបានបន្តទៀតថា បច្ចុប្បន្នមន្ត្រីជំនាញបាននិងកំពុងមមា ញឹក ក្នុងការបំពេញបែបបទផ្តល់អត្តសញ្ញាណប័ណ្ណគំរូថ្មីដល់ប្រជាពលរដ្ឋ ដែលគ្រប់អាយុ និងប្រជាពលរដ្ឋដែលមានអត្តសញ្ញាណប័ណ្ណរួចហើយ តែហួសសុពលភាពការប្រើប្រាស់ ឬក៏មានអ្នកដែលមានអត្តសញ្ញាណប័ណ្ណប្រភេទចាស់ តែពុំទាន់ហួសសុពលភាពក៏អាចមកធ្វើអត្តសញ្ញាណប័ណ្ណគំរូថ្មីបានដែរ ព្រោះអត្តសញ្ញាណប័ណ្ណគំរូថ្មីនេះ មានអត្ថប្រយោជន៍សំខាន់ណាស់សម្រាប់ការប្រើប្រាស់តាមតម្រូវការរដ្ឋបាលផ្សេងៗ ព្រមទាំងបានគ្រប់គ្រងទិន្នន័យប្រវត្តិរូបទីកន្លែងស្នាក់នៅ ក្រយៅដៃ អត្តសញ្ញាណ ស្ថានភាពផ្ទាល់ខ្លួនរបស់ មនុស្សម្នាក់ៗ ព្រោះការធ្វើអត្តសញ្ញាណបណ្ណ័គំរូថ្មីនេះ ស្របតាមប្រព័ន្ឋបច្ចេកវិទ្យាទំនើបតាមស្តង់ដារអន្តរជាតិ ។ 
ក្រៅពីនេះវាមានសភាពជាប់ស្វិតមិនបាក់រហែក ឬឆេះភ្លើង និងរយះពេលប្រើប្រាស់វាមានសុពលភាពរហូតដល់រយៈពេល១០ឆ្នាំទើបអស់សុពលភាព ។ លោកវរសេនីយ៍ទោ សៅ ស៊ាន បានឲ្យដឹងបន្ថែមទៀតថា ខេត្តព្រះសីហនុមានក្រុង១ ស្រុក៣ សង្កាត់៥ ឃុំ២២ និង ១១២ភូមិ មានប្រជាពលរដ្ឋសរុប៣៩.៧៦៤គ្រួសារ មានមនុស្សសរុបចំនួន១៩៨.៧២៦នាក់ ក្នុងនោះស្រី១០០.៧៣៩នាក់៕
