ខេត្តក្រចេះ៖ សកម្មភាពដឹកជញ្ជូនឈើខុសច្បាប់កំពុងកើតមានទាំងយប់ទាំងថ្ងៃ ចេញពីតំបន់ដែនជម្រកសត្វព្រៃកែវសីម៉ា ខេត្តក្រចេះ និងដែនជម្រកសត្វព្រៃភ្នំព្រិច ខណៈមន្រ្តីជំនាញពាក់ព័ន្ធមួយចំនួនបានអះអាងថា ខ្លួនមិនបានដឹងនោះទេ តែតាមប្រភពច្បាស់ការបានប្រាប់ ភ្នាក់ងារសារព័ត៌មានយើងដឹងថា ការដឹកជញ្ជូននេះ គឺមានការឃុបឃិតគ្នាជាប្រព័ន្ធទើបក្រុមឈ្មួញទាំងនោះអាចដឹកចេញបាន។
ប្រភពព័ត៌មានពីប្រជាពលរដ្ឋបានឳ្យដឹងថា សកម្មភាពនេះគឺបានកើតមានជាយូរណាស់មកហើយ តែមិនដែលឃើញអជ្ញាធរមានសមត្ថកិច្ចពាក់ព័ន្ធណាចាត់វិធានទប់ស្កាត់ ឬបង្ក្រាបឡើយ ជាក់ស្តែងនៅតំបន់ដែនជម្រកសត្វព្រៃកែវសីម៉ា ខេត្តក្រចេះ ដែលលោក ភោគ សុចូត ជាប្រធាន និងមន្រ្តីពាក់ព័ន្ធជាច្រើនទៀត កំពុងបើកដៃឳ្យក្រុមឈ្មួញដឹកឈើចេញយ៉ាងសកម្ម។ ប្រភពខាងលើបន្តថា ឈ្មួញដឹកឈើខុសច្បាប់ដែលសកម្ម គឺត្រូវបានគេស្គាល់យ៉ាងច្បាស់ មានដូចជា ម៉ែអាស្រួច រស់នៅ ភូមិសំពោច ស្រែរនាម ឃុំឃ្សឹម ស្រុកស្នួល ខេត្តក្រចេះ បានប្រើប្រាស់រថយន្តសាំយ៉ុង ជាច្រើនគ្រឿង ដឹកឈើអារប្រភេទគ្រឿងផ្ទះ, ឈ្មោះ ហុក រស់នៅ ឃុំ កណ្ដោលជ្រុំ ស្រុកពញាក្រែក ខេត្តត្បូងឃ្មុំ, ឈ្មោះ ឌី រស់នៅភូមិជ្រីវ ឃុំ ទន្លូង ស្រុកមេមត់, ឈ្មោះ តឹង និង ឈ្មោះ ភ្លុក,ឈ្មោះ ចែពៅ,ឈ្មោះ ប្រុសឡាបអាប ជាដើម បានប្រើប្រាស់រថយន្តសាំយ៉ុងដឹកទាំងយប់ទាំងថ្ងៃ គ្មានសមត្ថកិច្ចជំនាញណាហ៊ានបង្ក្រាបឡើយ។
ជាក់ស្តែងនៅយប់ថ្ងៃទី១៧ ខែសីហា ឆ្នាំ២០២១ ម៉ោង០៤ និងម៉ោង០៥ទាបភ្លឺឈានចូលថ្ងៃទី១៨ មានរថយន្តសាំយ៉ុងចំនួន០៨គ្រឿងដឹកបទល្មើសព្រៃឈើឆ្លងកាត់ស្រុកស្នួល តាមផ្លូវជាតិលេខ៧A បានយ៉ាងរលូនដោយគ្មានការរំខានពីមន្ត្រីជំនាញ ឫអជ្ញាធរមានសមត្ថកិច្ចធ្វើការបង្ក្រាបនោះទេ ក្រុមឈ្មួញខាងលើត្រូវបានគេស្គាល់ឈ្មោះយ៉ាងច្បាស់ មានឈ្មោះ រ័ត្ន,ឈ្មោះ មិនា,ឈ្មោះខុម,ឈ្មោះ យុទ្ឋ ហើយក្រុមអ្នកដឹកឈើទាំងនោះតែងតែអះអាងថា បានបង់លុយឳ្យជំនាញគ្រប់កន្លែងទាំងអស់ បូកទាំងជំនាញខ្លះដែលដាក់កម្លាំងចាំដេញតាមដងផ្លូវថែមទៀតផង។ ក្រុមឈ្មួញទាំងនោះបានដឹកមកទំលាក់នៅឃុំ កណ្តោលជ្រុំ ស្រុកពញាក្រែក ខេត្តត្បូងឃ្មុំ ហើយដឹកបន្តទៅលក់ខេត្តព្រៃវែង តាមរូបភាពផ្សេងៗ ។
ប្រជាពលរដ្ឋរស់នៅតាមដងផ្លូវ ដែលបានឃើញសកម្មភាពនេះមានការងើងឆ្ងល់យ៉ាងខ្លាំងថា ហេតុអ្វីបានជាលោក ភោគ សុចូត នឹងមន្រ្តីជំនាញ ពាក់ព័ន្ធនៅតាមគោលដៅនានា ដែលមានកម្លាំងយាមកាមយ៉ាងតឹងរឹងបំផុតនោះ បែរជាមិនដឹង ហើយបន្តឳ្យមានបទល្មើសដឹកជញ្ជូនឈើខុសច្បាប់ដូច្នេះ ។
ជុំវិញសកម្មភាពនេះ លោក ភោគ សុចូត ប្រធានស្នាក់ការ ដែនជម្រកសត្វព្រៃកែវសីមាខេត្ត ក្រចេះ បានឳ្យដឹងថា សព្វថ្ងៃនេះដូចជាមិនឃើញមានបទល្មើសព្រៃឈើខុសច្បាប់ ដឹកឆ្លងកាត់មុខស្នាក់ការរបស់លោកនោះទេ ហើយបើមានលោក និងដាក់កម្លាំងដើម្បីទប់ស្កាត់។
ជាមួយគ្នានោះដែរ លោក ឆាយ ដួង សាវុធ ប្រធានមន្ទីរបរិស្ថានខេត្តក្រចេះ បានឲ្យដឹងថា ពាក់ព័ន្ធនឹងការដឹកជញ្ជូនឈើខុសច្បាប់នេះ លោកមិនបានដឹងទាល់តែសោះ តែបើសិនជាមានពិតមែននោះរូប លោក រីករាយនឹងសហការ ចាត់វិធានការទប់ស្កាត់ ដោយមិនទុកឳ្យមានសកម្មភាពដូចការលើកឡើងនោះទេ ក្នុងនោះលោកនឹងចាត់ឲ្យកូន ចៅចុះទៅពិនិត្យមើលតាមដងផ្លូវដើម្បីច្បាស់ថា មានដឹកជញ្ជូនដូចការលើកឡើងខាងលើឬយ៉ាងណា។ ចំណែកឯតាមដងផ្លូវជាតិលេខ ៧A និងលេខ៧៦វិញ រថយន្តសាំយ៉ុងដឹកបទល្មើសព្រៃឈើទាំងថ្ងៃទាំងយប់បែជាមន្ត្រីជំនាញមិនមានការទប់ស្កាត់ និងបង្រ្កាបឡើយពិសេសគឺកម្លាំងកងរាជអាវុធហត្ថ ស្រុក/ខេត្តទាំងពីរ ក្រចេះនិ ងត្បូងឃ្មុំក៏ដូចជាកម្លាំងកងរាជអាវុធហត្ថលើផ្ទៃប្រទេសដែលប្រចាំការតាមគោលដៅរបស់ខ្លួនគ្រាន់តែជាកន្ទេលធំបន្លំដេក ចាំទទួលលាភសក្ការៈហើយមើលទៅទើបមិនមានការបង្រ្កាបចឹង បើនៅតែបែបនេះធនធានធម្មជាតិព្រៃឈើនិងរលាយហិនហោចដ៏ខ្លីខាងមុខនេះជាក់ជាមិខាន។ ដូច្នេះសូមឯកឧត្តមនាយឧត្តមសេនីយ៍ សៅ សុខា មេបញ្ជាការកងរាជអាវុធហតលើផ្ទៃប្រទេស និងជាប្រធានគណៈកម្មាធិការជាតិក្នុងការបង្ការ ទប់ស្កាត់ និងបង្ក្រាបបទល្មើសព្រៃឈើទូទាំងប្រទេសមេត្តាជួយរិតបន្តឹងមន្ត្រីក្រោមឱវ៉ាតឲ្យអនុវត្តច្បាប់ប្រកបដោយភាពទទួលខុសត្រូវ និងមានប្រសិទ្ឋិខ្ពស់ផងចុះ៕
